ନୂଆଦିଲ୍ଲୀ: ବଢୁଥିବା ଜନସଂଖ୍ୟା ଅନୁପାତରେ ଖାଦ୍ୟାଭାବ ପୂରଣ କରିବା ସବୁବେଳେ ଚ୍ୟାଲେଞ୍ଜ ସୃଷ୍ଟି କରୁଛି। ଏହି ସମସ୍ୟାର ସମାଧାନ ଲାଗି ବୈଜ୍ଞାନିକମାନେ ଅହରହ ଗବେଷଣା ଚଳାଇଛନ୍ତି। ବିକଳ୍ପ ସ୍ବରୂପ ସହରରେ ଏବେ କିଚେନ ଗାର୍ଡେନ୍କୁ ପ୍ରାଧାନ୍ୟ ଦିଆଯାଉଛି। ତେବେ ସହରାଞ୍ଚଳରେ ତଟକା ପରିବା ପାଇଁ ‘ଭର୍ଟିକାଲ ଫାର୍ମିଂ’ ବା ‘ପାଚେରିରେ ଚାଷ’ ଉପରେ ଧ୍ୟାନ କେନ୍ଦ୍ରୀଭୂତ କରୁଛନ୍ତି ଅନେକେ। ଏହି ଚାଷ ପଦ୍ଧତିକୁ ବିଭିନ୍ନ ସ୍ଥାନରେ ପରୀକ୍ଷାମୂଳକ ଭାବେ କରାଗଲାଣି।
ଭାରତର କୃଷିକାର୍ଯ୍ୟ ଲାଗି ପର୍ଯ୍ୟାପ୍ତ ଚାଷଜମି ରହିଛି। ହେଲେ ଇସ୍ରାଏଲ ଭଳି ଛୋଟ ଦେଶରେ ଜନସଂଖ୍ୟା ତୁଳନାରେ ଜମିର ପରିମାଣ କମ୍। ତେଣୁ ଖାଦ୍ୟ ସମସ୍ୟାର ସମାଧାନ ଲାଗି ଏଠାରେ ‘ଭର୍ଟିକାଲ ଫାର୍ମିଂ’ ଉପରେ ଗୁରୁତ୍ୱ ଦିଆଯାଉଛି। ଏହାକୁ ଆଧୁନିକ କୃଷିର ନୂଆଯୁଗର ଅୟମାରମ୍ଭ ବୋଲି କୁହାଯାଉଛି। ଜନବହୁଳ ସହରରେ ଏହି ଚାଷ ପ୍ରଣାଳୀ ଦ୍ୱାରା ଆଞ୍ଚଳିକ ସ୍ତରରେ ହେଉଥିବା ଖାଦ୍ୟାଭାବକୁ ବହୁମାତ୍ରାରେ ଦୂର କରାଯାଇପାରିବ। ‘ଭର୍ଟିକାଲ ଫାର୍ମିଂ’ ଦ୍ୱାରା ଜଣେ ନିଜ ଇଚ୍ଛା ଅନୁଯାୟୀ କାନ୍ଥରେ ଗହମ, ଧାନ ଭଳି ଶସ୍ୟ ସମେତ ବିଭିନ୍ନ ପ୍ରକାରର ପରିବା ଉତ୍ପାଦନ କରିପାରିବ। ଏହି ଚାଷ ପ୍ରଣାଳୀ ଘରର ସୌନ୍ଦର୍ଯ୍ୟ ବଢ଼ାଇବା ସହ ପରିବେଶକୁ ଶୀତଳ ରଖିବାରେ ସହାୟକ ହୁଏ। ଏଥିସହ ପ୍ରଦୂଷଣ ହ୍ରାସ ପାଇଥାଏ।
କେମିତି କରାଯାଏ
‘ଭର୍ଟିକାଲ ଫାର୍ମିଂ’ ପାଇଁ ପାଚେରିରେ ଛୋଟଛୋଟ କୁଣ୍ଡକୁ ବ୍ୟବସ୍ଥିତ ଭାବେ ରଖିବାକୁ ପଡ଼େ। ପ୍ରଥମେ ଚାରାଗୁଡ଼ିକ ଜମିରେ ଲଗାଯାଇଥାଏ। ଟିକେ ବିକଶିତ ହୋଇଯିବା ପରେ ଏହାକୁ କୁଣ୍ଡକୁ ସ୍ଥାନାନ୍ତର କରାଯାଏ। ଗଛ ବଞ୍ଚାଇବା ଲାଗି ବୁନ୍ଦା ଜଳସେଚନର ପ୍ରୟୋଗ କରାଯାଏ। ଇସ୍ରାଏଲରେ ଏହା କମ୍ପ୍ୟୁଟର ଦ୍ୱାରା ସଞ୍ଚାଳିତ। ଏହି ଫାର୍ମିଂରେ ବିଭିନ୍ନ ପଦ୍ଧତି ରହିଛି। କମ୍ ମାଟି ଏବଂ ପବନରେ ବଢ଼ିପାରୁଥିବା ଗଛକୁ ଏଥିରେ ଗୁରୁତ୍ୱ ଦିଆଯାଉଛି। ଆମେରିକା, ଅଷ୍ଟ୍ରେଲିଆ, ଇସ୍ରାଏଲ, ଚାଇନା, କୋରିଆ, ଜାପାନ ସମେତ ଭାରତର ବଡ଼ ସହରୀ ଇଲାକାରେ ‘ଭର୍ଟିକାଲ ଫାର୍ମିଂ’ର ଆଦର ବଢ଼ିବାରେ ଲାଗିଛି। ତେବେ ଏହି ଚାଷ ପ୍ରଣାଳୀରେ ଖର୍ଚ୍ଚ ପାରମ୍ପରିକ ଚାଷ ତୁଳନାରେ ଅଧିକ। ଖାସ୍କରି ପ୍ରାରମ୍ଭିକ ଅବସ୍ଥାରେ ପାଚେରି ପ୍ରସ୍ତୁତ କରିବା ଲାଗି ଅଧିକ ଖର୍ଚ୍ଚ ହୋଇଥାଏ। ତଥାପି ସୌଖୀନ ଚାଷରେ ମନୋନିବେଶ କରୁଥିବା ପରିବାର ‘ଭର୍ଟିକାଲ ଫାର୍ମିଂ’ରୁ ବ୍ୟକ୍ତିଗତ ଚାହିଦା ମେଣ୍ଟାଇବା ସହ ଭଲ ରୋଜଗାର ମଧ୍ୟ କରୁଛନ୍ତି।
