ଇସଲାମାବାଦ,୧୭।୮ : କୁରାନ ପ୍ରତି ଅସମ୍ମାନ ଅଭିଯୋଗରେ ପାକିସ୍ତାନ ଖ୍ରୀଷ୍ଟିଆନମାନଙ୍କୁ ଟାର୍ଗେଟ କରାଯାଇଛି। ଫୈସଲାବାଦରେ କେତେକ ଚର୍ଚ୍ଚରେ ଭଙ୍ଗାରୁଜା କରାଯାଇଛି। ଏହି ମାମଲାରେ ୧୦୦ରୁ ଅଧିକ ଲୋକଙ୍କୁ ଗିରଫ କରାଯାଇଛି। ପାକିସ୍ତାନ ଖବରକାଗଜ ଡନ ଅନୁସାରେ ଜାରାନୱାଲା ଜିଲାରେ ଅନେକ ଚଚ୍ଚରେ ଭଙ୍ଗାରୁଜା କରାଯାଇଛି।
ପଞ୍ଜାବ ସରକାରଙ୍କ ମୁଖପାତ୍ର ଏକ ବିବୃତ୍ତିରେ କହିଛନ୍ତି ପ୍ରାଦେଶିକ ସରକାର ମଧ୍ୟ ଏହି ଘଟଣାର ଉଚ୍ଚ ସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି। ଏହାପୂର୍ବରୁ ପଞ୍ଜାବର ମଧ୍ୟବର୍ତ୍ତୀ ସୂଚନା ମନ୍ତ୍ରୀ ଆମୀର ମିର କହିଥିଲେ ଏହି ଅଞ୍ଚଳରେ ଶାନ୍ତି ଭଙ୍ଗ କରିବା ଅଭିଯୋଗରେ କେତେକ ଲୋକଙ୍କୁ ଅଟକ ରଖାଯାଇଛି। ମନ୍ତ୍ରୀ ଏକ ବିବୃତ୍ତିରେ କହିଛନ୍ତି ଜାରାନୱାଲାରେ ହିଂସା ଏକ ସୁଚିନ୍ତିତ ଷଡଯନ୍ତ୍ରର ଏକ ଅଂଶ ଭାବରେ ହୋଇଛି। ଜନସାଧାରଣଙ୍କ ଭାବନାକୁ ଉତ୍ତେଜିତ କରି ଶାନ୍ତି ଭଙ୍ଗ କରିବାକୁ ଯୋଜନା ଥିଲା।
ତେବେ ପରିସ୍ଥିତି ବର୍ତ୍ତମାନ ସମ୍ପୂର୍ଣ୍ଣ ନିୟନ୍ତ୍ରଣରେ ଅଛି। ଯିଏ ଆଇନକୁ ନିଜ ହାତକୁ ନେବାକୁ ଚେଷ୍ଟା କରିବ ସେ ତୁରନ୍ତ ଗିରଫ ହେବ।
ସୂଚନା ମନ୍ତ୍ରୀ କହିଛନ୍ତି ଚର୍ଚ୍ଚଗୁଡିକର ସୁରକ୍ଷାକୁ କଡାକଡି କରାଯାଇଛି ଏବଂ ବହୁ ସଂଖ୍ୟାରେ ପୋଲିସ ଫୋର୍ସ ମୁତୟନ କରାଯାଇଛି। ଜିଓ ନ୍ୟୁଜ ରିପୋର୍ଟ ଅନୁଯାୟୀ, ପ୍ରଭାବିତ ଅଞ୍ଚଳରେ ୬ ହଜାରରୁ ଅଧିକ ପୋଲିସ ଏବଂ ରେଞ୍ଜର କର୍ମଚାରୀ ଉପସ୍ଥିତ ଅଛନ୍ତି। ଏହି ସମୟରେ, ଖ୍ରୀଷ୍ଟିଆନ ନେତାମାନେ ଅଭିଯୋଗ କରିଛନ୍ତି ପୋଲିସ ମୂକ ଦର୍ଶକ ହୋଇ ରହିଛି।
ଏହାକୁ ନେଇ ଆମେରିକା ଚିନ୍ତା ପ୍ରକଟ କରିଛି। ଆମେରିକା କହିଛି ହିଂସା ଅଭିବ୍ୟକ୍ତି ରୂପ ନୁହେଁ।
