ନୂଆଦିଲ୍ଲୀ,୨୯।୫: ବୈଭବ ସୂର୍ଯ୍ୟବଂଶୀ ଲକ୍ଷ୍ନୌ ସୁପରଜାଏଣ୍ଟସ ବିପକ୍ଷରେ ୯୩ ରନର ଏକ ବିସ୍ଫୋରକ ଇନିଂସ ଖେଳିଥିଲେ। ଫଳରେ ରାଜସ୍ଥାନ ରୟାଲ୍ସ ୫ ବଲ ବାକି ଥାଇ ୨୨୧ ରନର ଟାର୍ଗେଟକୁ ସଫଳତାର ହାସଲ କରିଥିଲା। ଏହି ଇନିଂସ ସହିତ ବୈଭବ ଏକ ବିଶ୍ୱ ରେକର୍ଡ ସ୍ଥାପନ କରିଛନ୍ତି,ଯାହାକୁ ଭବିଷ୍ୟତରେ ଭାଙ୍ଗିବା ଅତ୍ୟନ୍ତ କଷ୍ଟକର ହେବ। ସେ ବର୍ତ୍ତମାନ IPL 2026 ସିଜିନରେ ୫୦୦ ରନ ପୂରଣ କରିଛନ୍ତି।
ବୈଭବ ସୂର୍ଯ୍ୟବଂଶୀ ଗତ ବର୍ଷ ତାଙ୍କର IPL ଡେବ୍ୟୁ କରିଥିଲେ, ଏହି ଲିଗରେ ଖେଳିଥିବା ସବୁଠାରୁ କମ ବୟସ୍କ ବ୍ୟାଟସମ୍ୟାନ ହୋଇଥିଲେ। ଯଦିଓ ସେ ଗତ ବର୍ଷ ମୋଟ ୨୫୨ ରନ କରିଥିଲେ। ସେ ଟୁର୍ନାମେଣ୍ଟର ମଧ୍ୟଭାଗରେ ଡେବ୍ୟୁ କରିଥିଲେ ଏବଂ କେବଳ ୭ ମ୍ୟାଚ ଖେଳିଥିଲେ। ସେ ବର୍ତ୍ତମାନ ଦଳର ଜଣେ ପ୍ରମୁଖ ଖେଳାଳି, ଏହି ସିଜିନରେ ପ୍ରତ୍ୟେକ ମ୍ୟାଚରେ ସ୍ଥାନ ପାଇଛନ୍ତି। ସେ ୧୩ ଇନିଂସରେ ୫୭୯ ରନ ସଂଗ୍ରହ କରିଛନ୍ତି ଏବଂ ବର୍ତ୍ତମାନ ଅରେଞ୍ଜ କ୍ୟାପ ରଖିଛନ୍ତି।
ବୈଭବ ଯେକୌଣସି କ୍ରିକେଟ ଟୁର୍ନାମେଣ୍ଟରେ ୫୦୦ ରନ ସ୍କୋର କରିବାରେ ବିଶ୍ୱର ସବୁଠାରୁ କମ ବୟସ୍କ ବ୍ୟାଟସମ୍ୟାନ ହୋଇଛନ୍ତି। ସେ ୧୫ ବର୍ଷ ୫୩ ଦିନରେ ୫୦୦ ରନର ମାଇଲଖୁଣ୍ଟ ଛୁଇଁଛନ୍ତି। ଟୁର୍ନାମେଣ୍ଟର ଚଳିତ ସଂସ୍କରଣରେ ସେ ଗୋଟିଏ ଶତକ ଏବଂ ତିନୋଟି ଅର୍ଦ୍ଧଶତକ ହାସଲ କରିସାରିଛନ୍ତି। ପୂର୍ବରୁଏହି ରେକର୍ଡ ଦେବଦତ୍ତ ପଡିକ୍କଲଙ୍କ ନାମରେ ଥିଲା, ଯିଏ ୨୦୧୯-୨୦ ସୟଦ ମୁସ୍ତାକ ଅଲି ଟ୍ରଫିରେ ୫୮୦ରନ କରିଥିଲେ। ସେତେବେଳେ ତାଙ୍କର ବୟସ ୧୯ ବର୍ଷ ଥିଲା।
IPL ରେ, ୨୦୧୮ରେ ରିଷଭ ପନ୍ତ ୬୮୪ ରନ କରିଥିଲେ, କିନ୍ତୁ ସେତେବେଳେ ତାଙ୍କର ବୟସ ୨୦ ବର୍ଷରୁ ଅଧିକ ଥିଲା। ଏହିପରି ବୈଭବ ଗୋଟିଏ ସିଜିନରେ ୫୦୦ ରନ କରିଥିବା IPL ଇତିହାସର ସବୁଠାରୁ ଯୁବ ବ୍ୟାଟସମ୍ୟାନ ମଧ୍ୟ ହୋଇଛନ୍ତି। ଯଦିଓ ସେ ଅଳ୍ପକେ ଶତକ ହାସଲ କରିବାରୁ ବଞ୍ଚିତ ହୋଇଥିଲେ, ସେ ଦଳର ବିଜୟ ସୁନିଶ୍ଚିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ଏବଂ ତାଙ୍କୁ ମ୍ୟାଚର ଶ୍ରେଷ୍ଠ ଖେଳାଳି ଭାବରେ ସମ୍ମାନିତ କରାଯାଇଥିଲା।
ମଙ୍ଗଳବାର ଲକ୍ଷ୍ନୌ ବିପକ୍ଷ ମ୍ୟାଚ୍ରେ ବୈଭବ ସୂର୍ଯ୍ୟବଂଶୀ ମାତ୍ର ୩୮ ବଲ୍ରେ ୯୩ ରନ କରିଥିଲେ। ଏହି ଇନିଂସ ସମୟରେ ସେ ୧୦ ଛକା ଏବଂ ୭ ଚୌକା ମାରିଥିଲେ। ସେ ଏବେ କ୍ରିସ ଗେଲଙ୍କ ଗୋଟିଏ ସିଜନ୍ରେ ସର୍ବାଧିକ ଛକା ରେକର୍ଡ ଭାଙ୍ଗିବା ପାଇଁ ଅତ୍ୟନ୍ତ ନିକଟତର। ଗେଲ ୨୦୧୨ରେ ମୋଟ ୫୯ ଛକା ମାରିଥିଲେ। ଗେଲଙ୍କ ରେକର୍ଡ ଭାଙ୍ଗିବା ପାଇଁ ସୂର୍ଯ୍ୟବଂଶୀଙ୍କୁ ଆଉ କେବଳ ୭ ଛକା ମାରିବାକୁ ପଡିବ। ଯଦି ରାଜସ୍ଥାନ ରୟାଲ୍ସ ସେମାନଙ୍କର ପରବର୍ତ୍ତୀ ମ୍ୟାଚ ଜିତିଯାଏ, ତେବେ ପ୍ଲେଅଫ ପାଇଁ ଯୋଗ୍ୟତା ଅର୍ଜନ କରିଥିବା ଚତୁର୍ଥ ଦଳ ହେବ।
Dharitri – Odisha’s No.1 Odia Daily
