ନୂଆଦିଲ୍ଲୀ,୬।୩ : ଲୋକସଭା ଏବଂ ପାଞ୍ଚଟି ରାଜ୍ୟସଭାରେ ଉପବାଚସ୍ପତି ନିଯୁକ୍ତ ପଦବୀ ଖାଲି ଥିବାରୁ କଂଗ୍ରେସ ପକ୍ଷରୁ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରାଯାଇଛି। କଂଗ୍ରେସ ନେତା ଜୟରାମ ରମେଶ ଟୁଇଟ କରି କହିଛନ୍ତି ଯେ ଗତ ଚାରି ବର୍ଷ ଧରି ଲୋକସଭାରେ କୌଣସି ଉପବାଚସ୍ପତି ନାହାଁନ୍ତି ଏବଂ ଏହା ଏକ ଅସାମ୍ବିଧାନିକ ପ୍ରସଙ୍ଗ। ଜୟରାମଙ୍କ ଏହି ବିବୃତ୍ତି ଏକ ମାସ ପରେ ଆସିଛି ଯେତେବେଳେ ସୁପ୍ରିମକୋର୍ଟ ଲୋକସଭାରେ କାହିଁକି ଉପବାଚସ୍ପତି ଚୟନ କରା ଯାଇ ନାହିଁ ବୋଲି କେନ୍ଦ୍ର ସରକାରଙ୍କଠାରୁ ଉତ୍ତର ଲୋଡିଥିଲେ। କୋର୍ଟ ଏହାକୁ ସମ୍ବିଧାନର ଧାରା ୯୩ ର ଉଲ୍ଲଂଘନ ବୋଲି କହିଥିଲେ।
ଗତ ମାସରେ ସୁପ୍ରିମକୋର୍ଟରେ ଏନେଇ ଏକ ଜନସ୍ବାର୍ଥ ମାମଲା ଦାୟର କରାଯାଇଥିଲା। ଆବେଦନକାରୀ କେତେକ ରାଜ୍ୟର ବିଧାନସଭାରେ ମଧ୍ୟ ସମାନ ସ୍ଥିତି ଥିବା ସୂଚାଇ ଥିଲେ। ଉପବାଚସ୍ପତିଙ୍କ ନିର୍ବାଚନ ନ ହେବା ସୁସ୍ଥ ଗଣତାନ୍ତ୍ରିକ କାର୍ଯ୍ୟକଳାପ ବିରୁଦ୍ଧରେ ବୋଲି ଏଥିରେ ଉଲ୍ଲେଖ କରାଯାଇଥିଲା। ବର୍ତ୍ତମାନ ଉପବାଚସ୍ପତି ପଦ ୨୩ ଜୁନ ୨୦୧୯ ଠାରୁ ଖାଲି ଅଛି।
ସମ୍ବିଧାନର ଧାରା ୯୩ ଅନୁଯାୟୀ, ସଂସଦର ଲୋକସଭାରେ ଗୃହର ଦୁଇଜଣ ସଦସ୍ୟଙ୍କୁ ଯଥାକ୍ରମେ ବାଚସ୍ପତି ଏବଂ ଉପବାଚସ୍ପତି ଭାବେ ଚୟନ କରାଯିବ। ଯଦି ବାଚସ୍ପତି କିମ୍ବା ଉପବାଚସ୍ପତିଙ୍କ କାର୍ଯ୍ୟାଳୟ ଖାଲି ହୁଏ, ତେବେ ଗୃହ ଅନ୍ୟ ଜଣେ ସଦସ୍ୟଙ୍କୁ ବାଚସ୍ପତି କିମ୍ବା ଉପବାଚସ୍ପତି ଭାବରେ ଚୟନ କରିପାରିବେ।
