ଓ୍ବାଶିଂଟନ,୨୫।୪: ଆମେରିକାରେ ଥିବା ମୂଳ ଭାରତୀୟ ସାଂସଦ ରୋ ଖନ୍ନା କହିଛନ୍ତି, ଏବେ ଭାରତୀୟମାନେ ପାକିସ୍ତାନକୁ ନୁହେଁ ବରଂ ଚାଇନାକୁ ସବୁଠାରୁ ବଡ ସାମରିକ ଚ୍ୟାଲେଞ୍ଜ ବୋଲି ମାନୁଛନ୍ତି। ସେ କହିଛନ୍ତି ଆମେରିକାକୁ ଚାଇନା ସହ ତା’ର ସମ୍ପର୍କକୁ ପୁଣିଥରେ ସନ୍ତୁଳିତ କରିବା ଜରୁରୀ। ସୂଚନାଯୋଗ୍ୟ, ମେ ୨୦୨୦ରେ ପୂର୍ବ ଲଦ୍ଦାଖରେ ଭାରତ ଓ ଚାଇନାର ସେନା ମଧ୍ୟରେ ହୋଇଥିବା ସଂଘର୍ଷ ପରେ ଉଭୟ ଦେଶର ସମ୍ପର୍କରେ ତିକ୍ତତା ସୃଷ୍ଟି ହୋଇଛି। ଭାରତ ଓ ଚାଇନା ୧୭ ରାଉଣ୍ଡର ଶୀର୍ଷ କମାଣ୍ଡର ସ୍ତରର ବୈଠକ କରି ସାରିଛନ୍ତି, ହେଲେ ଏବେବି ଦୁଇ ଦେଶ ମଧ୍ୟରେ ଉତ୍ତେଜନା ଲାଗି ରହିଛି। ଭାରତ ସ୍ପଷ୍ଟ କରି ସାରିଛି ଯେବେ ପର୍ଯ୍ୟନ୍ତ ସୀମାରେ ଶାନ୍ତି ଫେରିନି ସେବେ ପର୍ଯ୍ୟନ୍ତ ଦୁଇ ଦେଶ ମଧ୍ୟରେ ସମ୍ପର୍କ ସାମାନ୍ୟ ହୋଇ ପାରିବ ନାହିଁ।
ପ୍ରତିଷ୍ଠିତ ଷ୍ଟାନଫୋର୍ଡ ୟୁନିଭର୍ସିଟିର ହୁବର ଇନଷ୍ଟିଚ୍ୟୁଟରେ ବିଦେଶ ନୀତି ଉପରେ ଦେଇଥିବା ସମ୍ବୋଧନରେ ରୋ ଖାନ୍ନା କହିଥିଲେ, ଆଜି ଆମକୁ ପୁଣିଥରେ ଚାଇନା ସହ ଆମର ସମ୍ପର୍କକୁ ସନ୍ତୁଳିତ କରିବା ଦରକାର। ଏଥିରେ ଆମର ଓ ଏସିଆରେ ଆମର ସହଯୋଗୀଙ୍କୁ ମିଳୁଥିବା ଚ୍ୟାଲେଞ୍ଜକୁ ନେଇ ସ୍ପଷ୍ଟତା ଆସିବ। ଆମେ ଆଶା କରୁଛି କି ଆମ କୁଟନୀତି ଓ ନେତୃତ୍ୱ ଯୋଗୁ ଏକବିଂଶ ଶତାବ୍ଦୀ ବିଂଶ ଶତାବ୍ଦୀ ଅପେକ୍ଷା କମ ହିଂସାତ୍ମକ ହେବ।
