ନୂଆଦିଲ୍ଲୀ/ଓ୍ବାଶିଂଟନ,୨୧।୪: ଆମେରିକାର ଉପରାଷ୍ଟ୍ରପତି JD Vance ତାଙ୍କର ପ୍ରଥମ ସରକାରୀ ଗସ୍ତରେ ସୋମବାର ଭାରତ ପହଞ୍ଚିଛନ୍ତି। ଏହି ଯାତ୍ରା ୨୧ ଏପ୍ରିଲରୁ ୨୪ ଏପ୍ରିଲ ପର୍ଯ୍ୟନ୍ତ ଚାଲିବ। ହ୍ବାଇଟ ହାଉସ ପ୍ରେସ ପୁଲ ଅନୁଯାୟୀ, ଭାନ୍ସ ତାଙ୍କ ପରିବାର ସହିତ ଇଟାଲୀ ଯାତ୍ରା କରୁଥିଲେ ଏବଂ ରବିବାର ରାତିରେ ଏୟାର ଫୋର୍ସ ଟୁ (AF2) ରେ ଚଢ଼ିଥିଲେ। ସୋମବାର ସକାଳ ପ୍ରାୟ ୯ଟା ୩୦ସମୟରେ ତାଙ୍କ ବିମାନ ନୂଆଦିଲ୍ଲୀର ପାଲମ ବାୟୁସେନା ଷ୍ଟେଶନରେ ଅବତରଣ କରିଥିଲା। ସକାଳ ୧୦ଟାରେ ତାଙ୍କୁ ଆନୁଷ୍ଠାନିକ ଭାବରେ ସ୍ବାଗତ କରାଯାଇଛି। ଉପରାଷ୍ଟ୍ରପତି JD Vance ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ସା ୬ଟା ୩୦ରେ ପ୍ରଧାନମନ୍ତ୍ରୀଙ୍କ ସରକାରୀ ବାସଭବନ, ୭ଲୋକ କଲ୍ୟାଣ ମାର୍ଗରେ ଏକ ଆନୁଷ୍ଠାନିକ ବୈଠକ କରିବେ। ଏୟାର ଫୋର୍ସ ୨ ରେ ଚଢ଼ିବା ପୂର୍ବରୁ, ଭାନ୍ସ ତାଙ୍କ ଶୋଇଥିବା ଝିଅ ମିରାବେଲଙ୍କୁ କାରରୁ ଧୀରେ ଉଠାଇ ନେଉଥିବାର ଦେଖାଯାଇଥିଲା ଯେତେବେଳେ ତାଙ୍କ ପୁଅ ଇଭାନ ଏବଂ ବିବେକ ଖେଳଣା ଖଣ୍ଡା ଧରି ଗାଡ଼ି ଚଢ଼ିଥିଲେ। ତାଙ୍କ ସହିତ ଉଷା ଭାନ୍ସ ମଧ୍ୟ ଥିଲେ।
ଆମେରିକାର ଉପରାଷ୍ଟ୍ରପତି ଜେ.ଡି. ଭାନ୍ସ ଏବଂ ତାଙ୍କ ପତ୍ନୀ ଉଷା ଭାନ୍ସ ଦିଲ୍ଲୀରେ ପହଞ୍ଚିଛନ୍ତି। ପାଲମ ବିମାନବନ୍ଦରରେ ଭାନ୍ସଙ୍କୁ ଗାର୍ଡ ଅଫ ଅନର ଦିଆଯାଇଥିଲା। ଏହା ପରେ, ତାଙ୍କର ତିନି ପିଲା ବିମାନରୁ ଓହ୍ଲାଇଲେ, ଏବଂ ସମସ୍ତେ ଭାରତୀୟ ପୋଷାକରେ ନଜର ଆସିଥିଲେ। ପୁଅମାନେ କୁର୍ତ୍ତା-ପାଇଜାମା ପିନ୍ଧିଥିଲେ, ଝିଅ ଲେହେଙ୍ଗାରେ ବହୁତ ସୁନ୍ଦର ଦେଖାଯାଉଥିଲେ। ଜେ.ଡି. ଭାନ୍ସ ନିଜେ ତାଙ୍କ ଝିଅକୁ ଓହ୍ଲାଇବା ପାଇଁ ବିମାନର ସିଡ଼ି ଚଢ଼ିଥିଲେ ଏବଂ ତାଙ୍କୁ କୋଳରେ ନେଇ ଚାଲିଥିଲେ, ଯାହା ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। ତାଙ୍କୁ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ସ୍ବାଗତ କରିଥିଲେ।
