ଓ୍ୱାଶିଂଟନ୍/ମସ୍କୋ,୭।୧: ଆମେରିକା ଏବଂ ରୁଷିଆ ମଧ୍ୟରେ ଉତ୍ତେଜନା ବଢ଼ିବାରେ ଲାଗିଛି। ଭେନେଜୁଏଲା ସହ ଜଡ଼ିତ ଆମେରିକାର କଟକଣା ଉଲ୍ଲଂଘନ ଅଭିଯୋଗରେ ଆମେରିକା ସେନା ଉତ୍ତର ଆଟଲାଣ୍ଟିକ ମହାସାଗରରେ ‘ମାରିନେରା’ ନାମକ ଏକ ଋଷୀୟ ତୈଳ ଟ୍ୟାଙ୍କରକୁ ଜବତ କରିଛି। ଏହି ଅପରେସନ ସପ୍ତାହେ ଧରି ଚାଲିଥିଲା ଏବଂ ମସ୍କୋ ଏହାକୁ ଅନ୍ତର୍ଜାତୀୟ ସାମୁଦ୍ରିକ ଆଇନର ଉଲ୍ଲଙ୍ଘନ ବୋଲି କହିବା ସହ ତୀବ୍ର ପ୍ରତିବାଦ କରିଛି।
ଆମେରିକାର ୟୁରୋପୀୟ କମାଣ୍ଡ କହିଛି ଯେ ଫେଡେରାଲ କୋର୍ଟଙ୍କ ଓ୍ୱାରେଣ୍ଟ ବଳରେ ପୂର୍ବରୁ ‘ବେଲା-୧’ ନାମକ ଟ୍ୟାଙ୍କର ‘ମାରିନେରା’କୁ ଜବତ କରାଯାଇଛି। ଆମେରିକା ଅଧିକାରୀଙ୍କ କହିବାନୁଯାୟୀ, ଏହା ଭେନେଜୁଏଲାର ତେଲ ଚାଲାଣ କରୁଥିବା ଏକ କଟକଣା-ଭଙ୍ଗକାରୀ ନେଟୱର୍କର ଅଂଶ ଥିଲା।
ଟ୍ୟାଙ୍କରଟି ଆଟଲାଣ୍ଟିକ ଅତିକ୍ରମ କରି ନାମ ଓ ପତାକା ବଦଳାଇବା ସତ୍ତ୍ୱେ ଆମେରିକା ଏହାକୁ ଦୁଇ ସପ୍ତାହ ଧରି ପିଛା କରିଥିଲା। ଏହି ସମୟରେ ରୁଷିଆର ଯୁଦ୍ଧ ଜାହାଜ ଓ ଏକ ବୁଡ଼ାଜାହାଜ ଟ୍ୟାଙ୍କର ନିକଟରେ ଉପସ୍ଥିତ ରହି ଉତ୍ତେଜନାକୁ ବଢ଼ାଇଥିଲେ। ରୁଷା ବୈଦେଶିକ ମନ୍ତ୍ରଣାଳୟ ଏହି କାର୍ଯ୍ୟକୁ ‘ଅସମାନୁପାତିକ’ ଏବଂ ‘ଅନ୍ତର୍ଜାତୀୟ ସାମୁଦ୍ରିକ ଆଇନର ଉଲ୍ଲଙ୍ଘନ’ ବୋଲି କହିଛି।
ଅନ୍ୟପଟେ ବ୍ରିଟେନ ମଧ୍ୟ ଏହି ଅପରେସନରେ ଏରିଆଲ ସର୍ଭେଲାନ୍ସ ସହିତ ସାମରିକ ସହାୟତା ଯୋଗାଇ ଦେଇଥିବା ୟୁକେ ପ୍ରତିରକ୍ଷା ମନ୍ତ୍ରଣାଳୟ ସ୍ପଷ୍ଟ କରିଛି।
ଆମେରିକୀୟ ଅଧିକାରୀମାନେ ଏହା ପରେ କାରିବିଆନରେ ଭେନେଜୁଏଲା ସହ ଜଡ଼ିତ ଆଉ ଏକ ଟ୍ୟାଙ୍କର ‘ସୋଫିଆ’କୁ ଜବତ କରିବା ଦ୍ୱାରା ସାରା ବିଶ୍ୱରେ ତୈଳ କଟକଣାକୁ କଡ଼ାକଡ଼ି କରାଯିବାର ସଙ୍କେତ ଦେଇଛନ୍ତି।
ଏହି ଘଟଣା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିଶ୍ୱବ୍ୟାପୀ ତୈଳ କଟକଣାକୁ କାର୍ଯ୍ୟକାରୀ କରିବାର ଆକ୍ରମକ ନୀତି ଏବଂ ଭେନେଜୁଏଲା ନେତା ନିକୋଲାସ୍ ମାଦୁରୋଙ୍କୁ ଆମେରିକୀୟ ସେନା ଦ୍ୱାରା ଗିରଫ କରାଯିବା ପରେ ଆସିଛି, ଯାହା ଉଭୟ ଦେଶ ମଧ୍ୟରେ ସିଧାସଳଖ ସଂଘର୍ଷର ଭୟ ସୃଷ୍ଟି କରିଛି।
