ଓ୍ବାଶିଂଟନ,୨୩।୮: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ଦାବି କରିଛନ୍ତି ଯେ ସେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧବିରତି ଆଣିଛନ୍ତି। ହ୍ବାଇଟ ହାଉସର ଓଭାଲ ଅଫିସରେ ‘Right About Everything’ ଲେଖାଥିବା ଏକ ଟୋପି ପିନ୍ଧି ଟ୍ରମ୍ପ କହିଛନ୍ତି ଯେ ସେ ଭାରତ ଏବଂ ପାକିସ୍ତାନ ମଧ୍ୟରେ ସମ୍ଭାବ୍ୟ ପରମାଣୁ ଯୁଦ୍ଧକୁ ରୋକିଛନ୍ତି। ଟ୍ରମ୍ପ ତାଙ୍କ ବିବୃତ୍ତିରେ ଜୋର ଦେଇ କହିଛନ୍ତି ଯେ ସେହି ସମୟରେ ପରିସ୍ଥିତି ଅତ୍ୟନ୍ତ ବିପଜ୍ଜନକ ହୋଇଯାଇଥିଲା ଏବଂ ଉଭୟ ଦେଶ ଏକ ବଡ଼ ପରମାଣୁ ସଂଘର୍ଷ ଆଡକୁ ମୁହାଁଇଥିଲେ, କିନ୍ତୁ ତାଙ୍କ ହସ୍ତକ୍ଷେପ ପରିସ୍ଥିତିକୁ ନିୟନ୍ତ୍ରଣକୁ ଆଣିଥିଲା।
ଭାରତ ବାରମ୍ବାର ଟ୍ରମ୍ପଙ୍କ ଦାବିକୁ ପ୍ରତ୍ୟାଖ୍ୟାନ କରିଛି। ନୂଆଦିଲ୍ଲୀ କହିଛି ଯେ ଯୁଦ୍ଧବିରତି କୌଣସି ତୃତୀୟ ଦେଶର ମଧ୍ୟସ୍ଥତା ଦ୍ୱାରା ନୁହେଁ, ବରଂ ଭାରତ ଏବଂ ପାକିସ୍ତାନ ସେନାର ଡିଜିଏମଓ କିମ୍ବା ସାମରିକ ଅଭିଯାନର ମହାନିର୍ଦ୍ଦେଶକଙ୍କ ମଧ୍ୟରେ ସିଧାସଳଖ ଆଲୋଚନା ଦ୍ୱାରା ସ୍ଥିର କରାଯାଇଥିଲା। ଭାରତ ଏହା ମଧ୍ୟ ସ୍ପଷ୍ଟ କରିଛି ଯେ ଅପରେଶନ ସିନ୍ଦୂରରେ ପ୍ରଚୁର କ୍ଷତି ସହିବା ପରେ ହିଁ ପାକିସ୍ତାନକୁ ଯୁଦ୍ଧବିରତିରେ ରାଜି ହେବାକୁ ପଡିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂସଦରେ କହିଥିଲେ ଯେ ଅପରେଶନ ସିନ୍ଦୂର ବନ୍ଦ କରିବାର ନିଷ୍ପତ୍ତି ସମ୍ପୂର୍ଣ୍ଣ ଭାବରେ ଭାରତର ଥିଲା ଏବଂ ଏଥିରେ କୌଣସି ବିଦେଶୀ ନେତାଙ୍କର କୌଣସି ଭୂମିକା ନାହିଁ। ଟ୍ରମ୍ପ ମେ ୧୦ ତାରିଖରେ ସୋସିଆଲ ମିଡିଆରେ ପ୍ରଥମ ଥର ପାଇଁ ଲେଖିଥିଲେ ଯେ ୱାଶିଂଟନ ଭାରତ ଏବଂ ପାକିସ୍ତାନ ମଧ୍ୟରେ ‘ସମ୍ପୂର୍ଣ୍ଣ ଏବଂ ତୁରନ୍ତ’ ଅସ୍ତ୍ରବିରତି ଆଣିଛି। ସେ ଦାବି କରିଥିଲେ ଯେ ଏଥିପାଇଁ ସାରା ରାତି ଆଲୋଚନା ଚାଲିଥିଲା। ସେବେଠାରୁ, ଟ୍ରମ୍ପ ସାର୍ବଜନୀନ ଭାବରେ ୪୦ ରୁ ଅଧିକ ଥର ଦୋହରାଇଛନ୍ତି ଯେ ସେ ଦୁଇ ଦେଶ ମଧ୍ୟରେ ଉତ୍ତେଜନା ହ୍ରାସ କରିଛନ୍ତି ଏବଂ ଏକ ପରମାଣୁ ଯୁଦ୍ଧକୁ ରୋକିଛନ୍ତି।
