ନୂଆଦିଲ୍ଲୀ,୨୧।୯
ଭାରତରେ ନୂଆ କାର୍ଡ ଜାରି କରିବା ନେଇ ମାଷ୍ଟରକାର୍ଡ ଉପରେ ରିଜର୍ଭ ବ୍ୟାଙ୍କ ଜୁଲାଇରେ କଟକଣା ଲଗାଇଛି। ଏଭଳି ପଦକ୍ଷେପକୁ ଅତ୍ୟନ୍ତ କଠୋର ବୋଲି ଆମେରିକାର ଜଣେ ବାଣିଜି୍ୟକ ପ୍ରତିନିଧି ସମାଲୋଚନା କରିଛନ୍ତି। ଏଭଳି କାର୍ଯ୍ୟାନୁଷ୍ଠାନ ଦ୍ୱାରା ଅନେକ ଲୋକଙ୍କୁ ହଇରାଣ ହେବାକୁ ପଡ଼ିଛି ବୋଲି ଅଧିକାରୀ କହିଛନ୍ତି। ଏ ନେଇ ଏକ ଇ-ମେଲ୍ ରଏଟର୍ସର ହସ୍ତଗତ ହୋଇଥିବା ବେଳେ ଏହାକୁ ନେଇ ସେଠାକାର ସରକାର ଉଦ୍ବେଗ ପ୍ରକାଶ କରିଛନ୍ତି। ଏପ୍ରିଲରେ ଭାରତର କେନ୍ଦ୍ରୀୟ ବ୍ୟାଙ୍କ ପ୍ରଥମେ ଆମେରିକା ଏକ୍ସପ୍ରେସ ଏବଂ ଡିନର୍ସ କ୍ଲବ ଇଣ୍ଟରନ୍ୟାଶନାଲ ଉପରେ କାର୍ଡ ଜାରି କରିବା ଉପରେ ନିଷେଧାଦେଶ ଜାରି କରିଥିଲା। ଏହା ପରେ ପରେ ମାଷ୍ଟରକାର୍ଡ ଉପରେ ସମାନ କଟକଣା ଲାଗୁ ହୋଇଥିଲା। ଏହି କମ୍ପାନୀଗୁଡିକ ସ୍ଥାନୀୟ ଡାଟା ଷ୍ଟୋରେଜ ଆଇନ ଉଲ୍ଲଂଘନ କରିଥିବା ରିଜର୍ଭ ବ୍ୟାଙ୍କ ଅଭିଯୋଗ କରିଛି। ଏ ନେଇ ଆର୍ବିଆଇ ସହ ଆଲୋଚନା କରିବା ପ୍ରସଙ୍ଗ ମଧ୍ୟ ଇ-ମେଲ୍ରୁ ସ୍ପଷ୍ଟ ହୋଇଛି। ଭାରତ ଗତ କିଛିଦିନ ହେବ ଅତ୍ୟନ୍ତ କଠୋର ପଦକ୍ଷେପ ଗ୍ରହଣ କରିଥିବା ଅଂଶୀଦାରମାନେ ଅଭିଯୋଗ ଆଣିଛନ୍ତି ବୋଲି ଦକ୍ଷିଣ ଏବଂ କେନ୍ଦ୍ର ଏସିଆ ଲାଗି ଡେପୁଟି ଆସିଷ୍ଟାଣ୍ଟ ୟୁଏସ୍ ଟ୍ରେଡ୍ ରିପ୍ରେଜେଣ୍ଟେଟିଭ ବ୍ରେଣ୍ଡାନ ଏ ଲିଞ୍ଚ ଇ-ମେଲ୍ରେ କହିଥିଲେ। ମାତ୍ର ଆମେରିକା ସରକାରଙ୍କ ପକ୍ଷରୁ ଏ ନେଇ କିଛି ସ୍ପଷ୍ଟୀକରଣ ମିଳିପାରିନାହିଁ।
