ଓ୍ବାଶିଂଟନ,୨୭।୫ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତା ମାସରେ ଆମେରିକା ଗସ୍ତ କରିବାକୁ ଯାଉଛନ୍ତି। ଏହି ସମୟରେ, ଆମେରିକାର କଂଗ୍ରେସ କମିଟି ରାଷ୍ଟ୍ରପତି ଜୋ ବାଇଡେନ ସରକାରଙ୍କୁ ଭାରତକୁ ନାଟୋ ପ୍ଲସର ଏକ ଅଂଶ କରିବାକୁ ସୁପାରିଶ କରିଛି। କମିଟି କହିଛି ଭାରତ ଅନ୍ତର୍ଭୁକ୍ତ ହେବା ଦ୍ୱାରା ନାଟୋ ପ୍ଲସ ମଜବୁତ ହେବ। ନାଟୋ ପ୍ଲସ ହେଉଛି ଏକ ସୁରକ୍ଷା ବ୍ୟବସ୍ଥା ଯାହା ବିଶ୍ୱ ପ୍ରତିରକ୍ଷା ସହଯୋଗକୁ ପ୍ରୋତ୍ସାହିତ କରିବା ପାଇଁ ପରିକଳ୍ପିତ। ଏହା ୫ଟି ଦେଶ ମଧ୍ୟରେ ଏକ ସହଯୋଗ। ସେହି ଦେଶଗୁଡ଼ିକ ହେଉଛି ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ଜାପାନ, ଇସ୍ରାଏଲ ଏବଂ ଦକ୍ଷିଣ କୋରିଆ ।
କୁହାଯାଉଛି ଯଦି ନାଟୋ ପ୍ଲସର ଷଷ୍ଠ ସହଯୋଗୀ ଭାବେ ଭାରତକୁ ସାମିଲ କରାଯାଏ, ତେବେ ଏହି ଦେଶଗୁଡ଼ିକ ମଧ୍ୟରେ ଗୁପ୍ତଚର ତଥ୍ୟ ବାଣ୍ଟିବାରେ ସୁବିଧା ହେବ। ଏଥିସହ ଯଦି ଭାରତ ନାଟୋ ପ୍ଲସରେ ଅନ୍ତର୍ଭୂକ୍ତ ହୁଏ, ତେବେ ପ୍ରତିରକ୍ଷା ଏବଂ ସୁରକ୍ଷା ପାଇଁ ଦେଶ ଆମେରିକା ସହ ସହଜରେ ଯୋଡି ହୋଇପାରିବ।
ଚେୟାରମ୍ୟାନ ମାଇକ ଗାଲାଗେର୍ ଏବଂ ର଼୍ୟାଙ୍କିଙ୍ଗ ସଦସ୍ୟ ରାଜା କୃଷ୍ଣମୂର୍ତ୍ତିଙ୍କ ନେତୃତ୍ୱରେ ଆମେରିକା ଏବଂ ଚାଇନା କମ୍ୟୁନିଷ୍ଟ ପାର୍ଟି (ସିସିପି) ମଧ୍ୟରେ ଚାଲିଥିବା ଷ୍ଟ୍ରାଟେଜିକ ପ୍ରତିଯୋଗିତା ଉପରେ ଗୃହ ଚୟନ କମିଟି ନାଟୋକୁ ଆହୁରି ଦ୍ୟଢ଼ କରିବା ପାଇଁ ତାଇୱାନର ଦକ୍ଷତା ବୃଦ୍ଧି କରିବାକୁ ଚେଷ୍ଟା କରୁଛି। ଚାଇନା କମ୍ୟୁନିଷ୍ଟ ପାର୍ଟି ସହିତ ରଣନୀତିକ ପ୍ରତିଯୋଗିତା ଜିତିବା ଏବଂ ତାଇୱାନର ସୁରକ୍ଷା ସୁନିଶ୍ଚିତ କରିବା ପାଇଁ ଆମେରିକା ଭାରତ ସହିତ ସମ୍ପର୍କକୁ ମଜବୁତ କରିବା ଆବଶ୍ୟକ ବୋଲି ହାଉସ ସିଲେକ୍ଟ କମିଟି ସୁପାରିଶ କରିଛି।
କମିଟି କହିଛି ଯେ ଯଦି ଭାରତକୁ ନାଟୋ ପ୍ଲସର ଏକ ଅଂଶ କରାଯାଏ, ତେବେ ଭାରତ-ପ୍ରଶାନ୍ତ ମହାସାଗରରେ ଚାଇନା ଆକ୍ରୋଶକୁ ରୋକିବା ପାଇଁ ଆମେରିକା ଏବଂ ଭାରତ ମଧ୍ୟରେ ଘନିଷ୍ଠ ଭାଗିଦାରୀ ବୃଦ୍ଧି ପାଇବ। ରିପବ୍ଲିକାନ ନେତୃତ୍ୱର ପଦକ୍ଷେପ ପରେ ଚୟନ କମିଟିର ଲୋକପ୍ରିୟତା ବୃଦ୍ଧି ପାଇଛି। ଏବେ ଏହାକୁ ଚାଇନା କମିଟି କୁହାଯାଉଛି।
ଗତ ୬ ବର୍ଷ ଧରି ଏହି ପ୍ରସ୍ତାବ ଉପରେ କାର୍ଯ୍ୟ କରୁଥିବା ଭାରତୀୟ-ଆମେରିକୀୟ ରମେଶ କପୁର ଆଶା ପ୍ରକଟ କରିଛନ୍ତି ଏହି ସୁପାରିଶ ଜାତୀୟ ପ୍ରତିରକ୍ଷା ପ୍ରାଧିକରଣ ଅଧିନିୟମ ୨୦୨୪ ରେ ସ୍ଥାନ ପାଇବ ଏବଂ ଶେଷରେ ଦେଶର ଆଇନରେ ପରିଣତ ହେବ। କମିଟିରେ ଏହି ପ୍ରସ୍ତାବ ଉପରେ ଆଲୋଚନା ବିକାଶର ଏକ ପଦକ୍ଷେପ ବୋଲି ସେ କହିଛନ୍ତି।
ଚାଇନା କମିଟି ଏହାର ସୁପାରିଶରେ କହିଛି ଯଦି ତାଇୱାନ ଉପରେ ଆକ୍ରମଣ ହୁଏ ତେବେ ଚାଇନା ବିରୋଧରେ ଅର୍ଥନୈତିକ ପ୍ରତିବନ୍ଧକ ଅଧିକ ପ୍ରଭାବଶାଳୀ ହେବ। ଯଦି ଜି -୭, ନାଟୋ, ନାଟୋ ପ୍ଲସ ଏବଂ କ୍ୱାଡ ସଦସ୍ୟମାନେ ଏକଜୁଟ ହୁଅନ୍ତି ତେବେ ଏହା ସମ୍ଭବ ହୋଇ ପାରିବ। ଯଦି ଏହି ସମସ୍ତ ସହଯୋଗୀ ମିଳିତ ପ୍ରତିକ୍ରିୟା ପାଇଁ ବୁଝାମଣା କରନ୍ତି, ତେବେ ଚାଇନେ ଦୁର୍ବଳ ହେବାର ଆଶଙ୍କା ରହିଛି।
