ନୂଆଦିଲ୍ଲୀ,୯।୧୨:ଗତ କିଛି ବର୍ଷ ମଧ୍ୟରେ ୟୁନିଫାଏଡ୍ ପେମେଣ୍ଟସ ଇଣ୍ଟରଫେସ୍ (ୟୁପିଆଇ)ର ଚାହିଦା ଆଶାତୀତ ଭାବେ ବୃଦ୍ଧି ପାଇଛି। ବିଶେଷ କରି ସହରାଞ୍ଚଳରୁ ଆରମ୍ଭକରି ଗ୍ରାମାଞ୍ଚଳ ପର୍ଯ୍ୟନ୍ତ ସବୁ ସ୍ତର ଓ ବର୍ଗର ଲୋକେ ୟୁପିଆଇ ଦ୍ୱାରା କାରବାର କରିବାକୁ ପସନ୍ଦ କରୁଛନ୍ତି। କାରଣ ବର୍ତ୍ତମାନ ସମୟରେ ଡିଜିଟାଲ କାରବାରକୁ ସରକାର ମଧ୍ୟ ପ୍ରୋତ୍ସାହିତ କରୁଛନ୍ତି। ଏପରିକି ୨୦୧୬ରୁ ଆରମ୍ଭ ହୋଇଥିବା ଏହି ସେବା ଦେଶ ଓ ବିଦେଶର ପ୍ରାୟ ୫୮ ଟି ଆର୍ଥିକ ସଂସ୍ଥା (ବ୍ୟାଙ୍କ) ସହ ଜଡ଼ିତ ରହିଛି। ବିଶେଷକରି ଖୁଚୁରା ବ୍ୟବସାୟରେ ଏହାର ବ୍ୟବହାର ଅଧିକ ହେଉଥିବା ଜଣାପଡ଼ିଛି। ସେହିଭଳି ଚଳିତ ଆର୍ଥିକ ବର୍ଷର ୩ୟ ତ୍ରୈମାସିକରେ ୨୩.୦୬ ବିଲିୟନ କାରବାର ଜରିଆରେ ମୋଟ ୩୮.୩ ଲକ୍ଷ କୋଟି ଟଙ୍କାର ନେଣଦେଣ କରିଥିବା ଜଣାପଡ଼ିଛି। ଚଳିତ ବର୍ଷ ନଭେମ୍ବର ଶେଷ ସୁଦ୍ଧା ୭,୩୦୯.୪୫ ମିଲିୟନ ଲୋକ ୧୧,୯୦,୫୯୩.୩୯ କୋଟି ଟଙ୍କାର କାରବାର କରିଥିବା ସୂଚନା ମିଳିଛି। ଅପରପକ୍ଷରେ କେନ୍ଦ୍ର ସରକାରଙ୍କ ମଧ୍ୟ ଡିଜିଟାଲ କାରବାର ଓ ଇ ମୁଦ୍ରାକୁ ଗୁରୁତ୍ୱ ଦେଉଥିବାରୁ ଗତ ମାସରେ ୟୁପିଆଇର କାରବାରକୁ ସରଳୀକରଣ କରିବା ସହିତ ଅନ୍ୟାନ୍ୟ ସେବା ଓ ସୁବିଧା ସଂଯୋଗ କରିବାକୁ ଯୋଜନା କରୁଥିବା ଜଣାପଡ଼ିଛି। ସେହିପରି ଠକେଇ ଓ ଚୋରିରୁ ମୁକ୍ତି ପାଇବା ପାଇଁ ସବୁ ବର୍ଗର ବ୍ୟବସାୟୀ ଓ ଲୋକମାନେ ମଧ୍ୟ ୟୁପିଆଇର ବ୍ୟବହାରକୁ ଗୁରୁତ୍ୱ ଦେଉଛନ୍ତି। ଏପରିକି ପ୍ରତି ମାସ ଏହାର ବ୍ୟବହାରକାରୀଙ୍କ ସଂଖ୍ୟା ମଧ୍ୟ ବୃଦ୍ଧିି ପାଉଥିବା ଜଣାପଡ଼ିଛି। ଉଲ୍ଲେଖଯୋଗ୍ୟ, ନ୍ୟାଶନାଲ ପେମେଣ୍ଟ୍ କର୍ପୋରେଶନ ଅଫ୍ ଇଣ୍ଡିଆ (ଏନ୍ପିସିଆଇ) ଅଧୀନରେ ୟୁନିଫାଏଡ୍ ପେମେଣ୍ଟସ ଇଣ୍ଟରଫେସ (ୟୁପିଆଇ) ପରିଚାଳିତ ହେଉଛି।
ସୂଚନାଯୋଗ୍ୟ, ନିକଟରେ ରିଜର୍ଭ ବ୍ୟାଙ୍କ ପକ୍ଷରୁ ୟୁପିଆଇରେ ସିଙ୍ଗଲ-ବ୍ଲକ୍ ଏବଂ ଏକାଧିକ ଡେବିଟ୍ ବ୍ୟବସ୍ଥାର ମଧ୍ୟ ଶୁଭାରମ୍ଭ କରାଯାଇଛି। ୟୁପିଆଇର ଉକ୍ତ ସୁବିଧା ବ୍ୟବହାରକାରୀମାନଙ୍କୁ ଯୋଗାଇଦେବା ଲାଗି ଏନ୍ପିସିଆଇକୁ ରିଜର୍ଭ ବ୍ୟାଙ୍କ କହିଥିବା ସୂଚନା ମିଳିଛି। ଏପରିକି ଉକ୍ତ ସୁବିଧା ଆରମ୍ଭ ହେବା ପରେ ୟୁପିଆଇ ଜରିଆରେ ଇ-କମର୍ସ କମ୍ପାନୀଙ୍କୁ ପେମେଣ୍ଟ୍, ଷ୍ଟକ ବଜାରରେ ନିବେଶ, ହୋଟେଲ ବୁକିଂ ଲାଗି ପେମେଣ୍ଟ କରିବା ଆହୁରି ସହଜ ହୋଇପାରିବ ବୋଲି ବଜାର ବିଶେଷଜ୍ଞମାନେ ମତପ୍ରକାଶ କରିଛନ୍ତି। ଫଳରେ ଉକ୍ତ ବ୍ୟବସ୍ଥା ଜରିଆରେ ଗ୍ରାହକ ଠିକ୍ ସମୟରେ ପେମେଣ୍ଟ୍ କରିପାରିବେ।
