ରଣପୁର,୧୭।୪: ନୟାଗଡ଼ ଜିଲା ରଣପୁର ବ୍ଲକର ପାଟପୁର ଗାଁ। ମ୍ରିୟମାଣ ହୋଇ ପଡିଛନ୍ତି ଗାଁ ଲୋକେ l ଗାଁରେ ଖେଳିଗଲା ଶୋକାକୁଳ ପରିବେଶ l ରାଷ୍ଟ୍ରୀୟ ମର୍ଯ୍ୟାଦା ସହ ଶେଷ ହୋଇଛି ୨୬ ବର୍ଷୀୟ ବିଏସଫ ଯବାନ ମନୋରଞ୍ଜନ ପ୍ରଧାନ ଓରଫ ମଣ୍ଟୁଙ୍କର ଶେଷକୃତ୍ୟ । ଛାତ୍ର ଜୀବନରୁ ଦେଶର ସେବା କରିବା ପାଇଁ ପଣ କରିଥିଲେ ମଣ୍ଟୁ l ଗତ ୪ ବର୍ଷ ହେବ ଦେଶ ମାତୃତ୍ୱର ସେବା ପାଇଁ ଭାରତୀୟ ସେନାରେ ଯୋଗଦେଇ ପଞ୍ଜାବରେ କାର୍ଯ୍ୟରତ ଥିଲେ l ମଣ୍ଟୁ ଜଣେ ସରଳ ମିଷ୍ଟଭାଷୀ ଭାବେ ବେଶ ପରିଚିତ ଥିଲେ l ୨୫ରେ ହେବାକୁ ଥିବା ଜେଜେ ବାପାଙ୍କ ବର୍ଷିକିଆ ପାଇଁ ଗାଁକୁ ଗତ ୧୪ ତାରିଖ ସନ୍ଧ୍ୟାରେ ଛୁଟିରେ ଆସିଥିଲେ। ଗତ ୧୫ ତାରିଖ ସକାଳେ ପୋଖରୀକୁ ଡ୍ରେସ ସଫା କରିବା ପାଇଁ ଯାଇ ପଡି ଯାଇଥିଲେ। ତାଙ୍କୁ ଗୁରୁତର ଅବସ୍ଥାରେ ସୁନଖଳା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରା ଯାଇଥିଲା। ଅବସ୍ଥାରେ ଉନ୍ନତି ନ ଆସିବାରୁ ଖୋର୍ଦ୍ଧା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। ପରେ ଭୁବନେଶ୍ୱର ବେସରକାରୀ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା। ଡାକ୍ତର ୧୬ ତାରିଖରେ ମୃତ ଘୋଷଣା କରିଥଲେ । କ୍ୟାପିଟାଲ ହସ୍ପିଟାଲରେ ତାଙ୍କର ବ୍ୟବଛେଦ କରାଯିବା ପରେ ପାଟପୁର ଗାଁରେ ପହଞ୍ଚିିଥିଲା ମରଶରୀର l ମଣ୍ଟୁଙ୍କ ଶେଷ ଦର୍ଶନ ପାଇଁ ସ୍ଥାନୀୟ ଅଞ୍ଚଳରେ ବୁଧବାର ଶୋକାକୁଳ ପରିବେଶ ସୃଷ୍ଟି ହୋଇଥିଲା l ଜଟଣୀ ସେନା ବାହିନୀ କ୍ୟାମ୍ପ ପକ୍ଷରୁ ରାଷ୍ଟ୍ରୀୟ ମର୍ଯ୍ୟାଦା ସହ ଶେଷ କୃତ୍ୟ ବୁଧବାର ସମ୍ପନ୍ନ ହୋଇଛି l ମଣ୍ଟୁଙ୍କ ଶେଷ ଦର୍ଶନ ପାଇଁ ସ୍ଥାନୀୟ ଅଞ୍ଚଳରେ ଭିଡ଼ ଜମାଇଥିଲେ ଲୋକେ l ମଣ୍ଟୁ ଭାଇ ଅମର ରହେ ନାରା ପ୍ରକମ୍ପିତ ହୋଇଥିଲା ଗାଁ l
