ଅନୁଗୋଳ ଅଫିସ୍, ୮।୭
ଦୀର୍ଘ ୧୮ ମାସ ହେଲା ଦରମା ପାଇ ନ ଥିବା ଅନୁଗୋଳ ଆଞ୍ଚଳିକ ପରିବହନ କାର୍ଯ୍ୟାଳୟ (ଆର୍ଟିଓ)ର କର୍ମଚାରୀ ଦିଗାମ୍ବର ନାଏକ ମଙ୍ଗଳବାର ଅଫିସ ପରିସରରେ ଆତ୍ମହତ୍ୟା ଉଦ୍ୟମ କରିବା ଚର୍ଚ୍ଚାର ବିଷୟ ହୋଇଛି। ଅତିରିକ୍ତ ଆର୍ଟିଓ ବିନୟ ପାଲ ଏବଂ ଅନ୍ୟ କର୍ମଚାରୀମାନେ ତାଙ୍କୁ ବୁଝାଶୁଝା କରି ସେଥିରୁ ନିବୃତ୍ତ କରାଇଥିଲେ।
ଦିଗାମ୍ବର କହିଛନ୍ତି, ଅନୁଗୋଳ ଆରଟିଓ କାର୍ଯ୍ୟାଳୟରେ ୧୨ ଜଣ ଠିକା ଓ ୪ ଜଣ ଆଉଟସୋର୍ସିଂ କର୍ମଚାରୀ କାର୍ଯ୍ୟରତ ଅଛନ୍ତି। କିନ୍ତୁ ସେମାନଙ୍କୁ ଦୀର୍ଘମାସ ହେଲା ଦରମା ମିଳିନାହିଁ। ଏ ନେଇ ବାରମ୍ବାର ଆରଟିଓଙ୍କ ସହ ଅନ୍ୟ ଅଧିକାରୀଙ୍କୁ ଅଭିଯୋଗ କରାଯାଇଥିଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି। ପରିବାର ପ୍ରତିପୋଷଣ କରିପାରୁ ନ ଥିବାରୁ ଆତ୍ମହତ୍ୟା କରିବାକୁ ସେ ନିଷ୍ପତ୍ତି ନେଇଥିଲେ। କାର୍ଯ୍ୟାଳୟ ପରିସରରେ ଥିବା ଏକ ଗଛରେ ନିଜ ଶାର୍ଟରେ ଫାଶ ଲଗାଇବାକୁ ଉଦ୍ୟମ କରିଥିଲେ। ଏହି ସମୟରେ ଅତିରିକ୍ତ ଆରଟିଓ ଏବଂ ଅନ୍ୟ କର୍ମଚାରୀମାନେ ବୁଝାଶୁଝା କରିଥିବା ଦିଗାମ୍ବର ପ୍ରକାଶ କରିଛନ୍ତି। ଆରଟିଓ ଜିତେନ୍ଦ୍ର କୁମାର ଭୋଇ କହିଛନ୍ତି, କୋଭିଡ୍ ପାଇଁ ମୁଖ୍ୟ କାର୍ଯ୍ୟାଳୟରୁ ଟଙ୍କା ଆସିପାରୁନାହିଁ। ତେଣୁ କର୍ମଚାରୀଙ୍କୁ ଦରମା ଦିଆଯାଇପାରୁନି। ଏ ନେଇ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି। ଟଙ୍କା ଆସିବା ପରେ ଦରମା ପ୍ରଦାନ କରାଯିବ।
