ନୂଆଦିଲ୍ଲୀ : ଦେଶ ମଧ୍ୟରେ ଅଣ ସଙ୍ଗଠିତ କ୍ଷେତ୍ରରେ କାର୍ଯ୍ୟରତ ପ୍ରାୟ ୫୦ କୋଟି ଶ୍ରମିକଙ୍କୁ ଶୀଘ୍ର ସାମାଜିକ ସୁରକ୍ଷା ମିଳିବ। କେନ୍ଦ୍ର ଶ୍ରମମନ୍ତ୍ରୀ ସନ୍ତୋଷ ଗଙ୍ଗଓ୍ବାର ଶ୍ରମ କୋଡର ୩ ବିଲ୍କୁ ଲୋକ ସଭାରେ ଶନିବାର ଉପସ୍ଥାପନ କରିଛନ୍ତି। ଏହା ମଧ୍ୟରେ କୋଡ୍ ଅନ୍ ଇଣ୍ଡଷ୍ଟ୍ରିଆଲ ରିଲେସନ, ସୋସିଆଲ ସିକ୍ୟୁରିଟି କୋଡ୍ ଏବଂ କୋଡ୍ ଅନ୍ ଅକ୍ୟୁପେଶନାଲ ସେଫ୍ଟି , ହେଲ୍ଥ ଆଣ୍ଡ ଓ୍ବାର୍କିଂ କଣ୍ଡିଶନ ସାମିଲ ରହିଛି। ଏହି ଆଇନଗୁଡିକ କାର୍ଯ୍ୟକାରୀ ହେଲେ ଶ୍ରମିକଙ୍କ ଉନ୍ନତୀକରଣ ଦିଗରେ ସହାୟକ ହେବ ବୋଲି ସରକାର ଆଶାବାଦୀ ରହିଛି। ଦେଶ ମଧ୍ୟରେ ଶ୍ରମ ସଂସ୍କାରକୁ ତ୍ୱରାନ୍ବିତ କରିବା ଲାଗି ସରକାର ଏଭଳି ପଦକ୍ଷେପ ନେଇଥିବା ଗଙ୍ଗଓ୍ବାର ବିଲ୍ ଉପସ୍ଥାପନ କରି ଏଭଳି ମତ ରଖିଛନ୍ତି।
ଅଣ ସଙ୍ଗଠିତ କ୍ଷେତ୍ର ଶ୍ରମିକଙ୍କୁ ସାମାଜିକ ସୁରକ୍ଷା ବାବଦ ୩୦୦ ଶ୍ରମିକ ଯାଏ କାର୍ଯ୍ୟ କରୁଥିବା ଫାର୍ମଗୁଡିକ ସରକାରଙ୍କ ବିନା ଅନୁମତିରେ କର୍ମଚାରୀଙ୍କୁ ଛଟେଇ, ଆନ୍ତଃରାଜ୍ୟ ଶ୍ରମିକଙ୍କ ସମସ୍ୟା ସମ୍ପର୍କରେ ଅଧ୍ୟୟନ, ସାରା ଦେଶରେ ନୂ୍ୟନତମ ମଜୁରି, ରାଷ୍ଟ୍ରୀୟ ଫ୍ଲୋର ଲେବଲ୍ ମଜୁରି, ନୂ୍ୟନତମ ମଜୁରି ନିର୍ଦ୍ଧାରଣ ଲାଗି ପରିଷଦ ଗଠନ ଭଳି ପ୍ରସଙ୍ଗ ବିଲ୍ରେ ଗୁରୁତ୍ୱ ଲାଭ କରିଛି। ସେହିଭଳି କୌଶଳ ଏବଂ ଭୌଗୋଳିକ ସ୍ଥିତି ଅନୁସାରେ ମଜୁରି ପ୍ରଦାନ, ୧୫ ହଜାର ଟଙ୍କାର ନୂ୍ୟନତମ ବେତନ ପ୍ରଦାନର ସମ୍ଭାବନା ମଧ୍ୟ ଏଥିରେ ସାମିଲ ରହିଛି। ଏ ନେଇ ଚୂଡାନ୍ତ ନିଷ୍ପତ୍ତି କମିଟି ନେବ ବୋଲି ଜଣାପଡିଛି। ଅପରପକ୍ଷରେ ଠିକ୍ ସମୟରେ ବେତନ ପ୍ରଦାନ ନେଇ ନିୟମ ପ୍ରଣୟନ, ପୁରୁଷ ଏବଂ ମହିଳା କର୍ମଚାରୀଙ୍କୁ ବେତନରେ ତାରତମ୍ୟ ନ କରିବା ଭଳି ବିଭିନ୍ନ ପ୍ରସଙ୍ଗ ବିଲ୍ରେ ସ୍ଥାନିତ ହୋଇଛି। କେନ୍ଦ୍ର ସରକାର ୪୪ ଶ୍ରମ ଆଇନରେ ପରିବର୍ତ୍ତନ ଆଣିବା ସହ ଏହାକୁ ୪ଟି ଶ୍ରମ କୋଡ୍ରେ ରୂପାନ୍ତରିତ କରିଛନ୍ତି। ସେହିଭଳି ୧୨ ଆଇନକୁ ରଦ୍ଦ କରାଯିବା ସହ ପୁରୁଣା ୪୪ ଆଇନ ମଧ୍ୟରୁ ୩ ଆଇନକୁ ନୂଆ କୋଡ୍ରେ ସାମିଲ କରାଯାଇଛି। ମୋଟାମୋଟି ଭାବେ କହିବାକୁ ଗଲେ ୨୯ ଆଇନ ବଦଳରେ ୪ ଶ୍ରମ କୋଡ୍ କାର୍ଯ୍ୟ କରିବ ବୋଲି ସୂଚନା ରହିଛି।
