ବାରିପଦା,୧୭।୭: (ନୀଳାଦ୍ରି ବିହାରୀ ଦଣ୍ଡପାଟ): ବାରିପଦା ସହର ଉପକଣ୍ଠ ଦେଇ ଯାଇଥିବା ୧୮ନଂ. ଜାତୀୟ ରାଜପଥର ପାଲବଣିଠାରେ ସୋମବାର ରାତିରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଏକ ଟ୍ରକ୍ ସମ୍ପର୍କୀୟ କକା ଓ ପୁତୁରାଙ୍କ ଉପରେ ମାଡ଼ିଯିବାରୁ ଦୁହିଁଙ୍କ ମୃତ୍ୟୁ ଘଟିଛି। ମୃତକ ହେଲେ ସଦର ଥାନା ଅଧୀନ ଶିରିଶବଣି ଗ୍ରାମର ସୁନ୍ଦର ମୋହନ ମୁର୍ମୁ(୪୨) ଓ ବ୍ରଜମୋହନ ହାଁସଦା(୪୨)।
ସୂଚନାଯୋଗ୍ୟ, ଏକ ବ୍ୟାଟେରିଚାଳିତ ସ୍କୁଟିରେ ଦୁହେଁ ଘରକୁ ଫେରୁଥିଲେ। ବାରିପଦା ସହରକୁ ପ୍ରବେଶ ପଥ ପାଲବଣିଠାରେ ଓଭରବ୍ରିଜ୍ରୁ ମାଲବୋଝେଇ ଟ୍ରକ୍ଟି ଓହ୍ଲାଉଥିବା ସମୟରେ ସ୍କୁଟିକୁ ସମ୍ମୁଖରୁ ଧକ୍କାଦେଇଥିଲା। ଟ୍ରକ୍ଟି ଗତି ନିୟନ୍ତ୍ରଣ କରି ନ ପାରି ଉଭୟଙ୍କ ଉପରେ ଚଢ଼ିଯାଇଥିଲା। ଚାପିହୋଇ ଦୁହିଁଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ଟାଉନ ଥାନା ପୋଲିସ ପହଞ୍ଚତ୍ ମୃତଦେହ ଜବତକରି ପିଆର୍ଏମ୍ ମେଡିକାଲକୁ ବ୍ୟବଚ୍ଛେଦ ପାଇଁ ପଠାଇବା ସହ ଏକ ମାମଲା ରୁଜୁକରି ତଦନ୍ତ ଜାରି ରଖିଛି। ତେବେ ସେହି ସ୍ଥାନରେ ରାସ୍ତା ବାଙ୍କ ସହିତ ଗଡ଼ାଣି ରହିଥିବାରୁ ଚଳପ୍ରଚଳ କରୁଥିବା ଯାନଗୁଡ଼ିକର ଗତି ବୃଦ୍ଧି ପାଇଥାଏ। ସେହି ସ୍ଥାନରେ ବିଦେଶୀ ମଦ ଦୋକାନ ଥିବାରୁ ରାସ୍ତା କଡ଼ରେ ଟ୍ରକ୍ ଓ ଚାରିଚକିଆ ଯାନ ଅଟକି ରହିଥାଏ। ଭିଡ଼ ମଧ୍ୟରେ ୨ ଚକିଆ ଗାଡ଼ି ଚାଳକ ବିପରୀତ ଦିଗରୁ ଆସୁଥିବା ଯାନବାହନ ଉପରେ ନଜର ରଖିପାରି ନ ଥାନ୍ତି। ବାରମ୍ବାର ଦୁର୍ଘଟଣା ଘଟୁଥିଲେ ମଧ୍ୟ ଏନ୍ଏଚ୍ଆଇ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ପାଲବଣିର ପ୍ରବେଶ ପଥରେ ଗଳାପୋଲ ନିର୍ମାଣ ପାଇଁ ବାରମ୍ବାର ସହରବାସୀ ଦାବି କରି ଆସୁଥିଲେ ମଧ୍ୟ ଏଥିପ୍ରତି କାହାର ଆନ୍ତରିକତା ଦେଖାଯାଉନାହିଁ। ଏଥିପ୍ରତି ଜିଲା ପ୍ରଶାସନ ଓ ରାଜନେତାମାନେ ସ୍ବତନ୍ତ୍ର ଦୃଷ୍ଟିଦେଲେ ଦୁର୍ଘଟଣାକୁ ଏଡ଼ାଯାଇପାରନ୍ତା ବୋଲି ସାଧାରଣରେ ଦାବି ହେଉଛି।
