ଭୁବନେଶ୍ୱର, ୨୭।୬(ବ୍ୟୁରୋ): ନ୍ୟାଶନାଲ ଟେଷ୍ଟିଂ ଏଜେନ୍ସି(ଏନ୍ଟିଏ) ଦ୍ୱାରା ପରିଚାଳିତ ୟୁଜିସି ଏନ୍ଇଟି ପରୀକ୍ଷା ସଂକ୍ରାନ୍ତରେ ରବିବାର ଘୋଷଣା କରାଯାଇଛି। ଡିସେମ୍ବର ୨୦୨୧ରେ ହେବାକୁ ଥିବା ୟୁଜିସି ଏନ୍ଇଟି ପରୀକ୍ଷା ଜୁଲାଇ ୮, ୯, ୧୧ ଓ ୧୨ରେ ଅନୁଷ୍ଠିତ ହେବ। ସେହିଭଳି ଜୁନ୍ ୨୦୨୨ ପରୀକ୍ଷା ଅଗଷ୍ଟ ୧୨, ୧୩ ଓ ୧୪ରେ କରାଯିବ ବୋଲି ଏନ୍ଟିଏ ପକ୍ଷରୁ ସୂଚନା ଦିଆଯାଇଛି। ପରୀକ୍ଷା ସମ୍ପର୍କିତ ପ୍ରତିଟି ଅପଡେଟ୍ ଜାଣିବା ପାଇଁ ପରୀକ୍ଷାର୍ଥୀମାନେ ନିୟମିତ ଏନ୍ଟିଏ ୱେବସାଇଟ୍ www.nta.ac.in କିମ୍ବା ugcnet.nta.nicକୁ ଯାଇ ଯାଞ୍ଚ କରିବାକୁ ପରାମର୍ଶ ଦିଆଯାଇଛି। ଏହାସହ ପରୀକ୍ଷାକୁ ନେଇ କୌଣସି ପ୍ରକାରର ଦ୍ୱନ୍ଦ୍ୱ ଥିଲେ ଛାତ୍ରୀଛାତ୍ରମାନେ ହେଲ୍ପଡେସ୍କ ନଂ.୦୧୧ ୪୦୭୫୯୦୦୦କୁ ଯୋଗାଯୋଗ କରିପାରିବେ। ଏହା ବ୍ୟତୀତ ugcnet@nta.ac.inକୁ ମେଲ୍ ମାଧ୍ୟମରେ ନିଜ ଦ୍ୱନ୍ଦ୍ୱ ବିଷୟରେ ପଚାରି ବୁଝିପାରିବେ। ୟୁଜିସି ଅଧ୍ୟକ୍ଷ ପ୍ରଫେସର ଏମ୍ ଜଗଦୀଶ କୁମାର ଟୁଇଟ୍ କରି ଏହି ସୂଚନା ଦେବା ସହ ପରୀକ୍ଷାର୍ଥୀଙ୍କୁ ପରୀକ୍ଷା ନିମନ୍ତେ ଶୁଭକାମନା ଜଣାଇଛନ୍ତି।
ବର୍ଷକୁ କେବଳ ଦୁଇଥର ହିଁ ୟୁଜିସି ଏନ୍ଇଟି ପରୀକ୍ଷା କରାଯାଏ। କୋଭିଡ୍ ମହାମାରୀକୁ ଦୃଷ୍ଟିରେ ରଖି ଗତ ଡିସେମ୍ବର ୨୦୨୧ରେ ହେବାକୁ ଥିବା ପରୀକ୍ଷାକୁ ସ୍ଥଗିତ ରଖାଯାଇଥିଲା। ସେହିଭଳି ୟୁଜିସି ଏନ୍ଇଟି ୨୦୨୨ ପାଇଁ ଆବେଦନ ସମୟ ସୀମା ମେ’ ୨୦ ତାରିଖ ରହିଥିଲା। ୟୁଜିସି ଏନ୍ଇଟି ଡିସେମ୍ବର ୨୦୨୧ ପାଇଁ ଜୁନ୍ ୨୦୨୨ ପରୀକ୍ଷାରେ ମଧ୍ୟ ବିଳମ୍ବ ହୋଇଛି। ପରୀକ୍ଷା ସୁରୁଖୁରୁରେ କରିବା ଉଦ୍ଦେଶ୍ୟରେ ଉଭୟ ପରୀକ୍ଷାକୁ ଏକ ସମୟରେ କରିବା ପାଇଁ ଏନ୍ଟିଏ ପୂର୍ବରୁ ନିଷ୍ପତ୍ତି ନେଇଥିଲା।
