ଉଦୟପୁର,୨୬।୧୨: ଚଳନ୍ତା ଗାଡ଼ିରେ ଗଣବଳାତ୍କାର। ଲିଫ୍ଟ ଦେଇ ଲୁଟିନେଲେ ଇଜ୍ଜତ। ନିଜ କମ୍ପାନୀର ଆଇଟି ମ୍ୟାନେଜରଙ୍କୁ ବଳାତ୍କାର କଲେ ସିଇଓ। ଏଭଳି ଏକ ଚାଞ୍ଚଲ୍ୟକର ଘଟଣା ଘଟିଛି ରାଜସ୍ଥାନର ଉଦୟପୁର। ଏକ ଘରୋଇ ଆଇଟି କମ୍ପାନୀର ଜଣେ ମ୍ୟାନେଜରଙ୍କୁ ଚଳନ୍ତା କାର୍ରେ ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ନୂଆବର୍ଷ ପାର୍ଟି ପରେ ଘରେ ଛାଡ଼ିଦେବାର ପ୍ରଲୋଭନ ଦେଖାଇ କମ୍ପାନୀର ସିଇଓ, ଜଣେ ମହିଳା କାର୍ଯ୍ୟନିର୍ବାହୀ ମୁଖ୍ୟ ଏବଂ ତାଙ୍କ ସ୍ୱାମୀ ଏହି ଘଟଣା ଘଟାଇଥିବା ପୋଲିସ୍ କହିଛି।
ଡିସେମ୍ବର ୨୦ ତାରିଖରେ ଏକ ଘରୋଇ ହୋଟେଲରେ ଆୟୋଜିତ ପାର୍ଟି ରାତି ପ୍ରାୟ ୧.୩୦ ପର୍ଯ୍ୟନ୍ତ ଚାଲିଥିଲା। ଅନ୍ୟ ଅତିଥିମାନେ ଚାଲିଯିବା ପରେ କମ୍ପାନୀର ସିଇଓ ଜୟେଶ (IIT ପାସ୍ଆଉଟ୍), କାର୍ଯ୍ୟନିର୍ବାହୀ ମୁଖ୍ୟ ଶିଳ୍ପା ଏବଂ ତାଙ୍କ ସ୍ୱାମୀ ଗୌରବ ପୀଡ଼ିତାଙ୍କୁ ଘରେ ଛାଡ଼ିଦେବାକୁ କହିଥିଲେ।
ପୋଲିସ୍ ସୂଚନା ଅନୁଯାୟୀ, ଶିଳ୍ପାଙ୍କ କାରରେ ତିନିଜଣ ଅଭିଯୁକ୍ତ ପୀଡ଼ିତାଙ୍କୁ ନେଇଥିଲେ। ବାଟରେ ସେମାନେ ଏକ ଦୋକାନରୁ ସ୍ମୋକିଂ ସାମଗ୍ରୀ କିଣି ପୀଡ଼ିତାଙ୍କୁ ଦେଇଥିଲେ, ଯାହା ସେବନ କରିବା ପରେ ପୀଡ଼ିତା ଅଚେତ ହୋଇଯାଇଥିଲେ।
ପୀଡ଼ିତା ଆଂଶିକ ଚେତା ଫେରି ପାଇବା ପରେ ସିଇଓ ତାଙ୍କୁ ଦୁର୍ବ୍ୟବହାର କରୁଥିବା ଏବଂ ପରେ ତିନିଜଣ ଯାକ ତାଙ୍କୁ ଯୌନ ଶୋଷଣ କରିଥିବା ଅଭିଯୋଗ କରିଛନ୍ତି। ସକାଳ ପ୍ରାୟ ୫ଟା ବେଳେ ତାଙ୍କୁ ଘରେ ଛାଡ଼ି ଦିଆଯାଇଥିଲା। ପୂର୍ଣ୍ଣ ଚେତା ଫେରିବା ପରେ ତାଙ୍କର କାନଫୁଲ, ମୋଜା ଓ ଅନ୍ତବସ୍ତ୍ର ନଥିବା ଏବଂ ଗୁପ୍ତାଙ୍ଗରେ ଆଘାତ ଥିବା ସେ ଦେଖିବାକୁ ପାଇଥିଲେ।
ପରଦିନ ସକାଳେ ପୀଡ଼ିତା ପୋଲିସରେ ଅଭିଯୋଗ କରିବା ପରେ ପ୍ରାଥମିକ ତଦନ୍ତ ପରେ ସିଇଓ ଜୟେଶ, ଗୌରବ ଓ ତାଙ୍କ ପତ୍ନୀ ଶିଳ୍ପାଙ୍କୁ ଗିରଫ କରାଯାଇଛି।
ଉଦୟପୁର ଏସ୍ପି ଯୋଗେଶ ଗୋୟଲ କହିଛନ୍ତି ଯେ ଡାକ୍ତରୀ ରିପୋର୍ଟରେ ଆଘାତ ଚିହ୍ନ ଥିବା ସ୍ପଷ୍ଟ ହୋଇଛି, ଯାହା ପ୍ରାଥମିକ ଭାବେ ଗଣବଳାତ୍କାରକୁ ସୂଚାଉଛି। କାରରେ ଲାଗିଥିବା ଡ୍ୟାସକ୍ୟାମରୁ ମିଳିଥିବା ଅଡିଓ ଓ ଭିଡିଓ ରେକର୍ଡିଂକୁ ମଧ୍ୟ ପୋଲିସ୍ ଯାଞ୍ଚ କରୁଛି। ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯାଇଛି ଏବଂ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ଜାରି ରହିଛି।
