ମୁମ୍ବାଇ,୩୦।୫: ଏବେବି ମହାରାଷ୍ଟ୍ର ରାଜନୀତି ରହିଛି ବେଶ ସରଗରମ। ଉଦ୍ଧବ ଶିବସେନା ଏମପି ବିନାୟକ ରାଉତ ଏକ ବଡ଼ ଦାବି କରିଛନ୍ତି। ସୋମବାର ସେ କହିଛନ୍ତି ଯେ ୨୨ ଜଣ ବିଧାୟକ ଏବଂ ଶିନ୍ଦେ ଶିବସେନାର ୯ ଜଣ ଏମପି ଦଳ ଛାଡିବାକୁ ପ୍ରସ୍ତୁତ ହେଉଛନ୍ତି। ବିନାୟକ ରାଉତ ଦାବି କରିଛନ୍ତି ଯେ ଶିନ୍ଦେ ଶିବସେନାର ୧୩ ଏମପିଙ୍କ ମଧ୍ୟରୁ ୯ଜଣ ଉଦ୍ଧବ ଠାକରେଙ୍କ ଶିବସେନା ସହିତ ଯୋଗାଯୋଗରେ ଅଛନ୍ତି। ରାଉତ ଏହା ମଧ୍ୟ କହିଛନ୍ତି ଯେ ଶିନ୍ଦେ ଶିବସେନା ସାଂସଦମାନେ ରାଗିଛନ୍ତି କାରଣ ସେମାନଙ୍କର କାର୍ଯ୍ୟ କରାଯାଉ ନାହିଁ ଏବଂ ଏଥିସହ ସେମାନଙ୍କୁ ଅପମାନର ସମ୍ମୁଖୀନ ହେବାକୁ ପଡୁଛି। ବିନାୟକ ରାଉତଙ୍କ ଦାବି ପରେ ଶିନ୍ଦେ ଶିବସେନା ଏମପି ଗଜାନନ କୀର୍ତ୍ତିକରଙ୍କ ବୟାନ ସାମ୍ନାକୁ ଆସିଛି, ଯେଉଁଥିରେ କୀର୍ତ୍ତିକର କହିଛନ୍ତି ଯେ ଶିନ୍ଦେ ଶିବସେନାକୁ ଭାରତୀୟ ଜନତା ପାର୍ଟି(ଭାଜପା)ଅବହେଳା କରୁଛି ଏବଂ ଏନଡିଏର ଏକ ଅଂଶ ହୋଇଥିଲେ ମଧ୍ୟ ତାଙ୍କୁ ସମ୍ମାନ ମିଳୁନାହିଁ।
