ଘରେ ବସି ରାତାରାତି କୋଟିପତି। ଏହା ଏକ ସ୍ବପ୍ନ ପରି ମନେ ହୋଇପାରେ। କିନ୍ତୁ ସଂଯୁକ୍ତ ଆରବ ଏମିରେଟ୍ସ (UAE) ରେ ରହୁଥିବା ଜଣେ ଭାରତୀୟ ବ୍ୟକ୍ତିଙ୍କ ପାଇଁ, ଏହି ସ୍ବପ୍ନ ବାସ୍ତବତାରେ ପରିଣତ ହୋଇଛି। ଏହି ଭାରତୀୟ ବଂଶୋଦ୍ଭବ ବ୍ୟକ୍ତି ଅନିଲ କୁମାର ବୋଲାଙ୍କ ଭାଗ୍ୟ ରାତାରାତି ଏପରି ପରିବର୍ତ୍ତନ ଆଣିଛି ଯେ, ସେ କେବଳ କୋଟିପତି ନୁହଁନ୍ତି, ବରଂ ଆଖି ପିଛୁଳାକେ ଅରବପତି ହୋଇଗଲେ।
ଆବୁଧାବିର ଦୀର୍ଘଦିନ ଧରି ରହୁଥିବା ୨୯ ବର୍ଷୀୟ ଅନିଲକୁମାର ବୋଲା UAEର ଲକି ଡେ ଡ୍ର ଲଟେରୀରେ ୧୦୦ ମିଲିୟନ ଦିରହମ (ପ୍ରାୟ ୨୪୦ କୋଟି) ର ଏକ ଐତିହାସିକ ଜ୍ୟାକପଟ ଜିତିଥିଲେ। ଏହାକୁ UAE ର ସର୍ବବୃହତ ପୁରସ୍କାର ରାଶି କୁହାଯାଏ। ଲଟେରୀ ଆୟୋଜକମାନେ ଅନିଲ କୁମାରଙ୍କୁ ଆନୁଷ୍ଠାନିକ ଭାବରେ ଡ୍ରର ବିଜେତା ଘୋଷଣା କରିଥିଲେ।
ଲକି ଡ୍ର ଅକ୍ଟୋବର ୧୮ ତାରିଖରେ ଅନୁଷ୍ଠିତ ହୋଇଥିଲା। ଅନିଲ କୁମାର UAE ଲଟେରୀ ଟିମ୍ରୁ ଏକ କଲ ପାଇଲାବେଳେ ଘରେ ଆରାମ କରୁଥିଲେ। ପ୍ରାରମ୍ଭରେ ସେ ବିଶ୍ୱାସ କରିପାରି ନ ଥିଲେ ଯେ ସେ ଏତେ ବଡ଼ ପୁରସ୍କାର ଜିତିଛନ୍ତି।
ଅନିଲ କୁମାର ଗଣମାଧ୍ୟମକୁ କହିଥିଲେ, ଯେତେବେଳେ ମୁଁ କଲ ପାଇଲି, ମୁଁ ଭାବିଲି କେହି ମଜା କରୁଛନ୍ତି। ମୁଁ ସେମାନଙ୍କୁ ଖବରଟି ପୁନରାବୃତ୍ତି କରିବାକୁ ଅନେକ ଥର ଅନୁରୋଧ କଲି। ଯେତେବେଳେ ମୁଁ ସତ୍ୟ ଜାଣିଲି, ମୁଁ ଏହାକୁ ଶବ୍ଦରେ ବର୍ଣ୍ଣନା କରିପାରିଲି ନାହିଁ। ଏହି ବିଜୟ ମୋର ସ୍ବପ୍ନ ବାହାରେ। ଏହା ବିଶ୍ୱାସ କରିବା ଏବେ ବି କଷ୍ଟକର।
ଅନିଲ କୁମାର ମୂଳତଃ ଭାରତର। ବହୁ ବର୍ଷ ଧରି ଆବୁଧାବିରେ ରହୁଛନ୍ତି ଏବଂ କାମ କରୁଛନ୍ତି। ତାଙ୍କ ଅନୁସାରେ ସେ ପ୍ରାୟତଃ ଲଟେରୀ ଟିକେଟ କିଣିଥିଲେ କିନ୍ତୁ ଏତେ ବଡ଼ ପରିମାଣର ଟଙ୍କା ଜିତିବା କେବେ କଳ୍ପନା କରି ନ ଥିଲେ। ଏହି ଟଙ୍କାକୁ ତାଙ୍କ ପରିବାରର ଭବିଷ୍ୟତ ସୁରକ୍ଷିତ କରିବା ଏବଂ ସମାଜରେ ଅଭାବୀ ଲୋକଙ୍କୁ ସାହାଯ୍ୟ କରିବା ପାଇଁ ବ୍ୟବହାର କରିବାକୁ ଚାହାଁନ୍ତି। ୟୁଏଇରେ ଲଟେରୀ ବ୍ୟବସ୍ଥା ବହୁତ ଲୋକପ୍ରିୟ, ଯେଉଁଠାରେ ପ୍ରତିବର୍ଷ ହଜାର ହଜାର ପ୍ରବାସୀ ସେମାନଙ୍କ ଭାଗ୍ୟ ପରୀକ୍ଷା କରନ୍ତି, କିନ୍ତୁ ଅନିଲ କୁମାରଙ୍କ ବିଜୟ ପୁଣି ଥରେ ପ୍ରମାଣିତ କରିଛି ଯେ, କେତେବେଳେ ଭାଗ୍ୟ ମୁହୂର୍ତ୍ତକରେ ଜୀବନ ବଦଳାଇ ଦିଏ।
Dharitri – Odisha’s No.1 Odia Daily
