ମହାକାଳପଡ଼ା,୨୧ା୧୨(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଜମ୍ବୁ ସାମୁଦ୍ରିକ ଥାନା ପେଟଛେଲା ଗ୍ରାମ ଜଙ୍ଗଲ ଜମି ଧାନ କାଟିବା ନେଇ ଦୁଇ ଗୋଷ୍ଠୀ ମଧ୍ୟରେ ବିବାଦ ଲାଗିଥିଲା। ଏହାକୁ ନେଇ ମହାକାଳପଡ଼ା ତହସିଲଦାର ରବି ନାରାୟଣ ଆଚାର୍ଯ୍ୟଙ୍କ ସମେତ ଜିଲା ପୋଲିସ ଅଧିକାରୀ ଶନିବାର ଘଟଣାସ୍ଥଳରେ ପହଞ୍ଚି ଥିଲେ। ଏହି ଗ୍ରାମର ହାବୁ ନନ୍ଦ ଦୀର୍ଘ ବର୍ଷ ଧରି ଉକ୍ତ ୨୪ ଏକର ଜମି ଦଖଲରେ ଥିଲେ। ଏହାକୁ ଗ୍ରାମର କେତେକ ଚାଷୀ ନନ୍ଦଙ୍କଠାରୁ ଭାଗ ନେଇ ଧାନ ଦେଉଥିଲେ। କିଛି ମାସ ପୂର୍ବେ ହାବୁ ଅଞ୍ଚଳର ଜଣେ ବ୍ୟକ୍ତି ଶିଶିର ରାଉତଙ୍କୁ ଜମି ହସ୍ତାନ୍ତର କରିଥିଲେ। ଚଳିତ ବର୍ଷ ଚାଷୀ ଭାଗ ଚାଷ କରିଥିଲେ। ଚଳିତ ବର୍ଷ ମୋତେ ଧାନ ନ ଦେଇ ଶିଶିର ରାଉତଙ୍କୁ ଦେବା ପାଇଁ ହାବୁ କହିଥିଲେ। ହାବୁଙ୍କ ଦେହ ଅସୁସ୍ଥ ଥିବାରୁ ଘଟଣାସ୍ଥଳକୁ ଆସିବା ସମ୍ଭବ ନୁହେଁ ବୋଲି କୁହାଯାଉଛି।
ଅପର ପକ୍ଷରେ ୨୪ ଏକର ଜମିକୁ ଶନିବାର କେନ୍ଦ୍ରାପଡ଼ା ଉପଜିଲାପାଳଙ୍କ କୋର୍ଟ ଅର୍ଡର ନମ୍ବର ୧୩୮୧୯/୨୦ା୧୨ା୨୫ ତହସିଲଦାର ମହାକାଳପଡ଼ା ଓ ମେମୋ ନମ୍ବର ୧୩୮୨୦/୨୫ ଜିଲାପାଳ କେନ୍ଦ୍ରାପଡାଙ୍କୁ ସ୍ବତନ୍ତ୍ର ପତ୍ର ପ୍ରେରଣ କରାଯାଇଥିବା ଜଣାପଡିଛି। ଏହି ଜମି ଉପରେ ଭାରତୀୟ ନ୍ୟାୟ ସଂହିତା ଧାରା ୧୬୩ ଜାରି କରାଯାଇ ନିଷିଦ୍ଧ କରାଯାଇଥିବା ଡାକବାଜି ଯନ୍ତ୍ର ମାଧ୍ୟମରେ ଘୋଷଣା କରାଯାଇଛି ବୋଲି ତହସିଲଦାର ଆଚାର୍ଯ୍ୟ କହିଛନ୍ତି।
ଏହି ଘଟଣାକୁ ନେଇ ଭାଗଚାଷୀ ଓ କେତେକ ଲୋକ ଅସନ୍ତୋଷ ପ୍ରକାଶ କରିଥିଲେ। ଧାନ ଫସଲ ଦଖଲକୁ ନେଇ ଦୁଇ ଗୋଷ୍ଠୀ ମଧ୍ୟରେ ମୁହଁାମୁହିଁ ଓ ହାତାହାତି ଠେଲା ପେଲା ପରିସ୍ଥିତି ସୃଷ୍ଟି ହୋଇଥିଲା। ଏଥିରେ ଦୁଇ ଜଣ ଆହତ ହୋଇଥିଲେ । ପରେ ପୋଲିସ ପକ୍ଷରୁ ପରିସ୍ଥିତି ନିୟନ୍ତ୍ରଣ ହୋଇଥିଲା। ହେଲେ ଜମିର ଧାନ ଫସଲ ପ୍ରଶାସନ ନିଜ ହେପାଜତକୁ ନେଇ ୨୦ ଚାଷୀଙ୍କ ଘର ଆଗରେ ସ୍ବତନ୍ତ୍ର ନୋଟିସ୍ ଲଟକା ଝୁଲାଇ ଦେଇଥିବା ଦେଖିବାକୁ ମିଳିଛି। ଘଟଣାସ୍ଥଳରେ ତହସିଲ ଅଫିସ କର୍ମଚାରୀ ଜମି ମାପଚୁପ କରୁଥିଲେ। ପରେ କୋର୍ଟଙ୍କ ନିର୍ଦ୍ଦେଶ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପସ୍ଥିତ ଅଧିକାରୀମାନେ କହିଛନ୍ତି। ଅଦ୍ୟାବଧି ଘଟଣାସ୍ଥଳରେ ଦୁଇ ପ୍ଲାଟୁନ ଫୋର୍ସ ମୁତୟନ ଅଛନ୍ତି। ପରିସ୍ଥିତ ନିୟନ୍ତ୍ରଣ ପାଇଁ ମାଜିଷ୍ଟ୍ରେଟଙ୍କ ସମେତ ଅତିରିକ୍ତ ଆରକ୍ଷୀ ଅଧୀକ୍ଷକ ସୁଧାକର ସାହୁ, ଏସ୍ଡିପିଓ ଜ୍ୟୋତିରଞ୍ଜନ ଗୌଡ଼, ଜମ୍ବୁ ସାମୁଦ୍ରିକ ଥାନା ଅଧିକାରୀ ସୌମ୍ୟରଞ୍ଜନ ବିଶ୍ବାଳ, ମହାକାଳପଡ଼ା ଥାନା ଅଧିକାରୀ ରାଜେନ୍ଦ୍ର କୁମାର ମହାପାତ୍ର, ମାର୍ଶାଘାଇ ଥାନା ଅଧିକାରୀ ତପନ କୁମାର ନାୟକ, ଅତିରିକ୍ତ ତହସିଲଦାର ପ୍ରଭଞ୍ଜନ ମିଶ୍ର, ରାଜସ୍ବ ନିରୀକ୍ଷକ ମଞ୍ଜୁଲତା ମାଝୀ, ରାମନଗର ରାଜସ୍ବ ନିରୀକ୍ଷକ ବିଜୟ କୁମାର ବେହେରା ପ୍ରମୁଖ ଘଟଣାସ୍ଥଳରେ ଉପସ୍ଥିତ ଥିଲେ। ଆଇନ ଶୃଙ୍ଖଳା ରକ୍ଷା କରିବା ପାଇଁ ପେଟଛେଲା ବଜାରକୁ ପ୍ରଶାସନ ବନ୍ଦ କରିଛି।
Dharitri – Odisha’s No.1 Odia Daily
