ଓ୍ବାଶିଂଟନ,୨୪।୨: ବିଭିନ୍ନ ଦେଶରୁ ଆମଦାନୀ ସାମଗ୍ରୀ ଉପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଲଗାଇଥିବା ଟାରିଫ୍କୁ ସେଠାର ସୁପ୍ରିମକୋର୍ଟ ଗତ ୨୦ ତାରିଖରେ ବେଆଇନ କହି ରଦ୍ଦ କରିଥିଲେ। ତଦନୁଯାୟୀ ମଙ୍ଗଳବାରଠାରୁ ଆମେରିକାରେ ଉକ୍ତ ଟାରିଫ୍ ଆଦାୟ ବନ୍ଦ ହେବାକୁ ଯାଉଛି। ଉକ୍ତ ବିବାଦୀୟ ଟାରିଫ ବୈଶ୍ୱିକ ଯୋଗାଣ ଶୃଙ୍ଖଳରେ ବାଧା ସୃଷ୍ଟି କରିଥିଲା ଏବଂ ପ୍ରମୁଖ ସହଯୋଗୀଙ୍କ ସହ ବାଣିଜି୍ୟକ ସମ୍ପର୍କକୁ ଖରାପ କରିଥିଲା। ୧୯୭୭ର ଅନ୍ତର୍ଜାତୀୟ ଜରୁରୀ ଆର୍ଥତ୍କ କ୍ଷମତା ଆଇନ (ଆଇଇଇପିଏ) ଅନୁଯାୟୀ କରାଯାଉଥିବା ଟାରିଫ୍ ସଂଗ୍ରହ ଆମେରିକା ସମୟ ମଙ୍ଗଳବାର ୧୨ଟା ୧ ମିନିଟ୍ଠାରୁ ବନ୍ଦ ରହିବ ବୋଲି ଆମେରିକା ବହିଃଶୁଳ୍କ ଓ ସୀମା ସୁରକ୍ଷା ପକ୍ଷରୁ ଏକ ବିବୃତିରେ କୁହାଯାଇଛି।
ଆମଦାନିକାରୀଙ୍କ କାର୍ଗୋ ସିଷ୍ଟମରେ ରହିଥିବା ସମସ୍ତ ଟାରିଫ୍ କୋଡ୍କୁ ଅକାମୀ କରାଯିବ ବୋଲି ସେମାନଙ୍କୁ ଜଣାଇ ଦିଆଯାଇଛି। ସୁପ୍ରିମକୋର୍ଟଙ୍କ ରାୟର ୩ ଦିନ ପରେ ଏହା କାର୍ଯ୍ୟକାରୀ ହେବାକୁ ଯାଉଛି। ତେବେ ପୂର୍ବରୁ ଆଦାୟ ହୋଇଥିବା ଶୁଳ୍କ ଆମଦାନିକାରୀ ଫେରିପାଇବେ କି ନାହିଁ, ସେ ନେଇ ଏଜେନ୍ସି ପକ୍ଷରୁ ସ୍ପଷ୍ଟ କରାଯାଇ ନାହିଁ। କେବଳ ଆଇଇଇପିଏ ଅଧୀନରେ ଲାଗୁ ହୋଇଥିବା ଟାରିଫ୍ ସଂଗ୍ରହ ବନ୍ଦ ରହିବ। ତେବେ ଅନ୍ୟ ସମସ୍ତ ଶୁଳ୍କ ପୂର୍ବଭଳି ସଂଗ୍ରହ କରାଯିବ ବୋଲି କୁହାଯାଇଛି।
