ନୂଆଦିଲ୍ଲୀ,୧୮।୧୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ତାଙ୍କ ବୟାନ ପାଇଁ ଚର୍ଚ୍ଚାରେ ଅଛନ୍ତି। ଦେଶକୁ ସମ୍ବୋଧିତ କରି ସେ କହିଛନ୍ତି, ତାଙ୍କର ନିଷ୍ପତ୍ତି ଏବଂ ନୀତି ବିଶ୍ୱରେ ଅନେକ ବଡ଼ ବିବାଦର ଅନ୍ତ ଘଟାଇଛି। ସେ ମାତ୍ର ଦଶ ମାସରେ ୮ଟି ଯୁଦ୍ଧ ଶେଷ କରିଛନ୍ତି, ଏବଂ ତାଙ୍କ ଶୁଳ୍କ ନୀତି ଏହା ପଛରେ ପ୍ରେରଣାଦାୟକ ଶକ୍ତି ଥିଲା।
୭୯ ବର୍ଷୀୟ ଟ୍ରମ୍ପ କହିଛନ୍ତି, ଶୁଳ୍କ କେବଳ ଆମେରିକାର ଆର୍ଥିକ ଶକ୍ତି ପ୍ରଦର୍ଶନ କରେ ନାହିଁ ବରଂ ବିଶ୍ୱ ଚାପ ସୃଷ୍ଟି କରିବାରେ ମଧ୍ୟ ପ୍ରଭାବଶାଳୀ ପ୍ରମାଣିତ ହୋଇଛି। ‘ଶୁଳ୍କ’ ଶବ୍ଦଟି ତାଙ୍କର ପ୍ରିୟ ଏବଂ ଏହା ତାଙ୍କ ରାଜନୈତିକ କ୍ୟାରିୟରର ଏକ ପ୍ରମୁଖ ପରିଚୟ ପାଲଟିଛି।
ତାଙ୍କ ୨୦୨୬ ଏଜେଣ୍ଡା ଭାଷଣରେ ଟ୍ରମ୍ପ କହିଛନ୍ତି, ସେ ଆମେରିକାର ଶକ୍ତିକୁ ପୁନଃଉଜ୍ଜ୍ୱଳ କରିଛନ୍ତି। ଇରାନର ପରମାଣୁ ବିପଦ ଦୂର ହୋଇଛି, ଗାଜାରେ ସଂଘର୍ଷ ବନ୍ଦ ହୋଇଛି ଏବଂ ସେଠାରେ ଏକ ଦୀର୍ଘ ପ୍ରତୀକ୍ଷିତ ଶାନ୍ତି ପ୍ରତିଷ୍ଠା ହୋଇଛି। ଜୀବିତ କିମ୍ବା ମୃତ ବନ୍ଧକଙ୍କ ମୁକ୍ତି ସୁନିଶ୍ଚିତ ହୋଇଛି। ଏହି ଦାବିଗୁଡ଼ିକ ନୂତନ ଅନ୍ତର୍ଜାତୀୟ ବିତର୍କ ସୃଷ୍ଟି କରିଛି, ଅନେକ ବିଶେଷଜ୍ଞ ଏହାକୁ ଅତିରଞ୍ଜିତ ବୋଲି ବିଚାର କରୁଛନ୍ତି।
ଆମେରିକାରେ ବୃଦ୍ଧି ପାଉଥିବା ମୁଦ୍ରାସ୍ଫୀତି ଏବଂ ଆମଦାନୀ ହୋଇଥିବା ସାମଗ୍ରୀର ମୂଲ୍ୟ ବୃଦ୍ଧି ସତ୍ତ୍ୱେ, ଟ୍ରମ୍ପ ତାଙ୍କ ଭାଷଣରେ ଏହି ପ୍ରସଙ୍ଗଗୁଡ଼ିକୁ ଅଧିକ ଆଲୋଚନା କରି ନ ଥିଲେ। ଶୁଳ୍କ ଆମେରିକା ପାଇଁ ଆଶାଠାରୁ ଅଧିକ ରାଜସ୍ବ ସୃଷ୍ଟି କରିଛି, ଯାହା ଅର୍ଥନୀତିକୁ ଲାଭ ଦେଇଛି। ଶୁଳ୍କ ନୀତି ଦେଶକୁ ଆର୍ଥିକ ଦୃଷ୍ଟିରୁ ମଜଭୁତ କରିଛି। ରିପବ୍ଲିକାନ ପାର୍ଟି ଦ୍ୱାରା ଗୃହୀତ ଟିକସ ହ୍ରାସ ଆମେରିକୀୟ ନାଗରିକ ଏବଂ ବ୍ୟବସାୟଗୁଡ଼ିକୁ ଆଶ୍ୱସ୍ତି ପ୍ରଦାନ କରିଛି।
ଟ୍ରମ୍ଫ ପ୍ରଶାସନ ସମୟରେ, କାନାଡା, ମେକ୍ସିକୋ, ବ୍ରାଜିଲ ଏବଂ ଭାରତ ସମେତ ଅନେକ ଦେଶ ଉପରେ ଶୁଳ୍କ ଲାଗୁ କରାଯାଇଥିଲା। ଏହି ନିଷ୍ପତ୍ତିଗୁଡ଼ିକ ଆମେରିକୀୟ ଶିଳ୍ପଗୁଡ଼ିକୁ ସୁରକ୍ଷା ଦେଇଥିଲା ଏବଂ ନିଯୁକ୍ତି ସୁଯୋଗ ବୃଦ୍ଧି କରିଥିଲା। କିନ୍ତୁ ସମାଲୋଚକମାନେ କହିଛନ୍ତି, ଏହି ନୀତିଗୁଡ଼ିକ ବିଶ୍ୱ ବାଣିଜ୍ୟ ଉତ୍ତେଜନା ବୃଦ୍ଧି କରିଥିଲା ଏବଂ ସାଧାରଣ ଲୋକଙ୍କୁ ମୁଦ୍ରାସ୍ଫୀତିର ବୋଝ ଦେଇଥିଲା।
ଏହି ଦାବି ମଧ୍ୟରେ, ଟ୍ରମ୍ପଙ୍କ ଲୋକପ୍ରିୟତା ବିଷୟରେ ପ୍ରଶ୍ନ ଉଠାଯାଉଛି। ସାମ୍ପ୍ରତିକ ସର୍ଭେରୁ ଜଣାପଡିଛି, ବହୁତ କମ ଆମେରିକୀୟ ତାଙ୍କ ଅର୍ଥନୈତିକ ପରିଚାଳନାରେ ସନ୍ତୁଷ୍ଟ।
Dharitri – Odisha’s No.1 Odia Daily
