ବଲାଙ୍ଗୀର,୮।୧୧(ସୁନିଲ କୁମାର ମହାନ୍ତି): ବଲାଙ୍ଗୀର ଜିଲା ଓକିଲ ସଂଘ ପକ୍ଷରୁ ସ୍ବତନ୍ତ୍ର ପ୍ରତିଭା ସମ୍ମାନ ସମାରୋହ ଶନିବାର ଜିଲା ସିଭିଲ କୋର୍ଟ ବାର ହଲଠାରେ ଅନୁଷ୍ଠିତ ହୋଇଛି। ଜିଲା ଓକିଲ ସଂଘ ସଭାପତି ବାସୁଦେବ ରଥଙ୍କ ସଭାପତିତ୍ୱରେ ଅନୁଷ୍ଠିତ ପ୍ରତିଭା ସମ୍ମାନ ସମାରୋହରେ ମୁଖ୍ୟ ଅତିଥି ଭାବେ ପୂର୍ବତନ ମନ୍ତ୍ରୀ ତଥା ବରିଷ୍ଠ ଆଇନଜ୍ଞ ନରସିଂହ ମିଶ୍ର ଯୋଗଦାନ କରି ବଲାଙ୍ଗୀରର ଗୌରବ ବୃଦ୍ଧି ଦିଗରେ ଯେଉଁ ମାନେ ବିଭିନ୍ନ କ୍ଷେତ୍ରରେ ନିରନ୍ତର ପ୍ରୟାସ କରି ସଫଳତା ହାସଲ କରିଛନ୍ତି ସେମାନଙ୍କୁ ଜିଲା ଓକିଲ ସଂଘ ସମ୍ମାନିତ କରି ଏକ ନୂଆ ଧାରା ଓ ପରମ୍ପରା ସୃଷ୍ଟି କରିଛି ବୋଲି କହିଛନ୍ତି।
ଏହି ଅବସରରେ ସେ ସମସ୍ତ ସମ୍ବର୍ଦ୍ଧିତ ପ୍ରତିଭାଙ୍କୁ ଅଭିନନ୍ଦନ ଜଣାଇଥିଲେ। ଏହି ସମ୍ବର୍ଦ୍ଧନା ସଭାକୁ ବରିଷ୍ଠ ଆଇନଜୀବୀ ଓ ସ୍ତମ୍ଭକାର ଜୟକୃଷ୍ଣ ସାହୁ ସଂଯୋଜନା କରିଥିଲେ। ସଭା ଆରମ୍ଭରେ ସଭାପତି ରଥ ଜିଲା ଓକିଲ ସଂଘର ଏହି ସ୍ବତନ୍ତ୍ର କାର୍ଯ୍ୟକ୍ରମ ବିଷୟରେ ସୂଚନା ଦେଇଥିଲେ।
ସଭାରେ ବର୍ଷିୟାନ ସାହିତି୍ୟକ ପଦ୍ମଶ୍ରୀ ଶ୍ରୀନିବାସ ଉଦ୍ଗାତା, ସମାଜସେବିକା ଡା. ଜ୍ୟୋତ୍ସ୍ନାମୟୀ ମହାପାତ୍ର, ସମାଜସେବୀ ବିକ୍ରମାନନ୍ଦ ବହିଦାର, ନାଟ୍ୟଭୂଷଣ ଜଗଦାନନ୍ଦ ଛୁରିଆ, ସଂସ୍କୃତି ଗବେଷକ ଗୁରୁଶ୍ରୀ ଘାସିରାମ ମିଶ୍ର, କବି ପ୍ରହଲ୍ଲାଦ ଶତପଥି, ବିଶିଷ୍ଟ କଣ୍ଠଶିଳ୍ପୀ ବିଥିକା ଚାଟାର୍ଜୀ, ଆନ୍ତର୍ଜାତିକ ଖ୍ୟାତିସମ୍ପନ୍ନ ଆଥଲେଟ ଆନନ୍ଦିନୀ ଦର୍ଜୀ, ନାଟ୍ୟକାର ଅଜୟ କୁମାର ମହାନ୍ତି, ଗଣମାଧ୍ୟମ ପ୍ରତିନିଧି ସୁଧୀର ମିଶ୍ର, ଅଖିଳ ଚନ୍ଦ୍ର ହୋତା ଓ ବୀରେନ୍ଦ୍ର କୁମାର ଝାଙ୍କର, ଜୀବଜନ୍ତୁ ପ୍ରେମୀ ଶୈଳେନ୍ଦ୍ର ନାରାୟଣ ଶତ୍ପଥୀ, ଓଡ଼ିଶୀ ନୃତ୍ୟାଙ୍ଗନା ତୃଷା ଠାକୁର, ଶ୍ରେୟାଂସୀ ସାହୁ, ସାହିତି୍ୟକ ଦେବେନ୍ଦ୍ର ନାଏକ, ଆଇନଜୀବୀ ଅଶୋକ ରଥଙ୍କୁ ମୁଖ୍ୟ ଅତିଥି ମିଶ୍ର ସମ୍ବର୍ଦ୍ଧିତ କରିଥିଲେ । ଶେଷରେ ଓକିଲ ସଂଘ ସମ୍ପାଦକ ସଞ୍ଜୟ ବଗର୍ତ୍ତି ଧନ୍ୟବାଦ ଦେଇଥିଲେ। ଏହି କାର୍ଯ୍ୟକ୍ରମରେ ଓକିଲ ସଂଘର ବରିଷ୍ଠ ଆଇନଜୀବୀ, ସହରର ବୁଦ୍ଧିଜୀବୀ ଉପସ୍ଥିତ ଥିଲେ।
