ଦେଓଗାଁ,୨୯ା୩(କୃଷ୍ଣ ପ୍ରସାଦ ପାଣିଗ୍ରାହୀ): ବଲାଙ୍ଗୀର ଜିଲା ଦେଓଗାଁ ବ୍ଲକ ଅନ୍ତର୍ଗତ ଭୂତିଆରବାହାଲ ଛକରୁ ଦେଷଣ୍ଡ ଭାୟା ଟିକ୍ରାପଡା ପୂର୍ତ୍ତ ବିଭାଗ ରାସ୍ତାର ଉଭୟ ପାର୍ଶ୍ୱରେ ରହିଥିବା ବହୁ ପୁରାତନ ଗଛକୁ ରାସ୍ତା ପ୍ରଶସ୍ତିକରଣ ନାଁରେ କାଟି ଦିଆଯାଉଥିବା ଦେଖିବାକୁ ମିଳିଛି। ଗତ ୧୫ ଦିନ ହେଲା ଗଛକଟା ଚାଲିଛି। ଫଳରେ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଉକ୍ତ ରାସ୍ତା ପାର୍ଶ୍ୱରେ ମହୁଲ, ଜାମୁକୋଳି, ଆମ୍ବ, ଚାର, ନିମ୍ବ ସମେତ ଅନ୍ୟାନ୍ୟ ମୂଲ୍ୟବାଦ ଗଛ ଅନେକ ବର୍ଷ ହେଲା ରହିଛି। ନିକଟବର୍ତ୍ତୀ ଗାଁର ଲୋକେ ଏହି ଗଛଗୁଡିକ ଉପରେ ନିର୍ଭର କରି ପୋଟ ପୋଷି ଆସୁଥିଲେ। ଏଣୁ ଉକ୍ତ ଅଞ୍ଚଳର ଅନେକ ପରିବାର ଏବେ ଜୀବନ ଜୀବିକା ହରାଇବା ଚିନ୍ତାରେ ଥିବା ବେଳେ ସେହି ଅଞ୍ଚଳରେ ତାପମାତ୍ରା ବୃଦ୍ଧି ପାଇବ ବୋଲି ମତପ୍ରକାଶ ପାଇଛି। ମୁଖ୍ୟତଃ ପଥିକ ମାନେ ଗ୍ରୀଷ୍ମ ଋତୁରେ ଗଛର ଛାଇରେ ବିଶ୍ରାମ ନେବା ସହ ପରିବେଶ ସନ୍ତୁଳନ ରହୁଥିଲା। ବର୍ତ୍ତମାନ ଜଙ୍ଗଲ କ୍ଷୟ ସହ ଜଳବାୟୁରେ ବିରାଟ ପରିବର୍ତ୍ତନ ଆସିଛି। ଏବେ ଜଳବାୟୁ ପରିବର୍ତ୍ତନ ମାନବ ସମାଜ ପାଇଁ ମୁଖ୍ୟସଙ୍କଟ ଭାବେ ଉଭା ହେଲାଣି। ଏଣୁ ବିଭିନ୍ନ ସଂଗଠନ ସମେତ ସରକାର ମଧ୍ୟ ନୂତନ ବନୀକରଣ ଦିଗରେ ବିପୁଳ ପରିମାଣର ଅର୍ଥ ବ୍ୟୟ କରି ଚାଲିଛନ୍ତି। ହେଲେ ବାସ୍ତବ କ୍ଷେତ୍ରରେ ସରକାରୀ ତଥ୍ୟ ଓ ପ୍ରକୃତ ବନୀକରଣ ମଧ୍ୟରେ ଅନେକ ତଫାତ ପରିଲକ୍ଷିତ ହେଉଛି। କାଗଜକଲମରେ ଶହ ଶହ ହେକ୍ଟର ଜମିରେ ବନୀକରଣ ହୋଇଥିବା ଦର୍ଶାଯାଉଥିବା ବେଳେ ପ୍ରକୃତରେ ତାହା ହୋଇ ନ ଥିବାରୁ ଜଙ୍ଗଲ ବୃଦ୍ଧି ହେଉନାହିଁ। ଅନ୍ୟପକ୍ଷରେ ରାସ୍ତା ପ୍ରଶସ୍ତିକରଣ, କଳକାରଖାନା ସ୍ଥାପନ ତଥା ଅନ୍ୟାନ୍ୟ ସରକାରୀ, ବେସରକାରୀ ସଂସ୍ଥାର ସ୍ବାର୍ଥକୁ ପ୍ରାଧାନ୍ୟ ଦେଇ ବହୁ ପୁରାତନ ଗଛ ଗୁଡିକୁ କାଟିଦେବା ପାଇଁ ବନବିଭାଗ ଅନୁମତି ଦେଉଛି। ଏ ସମ୍ପର୍କରେ ପୂର୍ତ୍ତ ବିଭାଗର ଏସଡିଓ ସାଲହା ଟୁଡୁଙ୍କୁ ପଚାରିବାରେ ଆମ ବିଭାଗର ଡିଭିଜନ ୧ ତରଫରୁ ଓ ବନ ବିଭାଗକୁ ଅନୁମତି ମାଗିଲା ପରେ ଓଏଫଡିସି ଗଛ କାଟୁଛି ବୋଲି କହିଥିଲେ। ତେବେ ଲୋକଙ୍କ ଅନିଚ୍ଛା ସତ୍ତ୍ୱେ ଗଛଗୁଡିକ କାଟି ଦିଆଯାଉଥିବାରୁ ସାଧାରଣରେ ତୀବ୍ର ଅସନ୍ତୋଷ ଦେଖାଦେଇଛି।
