ଓଡ଼ିଶା ଆଡଭର୍ଟାଇଜିଂ ମାର୍କେଟରେ ୨୦୦୧ରୁ ‘ଏକ୍ସପୋଜ୍’ ଆଡଭର୍ଟାଇଜିଂ ପ୍ରମୁଖ ଭୂମିକା ଗ୍ରହଣ କରିଆସିଛି। ଏପରିକି ୪ଜଣ କର୍ମଚାରୀଙ୍କୁ ନେଇ ଆରମ୍ଭ ହୋଇଥିବା ଉକ୍ତ ଏଜେନ୍ସି ବର୍ତ୍ତମାନ ୩୫ରେ ପହଞ୍ଚତ୍ଛି। ସେହିଭଳି ସାରା ଓଡ଼ିଶାରେ ସଂସ୍ଥାର ଦୃଢ଼ ଉପସ୍ଥିତି ରହିଥିବା ଜଣାପଡ଼ିଛି। ବିଶେଷକରି ଗୁଣାତ୍ମକ ସେବା ଓ ସମୟାନୁବର୍ତ୍ତିତା ଯୋଗୁ ଏକ୍ସପୋଜ ଆଡଭର୍ଟାଇଜିଂ କେବଳ ଓଡ଼ିଶା ନୁହେଁ ବରଂ ପଡ଼ୋଶୀ ଝାଡ଼ଖଣ୍ଡ ଏବଂ ପଶ୍ଚିମବଙ୍ଗ ଭଳି ରାଜ୍ୟରେ ମଧ୍ୟ ସଂସ୍ଥା ବ୍ୟବସାୟ ଚଳାଇଛି। ବିଶେଷକରି ବ୍ୟବସାୟରେ ସ୍ବଚ୍ଛତା ରଖିଲେ ଗ୍ରାହକଙ୍କ ବିଶ୍ୱାସ ବଢ଼ିବ ଏବଂ ଆପଣଙ୍କ ବ୍ୟବସାୟ ଆଗକୁ ବଢ଼ିବ। କମ୍ ଦିନରେ ଅନେକ ସଫଳତା ପାଇଥିବା ଏକ୍ସପୋଜ୍ ଆଡଭର୍ଟାଇଜିଂ ମୁଖ୍ୟ ସଞ୍ଜୀବ ମହାନ୍ତିଙ୍କ ସହ ଧରିତ୍ରୀର ସ୍ବତନ୍ତ୍ର ଆଲୋଚନା…
୧- ପ୍ର. ସଂସ୍ଥାର ବ୍ୟବସାୟିକ ଯାତ୍ରା କିଭଳି ରହିଛି?
ଉ- ଦୀର୍ଘ ୨ଦଶନ୍ଧିର ବ୍ୟବସାୟିକ ଯାତ୍ରା ବେଶ୍ ରୋମାଞ୍ଚ ଓ ଘଟଣାବହୁଳ ରହିଛି, ଏପରିକି ଆମେ ବହୁ ଘାତପ୍ରତିଘାତ ସହ ସଫଳତା ଏବଂ ବିଫଳତା ପରିସ୍ଥିତି ଦେଇ ଗତି କରିଛୁ। ତେବେ ସବୁ ପ୍ରକାର ପରିସ୍ଥିତିକୁ ଆମେ ବେଶ୍ ଉପଭୋଗ କରିଛୁ।
୨- ପ୍ର. ବ୍ୟବସାୟରେ ସାମ୍ନା କରିଥିବା ବଡ଼ ଉପଲବ୍ଧି କ’ଣ?
ଉ- ବ୍ୟବସାୟରେ ଅନେକ ପ୍ରକାର ଉପଲବ୍ଧ ମିଳିଥାଏ। ବିଶେଷକରି ଯଦି ଆପଣ କାମରେ ଗୁଣବତ୍ତା ରକ୍ଷା କରିବା ସହ ଠିକ୍ ସମୟରେ ଗ୍ରାହକଙ୍କୁ ତାହା ଯୋଗାଇଦେଇ ପାରିବେ, ତେବେ ତାହା ଆପଣଙ୍କ ପାଇଁ ସବୁଠୁ ବଡ଼ ଉପଲବ୍ଧି ହୋଇଥାଏ। କାରଣ ଏଭଳି ବ୍ୟବସାୟରେ ଗ୍ରାହକମାନେ ସର୍ବଦା କ୍ୱାଲିଟି ଏବଂ ଟାଇମିଂକୁ ଅଧିକ ଗୁରୁତ୍ୱ ଦେଇଥାନ୍ତି। ଅପରପକ୍ଷରେ ପାଣ୍ଠି ପରିଚଳନା ବା ଫଣ୍ଡ ମ୍ୟାନେଜମେଣ୍ଟ ବର୍ତ୍ତମାନ ସବୁଠୁ ବଡ଼ ଡିସ୍ ଆଡଭାଣ୍ଟେଜ ହୋଇଯାଇଛି। କାରଣ କୋଭିଡ୍ ପରଠାରୁ ପେମେଣ୍ଟ ଆସିବା ଏକ ପ୍ରକାର ବନ୍ଦ ହୋଇଯାଇଛି, ଯେଉଁଥିପାଇଁ ଆମେ ଆମର ଭେଣ୍ଡର ଏବଂ ମିଡିଆ ହାଉସକୁ ପେମେଣ୍ଟ ଦେବା ପାଇଁ ଦେଇଥିବା ପ୍ରତିଶ୍ରୁତି ରକ୍ଷା କରିବାରେ ବିଫଳ ହେଉଛୁ।
୩- ପ୍ର. କମ୍ପାନୀର ସ୍ବତନ୍ତ୍ର ବ୍ୟବସାୟିକ ଉଦ୍ଦେଶ୍ୟ(ୟୁଏସ୍ପି) କ’ଣ ରହିଛି? ଆଉ ବ୍ୟବସାୟକୁ ଆଗକୁ ବଢ଼ାଇବାରେ କ’ଣ ଯୋଜନା କରିଛନ୍ତି?
ଉ- ଆଡଭର୍ଟାଇଜିଂ ବ୍ୟବସାୟରେ ଗ୍ରାହକଙ୍କ ସହ ସ୍ବଚ୍ଛତା ବଜାୟ ରଖିବା ଜରୁରୀ ହୋଇଥାଏ। ଏପରିକି ଅଧିକ ଟଙ୍କା ଦାବି ନ କରି ଉଚିତ ଦାମ ଲଗାଇବା ସହ ଠିକ୍ ସମୟରେ କ୍ୱାଲଟି ସେବା ଯୋଗାଇବା। ଆମର ମାନବ ସମ୍ବଳକୁ ଠିକ୍ ଭାବେ ବ୍ୟବହାରକରି ସଂଗଠିତ ଭାବେ କାର୍ଯ୍ୟ କରିବା ଉପରେ ବେଶ୍ ଗୁରୁତ୍ୱ ଦେଉଛୁ। ଆଗାମୀ ଦିନରେ ଅନେକ ପଦକ୍ଷେପ ଗ୍ରହଣ କରିବାକୁ ଯାଉଛି। ସେଥିପାଇଁ ଆବଶ୍ୟକ କାର୍ଯ୍ୟ କରାଯାଉଛି।
୪- ପ୍ର. ଓଡ଼ିଶା ଆଡଭର୍ଟାଇଜିଂ ମାର୍କେଟିଂ ଆଗକୁ ବଢ଼ିବ ବୋଲି ଭାବୁଛନ୍ତି କି ?
ଉ- ବର୍ତ୍ତମାନ ଆମେ ଏକ ଖରାପ ସମୟ ଦେଇ ଗତି କରୁଛୁ। କାରଣ ଆଗ ଅପେକ୍ଷା କାମ ଦିନକୁ ଦିନ କମିବାରେ ଲାଗିଛି। ଏପରିକି କୋଭିଡ୍ ଆଡଭର୍ଟାଇଜିଂ ବ୍ୟବସାୟ ଶିଳ୍ପକୁ ଗୁରୁତର ଭାବେ କ୍ଷତି ପହଞ୍ଚାଇଛି। ଆଗାମୀ ଦିନରେ ଯଦି ଭଲ ବ୍ୟବସାୟ ବାତାବରଣ ସୃଷ୍ଟି ହେବ ତା’ ହେଲେ ବ୍ୟବସାୟ ଭଲ ହେବ ବୋଲି ଆଶା କରୁଛୁ।
୫- ପ୍ର. ଆଡଭର୍ଟାଇଜିଂ ମାର୍କେଟିଂରେ ପ୍ରବେଶ କରୁଥିବା ନବାଗତଙ୍କ ପାଇଁ କ’ଣ ସନ୍ଦେଶ ରହିବ?
ଉ- ବ୍ୟବସାୟ ଯାହା ବି କର କଠିନ ପରିଶ୍ରମ ନିହାତି ଜରୁରୀ। ବିଶେଷକରି ଗ୍ରାହକଙ୍କୁ ମିଥ୍ୟା ପ୍ରତିଶ୍ରୁତି ଦିଆ ନ ଯିବା ଆବଶ୍ୟକ। ଏପରିକି ଗୁଣାତ୍ମକ ସେବା ଓ ବିଶ୍ୱାସଭାଜନ ବେଶ୍ ଗୁରୁତ୍ୱ ବହନ କରିଥାଏ। ଏଭଳି କିଛି ପଦକ୍ଷେପକୁ ଠିକ୍ ଭାବେ ଆପଣାଇଲେ ଆପଣ ଜଣେ ସଫଳ ବ୍ୟବସାୟୀ ହୋଇପାରିବେ।
୬- ପ୍ର. ଅବସର ସମୟରେ କ’ଣ କରିବକୁ ଭଲପାନ୍ତି ?
ଉ -ବର୍ତ୍ତମାନର ପ୍ରତିଯୋଗିତାମୂଳକ ବ୍ୟବସାୟରେ ବ୍ୟବସାୟୀଙ୍କ ପାଇଁ ଅବସରର ସଂଜ୍ଞା ପରିବର୍ତ୍ତନ ହୋଇଯାଇଛି। ତଥାପି ବ୍ୟସ୍ତବହୁଳ ସମୟ ମଧ୍ୟରୁ କିଛି ସମୟ ବାହାର କରିବାକୁ ପଡ଼ିଥାଏ। କାରଣ ବ୍ୟବସାୟ ପରେ ମଧ୍ୟ ସାମାଜିକ ଜୀବନ ଓ ପରିବାରର ଦାୟିତ୍ୱ ମୁଣ୍ଡ ଉପରେ ଥାଏ। ସେଥିପାଇଁ ଯେଉଁ କିଛି ସମୟ କଷ୍ଟରେ ମିଳିଥାଏ ତା’ର ସଦୁପଯୋଗ ପାଇଁ ସର୍ବଦା ଚେଷ୍ଟା କରିଥାଏ। ଏପରିକି ପରିବାରକୁ ସମୟ ଦେବା ସହ ସାଙ୍ଗସାଥୀ ଓ ପରିଜନଙ୍କୁ ମଧ୍ୟ ସ୍ବତନ୍ତ୍ର ସମୟରେ ସମୟ ଦେଇଥାଏ। ବିଶେଷକରି ଯେହେତୁ ବିଜ୍ଞାପନଭିତ୍ତିକ ବ୍ୟବସାୟରେ ରହିଛି, ସେଥିପାଇଁ ଅଧିକ ସମୟ ପରିଭ୍ରମଣ କରିବାର ଅଭ୍ୟାସ ମଧ୍ୟ ରହିଛି। ବର୍ଷର ବିଶେଷ ସମୟରେ ବାହାରକୁ ଯିବା ଓ ବିଭିନ୍ନ ସାମାଜିକ କାର୍ଯ୍ୟରେ ଜଡିତ ହେବାକୁ ଭଲଲାଗେ। ଘରେ ଥିଲେ ସଂଗୀତ ଶୁଣିବା ଓ ପରିବାର ସହ ହସଖୁସିର ସାଥୀ ହୋଇଥାଏ।
