ଦିଗପହଣ୍ଡି,୨୧।୪(ଅଶେଷ ନାଥ ମିଶ୍ର)ଗଞ୍ଜାମ ଜିଲା ଦିଗପହଣ୍ଡି ବ୍ଳକ ଫାସିଗୁଡା ଗ୍ରାମର ବୁଲୁ ବିଷୋୟୀଙ୍କ ଘରୁ ଗତ ୧୨ ତାରିଖ ସକାଳେ କୋଟିନଡା ଗ୍ରାମର ଟ୍ରାନ୍ସଜେଣ୍ଡର ଅଜିତ ବିଷୋୟୀ ଓରଫ ଅର୍ଚ୍ଚିତାଙ୍କ ଝୁଲନ୍ତା ମୃତଦେହ ପୋଲିସ ଉଦ୍ଧାର କରିଥିଲେ। ଖବରପାଇ କିନ୍ନର ସଂଘ ରାଜ୍ୟ କାର୍ଯ୍ୟକର୍ତ୍ତା ସ୍ବିଟି କୁମାରୀଙ୍କ ସହ ବହୁ ସଂଖ୍ୟକ ଟ୍ରାନ୍ସଜେଣ୍ଡର ଦିଗପହଣ୍ଡି ଥାନାରେ ପହଞ୍ଚି ଆଇଆଇସି ପ୍ରଶାନ୍ତ କୁମାର ପାତ୍ରଙ୍କ ସହ ସବିଶେଷ ଆଲୋଚନା କରିଥିଲେ। ମୃତ୍ୟୁର ପ୍ରକୃତ ତଥ୍ୟ ଉନ୍ମୋଚନ ପାଇଁ ସେମାନେ ଦାବି କରି ଫେରିଥିଲେ। ବ୍ୟବଚ୍ଛେଦ ରିପୋର୍ଟ ମିଳିବା ପରେ ଅଜିତ ଆତ୍ମହତ୍ୟା କରିଥିବା ସ୍ପଷ୍ଟ ହୋଇଥିଲା। ତାଙ୍କର ଜଣେ ପୁରୁଷ ବନ୍ଧୁ ଟ୍ରାନ୍ସଜେଣ୍ଡର ଅଜିତଙ୍କୁ ମାନସିକ ଯନ୍ତ୍ରଣା ଓ ମାରପିଟ କରିବାରୁ ସେ ମାନସିକ ଭାରସାମ୍ୟ ହରାଇ ଆତ୍ମହତ୍ୟା କରିଥିବା ପୋଲିସର ତଦନ୍ତରୁ ଜଣାପଡିଥିଲା।
ଏହି ଘଟଣାରେ ଦିଗପହଣ୍ଡି ପୋଲିସ ଦିଗପହଣ୍ଡି- ଚିକିଟି ରୋଡର କାଳିଆ ନଗରରେ ରହୁଥିବା ଅଜିତଙ୍କ ପୁରୁଷ ବନ୍ଧୁ ଉମେଶ ମହାଙ୍କୁଡ ଓରଫ ବବୁଲଙ୍କୁ ଗିରଫ କରି ଗତ ବୁଧବାର କୋର୍ଟ ଚାଲାଣ କରିଥିଲେ। ଥାନା ମାମଲା ନଂ.୧୪୧/୨୫ ଅନୁଯାୟୀ ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଥିଲା। ଅଜିତଙ୍କ ଠାରୁ ୫ ଲକ୍ଷ ଟଙ୍କା ଓ ବାଇକ ନେଇଯାଇଥିବା ବବୁଲ ଏବଂ ତାଙ୍କ ପରିବାରଙ୍କ ନିକଟରୁ ଟଙ୍କା ଆଦାୟ କରି ଅଜିତଙ୍କ ପରିବାର ଲୋକଙ୍କୁ ଦିଆଯିବା ଏବଂ କ୍ଷତିପୂରଣ ଦାବିରେ କିନ୍ନର ସଂଘର ବହୁ ସଂଖ୍ୟକ ସଦସ୍ୟ ଏବଂ କୋଟିନଡ଼ା ଗ୍ରାମର କିଛି ବ୍ୟକ୍ତି ଉକ୍ତ ଦିନ ସନ୍ଧ୍ୟାରେ ଦିଗପହଣ୍ଡି ଥାନା ଘେରାଉ କରିଥିଲେ।
ପୋଲିସ ଗିରଫ ଅଭିଯୁକ୍ତଙ୍କୁ ଅତିତରବରିଆ ଭାବେ କୋର୍ଟ ଚାଲାଣ କରିବାର କାରଣ ନେଇ ସେମାନେ ପୋଲିସ ଠାରୁ ଉତ୍ତର ଚାହିଁଥିଲେ। ଖବର ପାଇ ଚିକିଟି ଏସଡିପିଓ ବିଶ୍ୱାମିତ୍ର ହରପାଲ ଅଧିକ ସଂଖ୍ୟକ ଫୋର୍ସ ନେଇ ଦିଗପହଣ୍ଡି ଥାନାରେ ପହଞ୍ଚି ବୁଝାସୁଝା କରିବା ପରେ ସେମାନେ ଫେରିଥିଲେ। ଅଧିକ ଜେରା ପାଇଁ ପୋଲିସ ଅଭିଯୁକ୍ତ
ବବୁଲଙ୍କୁ ଗୋଟିଏ ଦିନ ରିମାଣ୍ଡରେ ଆଣିବା ପାଇଁ ଦିଗପହଣ୍ଡି କୋର୍ଟରେ ଆବେଦନ କରିଥିଲେ। ସୋମବାର ବବୁଲଙ୍କୁ ଦିଗପହଣ୍ଡି ସବ ଜେଲରୁ ରିମାଣ୍ଡରେ ଆଣି ପୋଲିସ ମାରାଥନ ଜେରା କରିବା ପରେ କୋର୍ଟରେ ହାଜର କରିଥିଲେ। ମାଜିଷ୍ଟ୍ରେଟଙ୍କ ନିର୍ଦ୍ଦେଶକ୍ରମେ ଅଭିଯୁକ୍ତଙ୍କୁ ପୁଣି ସବଜେଲ ହାଜତକୁ ପଠାଇ ଦିଆଯାଇଛି।
ଖବର ପାଇ ବ୍ରହ୍ମପୁର ଟ୍ରାନ୍ସଜେଣ୍ଡର ସଂଘର ବହୁ ସଂଖ୍ୟକ କାର୍ଯ୍ୟକର୍ତ୍ତା, ବହୁ ସଂଖ୍ୟକ ସଦସ୍ୟ ବୃନ୍ଦ ଏବଂ କୋଟିନଡ଼ା ଗ୍ରାମର କିଛି ବ୍ୟକ୍ତି ସୋମବାର ଅପରାହ୍ନରେ ଦିଗପହଣ୍ଡି ଥାନାରେ ପହଞ୍ଚି ସେଠାରେ ଉପସ୍ଥିତ ଥିବା ଅଭିଯୁକ୍ତଙ୍କ ବାପା ଭାଇଙ୍କୁ କ୍ଷତିପୂରଣ ମାଗିଥିଲେ।ସେମାନେ ଅକ୍ଷମତା ପ୍ରକାଶ କରିବାରୁ ଟ୍ରାନ୍ସଜେଣ୍ଡର ସଂଘର ସଦସ୍ୟବୃନ୍ଦ ପାଟିତୁଣ୍ଡ କରିଥିଲେ। ପରେ ଉଭୟପକ୍ଷଙ୍କ ମଧ୍ୟରେ ସମାଧାନ ହୋଇଥିବା ଜଣାପଡ଼ିଛି।
