ନୂଆପଡ଼ା,୨୨ା୫ (ମକାରୁ ବେମାଲ):ନୂଆପଡ଼ା ଜିଲା କୋମନା ବ୍ଲକ୍ କୁରୁମପୁରି ପଞ୍ଚାୟତ ଦିଆମୁଣ୍ଡା ଗାଁର ଚାଷୀଙ୍କ ଚାଷଜମିରେ ବସାଯାଇଥିବା ଟ୍ରାନ୍ସଫର୍ମର ପୋଡ଼ିଯିବାରୁ ନୂତନ ଟ୍ରାମ୍ସଫର୍ମର ସ୍ଥପାନ ପାଇଁ ବୁଧବାର ସେମାନେ ଜିଲାପାଳଙ୍କୁ ଦାବିପତ୍ର ପ୍ରଦାନ କରିଛନ୍ତି। ଏଥିରେ ଦର୍ଶାଯାଇଛି, ଦିଆମୁଣ୍ଡା ଗାଁର ମକୁନ୍ଦ ଧରୁଆ, ବିଶିରାମ ଧରୁଆ, ସେତାମ୍ବର ମାଝି, ନରେଶ ଧରୁଆ, ଡିକନଲାଲ ଧରୁଆ, ବଲେଚନ ମାଝି ଓ ଟିକେଶ୍ୱର ମାଝି ଉଠା ଜଳସେଚନ ବିଭାଗରୁ ଗଭୀର ନଳକୂପ ଖନନ କରାଇ ଚାଷ କରିଆସୁଛନ୍ତି। ଚଳିତ ରବିଋତୁରେ ପାଖାପାଖି ୨୫ ଏକର ଜମିରେ ଧାନ ଚାଷ କରିଛନ୍ତି। ଗତ ୧୫ ତାରିଖରେ କୌଣସି କାରଣରୁ ଟ୍ରାନ୍ସଫର୍ମର ପୋଡିଯିବାରୁ ଜମିରେ ପାଣି ମଡାଇବା ସମ୍ଭବ ହେଉନାହିଁ। ଅନ୍ୟ କୌଣସି ବିକଳ୍ପ ବ୍ୟବସ୍ଥା ନ ଥିବାରୁ ଧାନ ମରିବାକୁ ବସିଲାଣି। ବର୍ତ୍ତମାନ ଧାନ ଅମଳ ସମୟ ହୋଇଥିବାରୁ ବହୁତ କ୍ଷତି ସହିବାକୁ ପଡିବ। ଏ ନେଇ ବିଦ୍ୟୁତ୍ ବିଭାଗ କୁରୁମପୁରି ସେକ୍ସନ ଜେଇ ଓ ନୂଆପଡା ଏସ୍ଡିଓଙ୍କୁ ଅନେକ ଥର ଜଣାଇଥିଲେ ମଧ୍ୟ ସୁଫଳ ନ ମିଳିବାରୁ ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ସପ୍ତାହ ଭିତରେ ଟ୍ରାନ୍ସଫର୍ମର ସ୍ଥାପନ ନ ହେଲେ ଧାନ ସମ୍ପୂର୍ଣ୍ଣ ମରିଯିବ। ତେଣୁ ତୁରନ୍ତ ଟ୍ରାନ୍ସଫର୍ମର ବସାଯାଉ ବୋଲି ଦାବି କରିଛନ୍ତି। ଏହି ସମୟରେ ଚାଷୀ ନେତା ଭକ୍ତବନ୍ଧୁ ଧରୁଆଙ୍କ ସମେତ ସମସ୍ତ ଚାଷୀ ଉପସ୍ଥିତ ଥିଲେ ା
