ରାୟଗଡ଼ା,୭ା୨(ଆଶିଷ ରଞ୍ଜନ ପଣ୍ଡା): ରାଜ୍ୟରେ ମାଓବାଦୀ ବିରୋଧୀ ଅଭିଯାନକୁ ଏକ ବଡ଼ ସଫଳତା ମିଳିଛି। ଦକ୍ଷିଣ ଓ ଶୀର୍ଷ ମାଓବାଦୀ ନେତା ନିଖିଲ ଓ ତାଙ୍କ ସ୍ତ୍ରୀ ଇନ୍ଦୁ ସମେତ ୧୫ଜଣ ମାଓବାଦୀ ରାୟଗଡ଼ା ପୋଲିସ ଆଗରେ ଆତ୍ମସମର୍ପଣ କରିଛନ୍ତି। ଏନେଇ ଶନିବାର ଜିଲା ପୋଲିସ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି ଓ ପୋଲିସ ଏଡିଜି(ଆଣ୍ଟି ନକ୍ସଲ ଅପରେଶନ) ସଞ୍ଜୀବ ପଣ୍ଡା । ଏହି ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ସିଆର୍ପିଏଫ୍ ଆଇଜି ଅମିତେନ୍ଦ୍ର ସିହ୍ନା, ଆଇଜି ଅପରେଶନ ଦୀପକ କୁମାର, ଏସ୍ଆଇଡବ୍ଲ୍ୟୁ ଡିଆଇଜି ଅଖିଲେଶ ସିଂ, କୋରାପୁଟ ଡିଆଇଜି କନଓ୍ବର ବିଶାଲ ସିଂ, ରାୟଗଡ଼ା ଏସ୍ପି ସ୍ବାଥି ଏସ୍.କୁମାର, କନ୍ଧମାଳ ଏସ୍ପି ହରିଶ ବିଶି, କଳାହାଣ୍ଡି ଏସ୍ପି ନାଗରାଜୁ ଡିଓ ରାୟଗଡ଼ା ଜିଲାପାଳ ଆଶୁତୋଷ କୁଲକର୍ଣ୍ଣି ପ୍ରମୁଖ ଉପସ୍ଥିତ ଥିଲେ।
ଦୁଇ ରାଜ୍ୟ କମିଟି ସଦସ୍ୟ ନିଖିଲ ଓ ଇନ୍ଦୁଙ୍କ ସମେତ ଜଣେ ଡିଭିଜନାଲ କମିଟି ସଦସ୍ୟ, ୫ଜଣ ଏରିଆ କମିଟି ସଦସ୍ୟ ଏବଂ ୭ଜଣ ସଦସ୍ୟ ଆତ୍ମସମର୍ପଣ କରିଛନ୍ତି। କେନ୍ଦ୍ର ସରକାର ଓ ରାଜ୍ୟ ସରକାର ହିଂସା ଛାଡ଼ି ଗଣତାନ୍ତ୍ରିକ ପଦ୍ଧତିରେ ମୁଖ୍ୟସ୍ରୋତରେ ସାମିଲ ହେବା ପାଇଁ ମାର୍ଚ୍ଚ ୩୧ ତାରିଖ ପର୍ଯ୍ୟନ୍ତ ଦେଇଥିବା ଡେଡ୍ଲାଇନ ପ୍ରକାରେ ସମସ୍ତ ମାଓବାଦୀ ଆତ୍ମସମର୍ପଣ କରିଥବା ଏଡିଜି ପଣ୍ଡା କହିଛନ୍ତି। ସମସ୍ତ ଆତ୍ମସମର୍ପଣ କରିଥିବା ମାଓବାଦୀଙ୍କୁ ପୁରସ୍କାର ରାଶି ଭାବେ ୧ କୋଟି ୯୮ଲକ୍ଷ ୫୫ ହଜାର ଟଙ୍କା ଏବଂ ମାରଣାସ୍ତ୍ର ବିରତି ବାବଦରେ ୧୮ଲକ୍ଷ ୮୬ ହଜାର ୫୦୦ଟଙ୍କା ପ୍ରଦାନ କରାଯିବ। ଏଥି ସହିତ ଆତ୍ମସମର୍ପଣ କରିଥିବା ମାଓବାଦୀ କ୍ୟାଡରମାନଙ୍କୁ ସରକାରୀ ଆତ୍ମସମର୍ପଣ ଓ ପୁନର୍ବାସ ନୀତି ଅନୁସାରେ ଆର୍ଥିକ ସହାୟତା, ସୁରକ୍ଷା ଓ ଜୀବିକା ଯୋଗାଯିବା ସହିତ ସେମାନଙ୍କୁ ସାମାଜିକ ମୁଖ୍ୟଧାରାକୁ ଫେରାଇ ଆଣିବା ପାଇଁ ମଧ୍ୟ ପଦକ୍ଷେପ ନିଆଯିବ ବୋଲି ଏଡିଜି ପଣ୍ଡା କହିଥିଲେ।