ପୁରୀ ଅଫିସ,୩।୭: ସିଂହଦ୍ୱାର ସମ୍ମୁଖରେ ଥିବା ତିନିରଥ ଉପରେ ଶୁକ୍ରବାର ଅଧରପଣା ନୀତି ସମ୍ପନ୍ନ ହେବ। ଏଥିଲାଗି ସ୍ବତନ୍ତ୍ର ହାଣ୍ଡି ତିଆରି ସରିଛି। ତାହାକୁ ଅଧରପଣା ହାଣ୍ଡି କୁହାଯାଏ। ଏହି ହାଣ୍ଡିରେ ପଣା ପ୍ରସ୍ତୁତ ହୋଇ ଦାରୁବିଗ୍ରହଙ୍କ ପାଖରେ ଲାଗି ହେବ। ପ୍ରତି ଠାକୁରଙ୍କ ପାଖରେ ୩ ହାଣ୍ଡି ଲେଖାଏ ପଣା ଲାଗି ହେବ। ଠାକୁରଙ୍କ ପାଖରେ ପଣା ଭୋଗ ହେବା ପରେ ଏହି ପଣାହାଣ୍ଡିକୁ ଭାଙ୍ଗି ଦିଆଯିବାର ବିଧି ରହିଛି। ପଣା ହାଣ୍ଡି ଭାଙ୍ଗିଲେ ପଣା ସବୁ ରଥ ତଳକୁ ବୋହିଯାଏ। ତାହାକୁ ଦେବଦେବୀ, ଭୂତପ୍ରେତ, କିନ୍ନର ଓ ରାକ୍ଷସମାନେ ପାଇଥାନ୍ତି ବୋଲି ବିଶ୍ୱାସ ରହିଛି। ରଥରେ ମଧ୍ୟାହ୍ନ ଧୂପ ନୀତି ବଢିବା ପରେ ଅଧରପଣା ନୀତି କରାଯିବ। ଏହି ନୀତିକୁ ଶୃଙ୍ଖଳିତ କରିବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସେବାୟତଙ୍କ ସହ ଆଲୋଚନା ହୋଇଛି। ତେବେ ଏଥର ମହାପ୍ରଭୁଙ୍କ ଏହି ଅଧର ନୀତିକୁ କୌଣସି ଶ୍ରଦ୍ଧାଳୁ ଦର୍ଶନ କରିପାରିବେ ନାହିଁ। ମହାମାରୀ କରୋନା ପାଇଁ ଏଥର ବିନା ଭକ୍ତରେ ଘୋଷଯାତ୍ରାର ସମସ୍ତ ପ୍ରକ୍ରିୟା କରାଯାଉଛି।
ନୀତି ନିର୍ଘଣ୍ଟ
୩ ରଥରେ ମଙ୍ଗଳ ଆଳତି ପ୍ରାତଃ ୬ରୁ ୬. ୩୦
ମଇଲମ, ତଡପ ଲାଗି ସକାଳ ୭ଟା
ଅବକାଶ ୮ଟା
ବେଶଶେଷ ୯ଟା
ଗୋପାଳ ବଲ୍ଲଭ ୧୦ରୁ ୧୦. ୩୦
ସକାଳଧୂପ ୧୧. ୩୦ରୁ ୧୨. ୩୦
ମଇଲମ ଅପରାହ୍ନ ୧ଟା
ମହାସ୍ନାନ ଓ ସର୍ବାଙ୍ଗ ୧. ୩୦
ବେଶ ଶେଷ ୨ଟା
ମଧ୍ୟାହ୍ନ ଧୂପ ୩. ୩୦ରୁ ୪. ୩୦
ଅଧରପଣା ନୀତି ଶେଷ ରାତ୍ର ୮ଟା
ମହାସ୍ନାନ ଶେଷ ୯ଟା
ମଇଲମ ଓ ବେଶ ୧୦ଟା
ସନ୍ଧ୍ୟା ଆଳତି ୧୦. ୩୦
ସନ୍ଧ୍ୟାଧୂପ ୧୧ରୁ ୧୨ଟା
ମଇଲମ ଓ ଚନ୍ଦନ ଲାଗି ୧୨.୩୦
ବଡସିଂହାର ବେଶ ୧ଟା
ବଡସିଂହାର ଭୋଗ ୧.୩୦
ରାତ୍ର ପହୁଡ଼ ୨ଟା
