ଭୁବନେଶ୍ୱର,୨୬।୧୧: ରାଜ୍ୟର ପ୍ରମୁଖ ଘରୋଇ ଚିକିତ୍ସାଳୟ ସଦ୍ଗୁରୁ ହସ୍ପିଟାଲ କଟକ ଏବଂ ଭୁବନେଶ୍ୱର ଭିଭାନ୍ତା ହୋଟେଲର ମିଳିତ ସହଯୋଗରେ କର୍କଟ ରୋଗୀଙ୍କ ଲାଗି ଆଜି ଏକ ‘ଫଣ୍ଡରେଜିଂ ଇଭେଣ୍ଟ’ର ଆୟୋଜନ କରାଯାଇଛି। ଏପରିକି ଭୁବନେଶ୍ୱରର ପାତ୍ରପଡ଼ା ନିକଟସ୍ଥ ଭିଭାନ୍ତା ହୋଟେଲ ପରିସରରେ ଏ ନେଇ ଏକ ସ୍ବତନ୍ତ୍ର ରଙ୍ଗାରଙ୍ଗ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଛି। ଉକ୍ତ କାର୍ଯ୍ୟକ୍ରମରୁ ସଂଗୃହୀତ ସମସ୍ତ ଅର୍ଥ କ୍ୟାନ୍ସର ରୋଗୀମାନଙ୍କ ଚିକିତ୍ସା ନିମନ୍ତେ ମୁଖ୍ୟମନ୍ତ୍ରୀଙ୍କ ରିଲିଫ ଫଣ୍ଡକୁ ପ୍ରଦାନ କରାଯିବ ବୋଲି ସଦ୍ଗୁରୁ ହସ୍ପିଟାଲର ନିର୍ଦ୍ଦେଶକ ରାହୁଲ ପ୍ରତ୍ୟୁଷ ମହାନ୍ତି ମତପ୍ରକାଶ କରିଛନ୍ତି। ସେହିଭଳି ସ୍ବାସ୍ଥ୍ୟସେବା କ୍ଷେତ୍ରରେ ଓଡ଼ିଶା ସରକାର ରାଜ୍ୟବାସୀଙ୍କ ପାଇଁ ବଡ଼ ବଡ଼ ପଦକ୍ଷେପ ଗ୍ରହଣ କରିଛନ୍ତି। ହେଲେ ବର୍ତ୍ତମାନ ସ୍ଥିତିରେ ସାଧାରଣ ରୋଗ ଭଳି କର୍କଟ ରୋଗୀଙ୍କ ସଂଖ୍ୟା ମଧ୍ୟ ବୃଦ୍ଧି ଘଟିବାରେ ଲାଗୁଛି। ତେଣୁ କର୍କଟ ରୋଗୀଙ୍କୁ ସହାୟତା ଲାଗି ରାଜ୍ୟ ସରକାରଙ୍କୁ ସହଯୋଗ କରିବା ପାଇଁ ଏଭଳି ଏକ ‘ଫଣ୍ଡରେଜିଂ ଇଭେଣ୍ଟ’ର ଆୟୋଜନ କରାଯାଇଥିବା ଉଭୟ ସଂସ୍ଥା ପକ୍ଷରୁ କୁହାଯାଇଛି। ଉଲ୍ଲେଖଯୋଗ୍ୟ, ନଭେମ୍ବର ୨୬ ସନ୍ଧ୍ୟା ସାଢେ ୬ଟାରେ ଆରମ୍ଭ ହେବାକୁ ଥିବା ଉକ୍ତ କାର୍ଯ୍ୟକ୍ରମରେ ବିଭିନ୍ନ ପ୍ରକାର ରଙ୍ଗାରଙ୍ଗ କାର୍ଯ୍ୟକ୍ରମ ହେବ। ବିଶେଷକରି ଭିଗ୍ନାଜ୍ ବ୍ୟାଣ୍ଡ୍ ଗ୍ରୁପ,ସ୍ବିଟ୍ ପଏଜନ, ଲୋୟଲା ସ୍କୁଲର ବ୍ୟାଣ୍ଡ୍ ସହ ଗୀତ ଉପରେ ରୁଚି ରଖୁଥିବା ନୂତନ ପ୍ରତିଭାମାନେ ମଧ୍ୟ ରଙ୍ଗାରଙ୍ଗ କାର୍ଯ୍ୟକ୍ରମ ପରିବେଷଣ କରିବାର କାର୍ଯ୍ୟକ୍ରମ ରହିଛି। ସୂଚନାଯୋଗ୍ୟ, ଉକ୍ତ କାର୍ଯ୍ୟକ୍ରମରେ ୨ଜଣଙ୍କ ପିଛା ୫,୫୦୦ ଓ ଜଣଙ୍କ ପିଛା ୩୫୦୦ ଟଙ୍କା ସହିତ ଟିକସ ଦେଇ ନିଜ ସିଟ୍ ବୁକ୍ କରିପାରିବେ। ଭିଭାନ୍ତା ହୋଟେଲରେ ବୁକ୍ ହୋଇଥିବା ସିଟ୍ରୁ ଆଦାୟ ଟଙ୍କା କର୍କଟ ରୋଗୀମାନଙ୍କ ଲାଗି ପ୍ରଦାନ କରାଯିବ। ଯଦି କୌଣସି ବ୍ୟକ୍ତି କର୍କଟ ରୋଗୀଙ୍କ ଲାଗି ନିଜ ସିଟ୍ ବୁକିଂ କରିବାକୁ ଚାହୁଁଛନ୍ତି ତେବେ ସଦ୍ଗୁରୁ ହସ୍ପିଟାଲର ସମସ୍ତ ସୋସିଆଲ ମିଡିଆ ପ୍ଲାଟ୍ଫର୍ମରେ ମଧ୍ୟ ସମସ୍ତ ତଥ୍ୟ ପାଇପାରିବେ।
