ନୂଆଦିଲ୍ଲୀ,୩୦ା୬:ତୃଣମୂଳ କଂଗ୍ରେସ (ଟିଏମ୍ସି) ଏମ୍ପି କଲ୍ୟାଣ ବାନାର୍ଜୀ ଏବଂ ମହୁଆ ମୋଇତ୍ରଙ୍କ ମଧ୍ୟରେ ୩ ମାସ ତଳେ ଦେଖାଦେଇଥିବା ବିବାଦ ରବିବାର ପୁଣି ଜୋର୍ ଧରିଛି। ସାଉଥ୍ କାଲ୍କାଟା ଲ’ କଲେଜରେ ଛାତ୍ରୀଙ୍କୁ ଗଣବଳାତ୍କାର ଘଟଣାରେ କଲ୍ୟାଣ ଦେଇଥିବା ବିବାଦୀୟ ମନ୍ତବ୍ୟକୁ ନେଇ ୨ ଏମ୍ପିଙ୍କ ମଧ୍ୟରେ ବାକ୍ଯୁଦ୍ଧ ଆରମ୍ଭ ହୋଇଛି। ମହୁଆଙ୍କ ସମାଲୋଚନାର ଜବାବ ଦେବାକୁ ଯାଇ କଲ୍ୟାଣ ତାଙ୍କର ବ୍ୟକ୍ତିଗତ ଜୀବନକୁ ନେଇ ଟାର୍ଗେଟ କରିଛନ୍ତି। ବିଜେଡିର ପୂର୍ବତନ ଏମ୍ପି ପିନାକୀ ମିଶ୍ରଙ୍କୁ ବିବାହ କରିଥିବା ମହୁଆ ବିଦେଶରେ ହନିମୁନ୍ କରି ଫେରିବା ପରେ ପୁଣି ମୋ ସହ ବିବାଦ ଆରମ୍ଭ କରିଛନ୍ତି। ମୋତେ ମହିଳା ବିରୋଧୀ କହୁଥିବା ମହୁଆ ନିଜେ କ’ଣ ବୋଲି କଲ୍ୟାଣ ପ୍ରଶ୍ନ କରିଛନ୍ତି। ସେ ୪୦ ବର୍ଷର ବିବାହ ସମ୍ପର୍କ ଭାଙ୍ଗି ଜଣେ ୬୫ ବର୍ଷୀୟଙ୍କୁ ବିବାହ କରିଛନ୍ତି। ମହୁଆ ଉକ୍ତ ମହିଳାଙ୍କୁ ଆଘାତ ଦେଇନାହାନ୍ତି କି ବୋଲି ପ୍ରଶ୍ନ କରିବା ସହ ଅନୈତିକ ଆଚରଣ ପାଇଁ ପାର୍ଲାମେଣ୍ଟରୁ ବହିଷ୍କୃତ ହୋଇଥିବା ଏମ୍ପି ମହିଳା ବିରୋଧୀ ବୋଲି କଲ୍ୟାଣ କହିଛନ୍ତି।
କୋଲକାତାର ଆଇନ ଛାତ୍ରୀ ଗଣବଳାତ୍କାର ମାମଲାରେ କଲ୍ୟାଣ ବାନାର୍ଜୀ କହିଥିଲେ, ଯଦି ସାଙ୍ଗ ସାଙ୍ଗକୁ ବଳାତ୍କାର କରେ, ତେବେ କ’ଣ କରାଯାଇପାରିବ। ସେହିପରି ବଳାତ୍କାର ସ୍ଥାନକୁ ଛାତ୍ରୀ ଜଣକ ଯାଇଥିଲେ କାହିଁକି ବୋଲି ଦଳୀୟ ବିଧାୟକ ମଦନ ମିତ୍ରା ପ୍ରଶ୍ନ କରିଥିଲେ। ସେମାନଙ୍କ ମନ୍ତବ୍ୟଠାରୁ ଟିଏମ୍ସି ନିଜକୁ ଦୂରେଇ ରଖିବା ପାଇଁ ନିଷ୍ପତ୍ତି ନେଇଥିବାବେଳେ ମହୁଆ ଏହାକୁ ସମର୍ଥନ କରିଥିଲେ। ସବୁ ଦଳରେ ମହିଳାଙ୍କ ପ୍ରତି ଦ୍ୱେଷ ରହିଛି। ଆମେ ଏଭଳି ମନ୍ତବ୍ୟକୁ ନିନ୍ଦା ନ କଲେ ଟିଏମ୍ସିରେ ପାର୍ଥକ୍ୟ ରହିଲା କେଉଁଠି ବୋଲି ମହୁଆ ଲେଖିଥିଲେ।
