ନୂଆଦିଲ୍ଲୀ,୧୩।୭: ଚାଇନା ସେନା ଆକ୍ରମଣ ଫଳରେ ଭାରତ ସରକାର ଟିକ୍ଟକ୍ ସହ ଚାଇନାର ୫୯ ଆପ୍ଲିକେଶନକୁ ଭାରତ ବଜାରରୁ ବ୍ୟାନ୍ କରି ଦେଇଛନ୍ତି। ଏହା ଦ୍ୱାରା କମ୍ପାନୀ ଗଭୀର କ୍ଷତି ସହୁଛି। ବିଶ୍ୱର ପ୍ରମୁଖ ବଜାରଗୁଡିକ ମଧ୍ୟରେ ଭାରତ ବଜାର କମ୍ପାନୀ ଲାଗି ଭଲ ରାଜସ୍ବ ପ୍ରଦାନ କରୁଥିଲା। ହେଲେ ଚାଇନା ସେନାର ଏଭଳି କାର୍ଯ୍ୟ ଦ୍ୱାରା ବାଇଟଡାନ୍ସ ଦ୍ୱାରା ସ୍ଥାପନା ହୋଇଥିବା ଟିକଟକ ଆପ୍ ଗଭୀର କ୍ଷତି ସହୁଛି। ରୟଟର୍ସର ଏକ ରିପୋର୍ଟ ମୁତାବକ ଚାଇନା ପାଇଁ ଟିକ୍ଟକ୍କୁ କ୍ଷତି ସହିବାକୁ ପଡିଥିବାରୁ ଏହା ପରିବର୍ତ୍ତିତ କୌଶଳ ସହ ଆସିପାରେ। ଏହା ଚାଇନା ପରେ ଆମେରିକା ଢଙ୍ଗରେ କାରବାରକୁ ଓହ୍ଲାଇପାରେ ବୋଲି ଆଲୋଚନା ହେଉଛି। ଏଭଳି ସ୍ଥିତିରେ ଆମେରିକା ମଧ୍ୟ ଏହି ମୋବାଇଲ ଆପ୍ ଉପରେ କଟକଣା ଲଗାଇ ପାରେ ବୋଲି ଶୁଣାଯାଉଛି। ଟିକ୍ଟକ୍ ବ୍ୟବହାର ନ କରିବାକୁ ଆମାଜନ୍ ଏହାର କର୍ମଚାରୀଙ୍କୁ ବାରଣ କରିଥିବା ଖବର ଆସିଛି। ବଜାରର ଏଭଳି ବିଭିନ୍ନ ସମସ୍ୟାକୁ ଧ୍ୟାନରେ ରଖି ଟିକ୍ଟକ୍ ଚାଇନା ସହ ଏହାର ସମ୍ପର୍କ ଛିନ୍ନ କରିବା ସହ ବିକଳ୍ପ ପନ୍ଥା ଆପଣାଇବାକୁ ଯୋଜନା କରୁଛି। କମ୍ପାନୀ ଏହାର କର୍ପୋରେଟ ଢାଞ୍ଚାରେ ମଧ୍ୟ ପୁନର୍ଗଠନ କରିପାରେ। ଏହାର ମୁଖ୍ୟ କାର୍ଯ୍ୟାଳୟକୁ କମ୍ପାନୀ ନୂଆ ସ୍ଥାନକୁ ମଧ୍ୟ ନେଇପାରେ ବୋଲି ଶୁଣାଯାଉଛି। ଲଣ୍ଡନ, ଲସ୍ଆଞ୍ଜେଲସ୍,ନ୍ୟୁୟର୍କ,ଡବ୍ଲିନ ଏବଂ ମୁମ୍ବାଇ ଭଳି ସ୍ଥାନରେ କମ୍ପାନୀର କାର୍ଯ୍ୟାଳୟ ରହିଛି। ଏଭଳି ସ୍ଥାନଗୁଡିକରୁ କୌଣସି ଏକ ସ୍ଥାନରେ କମ୍ପାନୀ ନିଜର ନୂଆ ମୁଖ୍ୟ କାର୍ଯ୍ୟାଳୟ ସ୍ଥାପନ କରିପାରେ। କମ୍ପାନୀ ନୂଆ ସିଇଓ ଭାବେ କେଭିନ ମେୟରଙ୍କୁ ନିଯୁକ୍ତ କରିଛି। ଚାଇନାରେ ଟିକଟିକର ସର୍ଭରଗୁଡିକ ରହିଛି। ଏହାବାଦ ଆମେରିକାରେ ମଧ୍ୟ କିଛି ସର୍ଭର ରହିଛି। କମ୍ପାନୀର ନୂଆ ଢାଞ୍ଚାରେ ମେୟରଙ୍କ ଯୋଗଦାନ ଗୁରୁତ୍ୱପୂର୍ଣ୍ଣ ରହିବ ବୋଲି ବଜାର ବିଶେଷଜ୍ଞ ମତ ପ୍ରକାଶ କରିଛନ୍ତି।
