ଥୁଆମୂଳ ରାମପୁର, ୧୫ା୨ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ପୋଲିସ ପକ୍ଷରୁ ବେଆଇନ ବାଲି ଚୋରା ଚାଲାଣ ବିରୋଧରେ ଏକ ବଡ଼ ଧରଣର ସଫଳତା ମିଳିଛି । ରବିବାର ସକାଳୁ ପୋଲିସ ଚଢ଼ାଉ କରି ଚୋରା ବାଲି ପରିବହନ କରୁଥିବା ୩ଟି ହାଇୱା ଗାଡ଼ିକୁ ଜବତ କରିବା ସହ ଏଥିରେ ସଂପୃକ୍ତ ଡ୍ରାଇଭରମାନଙ୍କୁ ଅଟକ ରଖିଛି । ଜବତ ଗାଡ଼ିଗୁଡ଼ିକ କୋକସରା ଅଞ୍ଚଳର ବ୍ୟବସାୟୀ ବିକ୍ରମ ଗୁପ୍ତାଙ୍କର ବୋଲି ଜଣାପଡ଼ିଛି ।
ମିଳିଥିବା ସୂଚନା ଅନୁଯାୟୀ, ଦେପୁର ବାଲିଘାଟରୁ ଦୀର୍ଘ ଦିନ ହେବ କୌଣସି ବୈଧ କାଗଜପତ୍ର କିମ୍ବା ସରକାରୀ ରୟାଲ୍ଟି ନଦେଇ ଥୁଆମୂଳ ରାମପୁର ଓ ଗୋପାଳପୁର ଅଞ୍ଚଳକୁ ବାଲି ଚୋରା ଚାଲାଣ ହେଉଥିଲା। ଏନେଇ ପୋଲିସ ପାଖରେ ପୂର୍ବରୁ ସୂଚନା ରହିଥିଲେ ହେଁ, ରବିବାର ସକାଳୁ ଥାନା ଅଧିକାରୀ କୈବଲ୍ୟ ସେଠ୍ଙ୍କ ନେତୃତ୍ୱରେ ଏକ ଟିମ୍ ସଠିକ୍ ସମୟରେ ଛାପା ମାରି ଗାଡ଼ିଗୁଡ଼ିକୁ ମାଡ଼ି ବସିଥିଲେ ।
ଜବତ ହୋଇଥିବା ଗାଡ଼ିଗୁଡ଼ିକର କୌଣସି ପରିବହନ କିମ୍ବା ଲିଫ୍ଟିଂ ଦସ୍ତାବିଜ୍ ନଥିବା ଯାଞ୍ଚ ବେଳେ ଜଣାପଡ଼ିଛି। ସରକାରୀ ରାଜସ୍ୱ ହରିଲୁଟ୍ କରି ଏହି ସିଣ୍ଡିକେଟ୍ ଦୀର୍ଘ ଦିନରୁ ସକ୍ରିୟ ଥିଲା। ଏହି ଘଟଣାରେ ପୋଲିସ କେସ୍ ନମ୍ବର ୨୫/୨୬, ୨୬/୨୬ ଓ ୨୭/୨୬ ରେ ମାମଲା ରୁଜ୍ଜୁ କରି ଘଟଣାର ଅଧିକ ତଦନ୍ତ ଚଳାଇଛି । ତେବେ ଏନେଇ ଥାନା ଅଧିକାରୀ କୈବଲ୍ୟ ସେଠ୍ “ବେଆଇନ ବାଲି କାରବାର ବିରୋଧରେ ଆମର ଏହି ଅଭିଯାନ ଜାରି ରହିବ। ଜବତ ୩ଟି ଗାଡ଼ିକୁ କୋର୍ଟ ଚାଲାଣ କରାଯିବ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି । ଏହି କାର୍ଯ୍ୟାନୁଷ୍ଠାନ ପରେ ଅଞ୍ଚଳର ବାଲି ମାଫିଆଙ୍କ ମଧ୍ୟରେ ଛନକା ପଶିଛି । ପୋଲିସ ବାଲି ସହ ଗାଡ଼ିଗୁଡ଼ିକୁ ଜବତ କରି ଥାନା ପରିସରରେ ରଖିଥିବା ବେଳେ ଏଥିରେ ଅନ୍ୟ କାହାର ସଂପୃକ୍ତି ରହିଛି, ସେ ନେଇ ଖୋଳତାଡ଼ ଜାରି ରଖିଛି ।