ଲଣ୍ଡନ, ୧୩।୮: ଇଂଲଣ୍ଡ ମହିଳା କ୍ରିକେଟ୍ ଦଳର ଅଭିଜ୍ଞ ସ୍ପିନର ଲୌରା ମାର୍ଶ ସମସ୍ତ ପ୍ରକାର କ୍ରିକେଟ୍ରୁ ଅବସର ଘୋଷଣା କରିଛନ୍ତି। ୩୩ ବର୍ଷୀୟ ଏହି ସ୍ପିନର କ୍ୟାରିୟରରେ ୩ଥର ବିଶ୍ୱକପ୍ ଜିତିଥିଲେ। ଇଂଲଣ୍ଡରେ ଅନୁଷ୍ଠିତ ହେଉଥିବା ହଣ୍ଡ୍ରେଡ୍ସ (୧୦୦ ବଲ୍) କ୍ରିକେଟ୍ ଟୁର୍ନାମେଣ୍ଟ ଚଳିତ ବର୍ଷ କରୋନା ଲାଗି ସ୍ଥଗିତ ରଖାଯିବା ଲାଗି ଘୋଷଣା କରାଯାଇଥିଲା। ଏହାପରେ ଲୌରା କ୍ରିକେଟ୍ରୁ ଅବସର ନେବାକୁ ନିଷ୍ପତ୍ତି ନେଇଥିଲେ। ଇଂଲଣ୍ଡ ପକ୍ଷରୁ ସେ ୯ ଟେଷ୍ଟ, ୧୦୩ ଦିନିକିଆ ଓ ୬୭ ଟି୨୦ ମ୍ୟାଚ୍ ଖେଳି ଯଥାକ୍ରମେ ୨୪, ୧୨୯ ଓ ୬୪ ଉଇକେଟ୍ ଅକ୍ତିଆର କରିଛନ୍ତି। ସେହିଭଳି ଟେଷ୍ଟରେ ସେ ୧୫୧, ଦିନିକିଆରେ ୬୮୨ ଓ ଟି୨୦ରେ ୭୫୫ ରନ୍ ସଂଗ୍ରହ କରିଥିଲେ।
