ନୂଆଦିଲ୍ଲୀ,୧।୪ : ପାଣିପାଗ ବିଭାଗ ଅନୁଯାୟୀ ଚଳିତ ବର୍ଷ ଅତ୍ୟଧିକ ତାତି ଅନୁଭୁତ ହେବ। ଭାରତୀୟ ପାଣିପାଗ ବିଭାଗ(ଆଇଏମଡି) କହିଛି ଯେ ଚଳିତ ବର୍ଷ ଏପ୍ରିଲରୁ ଜୁନ ମଧ୍ୟରେ ସର୍ବାଧିକ ତାପମାତ୍ରା ଅନୁଭୁତ ହେବ। ତାପମାତ୍ରା ସ୍ବାଭାବିକଠାରୁ ଅଧିକ ରହିବ। ତଥାପି, ଉତ୍ତର ପୂର୍ବ ରାଜ୍ୟ ଏବଂ ଦକ୍ଷିଣର ମାଳଭୂମି ଅଞ୍ଚଳରେ ତାପମାତ୍ରା ସ୍ବାଭାବିକ ରହିବ। ପାଣିପାଗ ବିଭାଗ କହିଛି ଯେ ଚଳିତ ବର୍ଷ କେନ୍ଦ୍ରୀୟ, ପୂର୍ବ ଏବଂ ଉତ୍ତର ପଶ୍ଚିମ ଭାରତରେ ମଧ୍ୟ ଉତ୍ତାପ ଲହର ଅଧିକ ଦିନ ଜାରି ରହିବ।
ଏକ ଭର୍ଚୁଆଲ ଖବରଦାତାସମ୍ମିଳନୀରେ ପାଣିପାଗ ବିଭାଗର ନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର କହିଛନ୍ତି ଯେ ବିହାର, ଝାଡଖଣ୍ଡ, ଉତ୍ତରପ୍ରଦେଶ, ଓଡିଶା, ପଶ୍ଚିମବଙ୍ଗ, ଛତିଶଗଡ, ମହାରାଷ୍ଟ୍ର, ଗୁଜୁରାଟ, ପଞ୍ଜାବ ଏବଂ ହରିୟାଣାରେ ଉତ୍ତାପ ଲହର ପ୍ରବାହିତ ଦିନ ସଂଖ୍ୟା ଏବଂ ଏହାର ପ୍ରଭାବରେ ବୃଦ୍ଧି ଘଟିବ। ସେ କହିଛନ୍ତି ଯେ ଚଳିତ ବର୍ଷ ଏପ୍ରିଲରୁ ଜୁନ ପର୍ଯ୍ୟନ୍ତ ଦେଶର ଅଧିକାଂଶ ଅଞ୍ଚଳରେ ସାଧାରଣ ଉତ୍ତାପଠାରୁ ଅଧିକ ଅନୁଭୂତ ହେବ। ଏପ୍ରିଲ ମାସରେ ବର୍ଷା ସ୍ବାଭାବିକ ହେବ। ଅନ୍ୟପକ୍ଷରେ ପୂର୍ବ ଏବଂ ଉତ୍ତର ପୂର୍ବ ଅଞ୍ଚଳରେ ସୱାଭାବିକଠାରୁ ସାମାନ୍ୟ କମ ବର୍ଷା ହେବାର ଆଶଙ୍କା ରହିଛି।
ତାପମାତ୍ରାକୁ ପ୍ରଭାବିତ କରୁଥିବା ପାଣିପାଗ ସ୍ଥିତି ଏଲ ନିନୋ ତିନି ବର୍ଷ ପରେ ଫେରି ଆସୁଛି। ଏଲ ନିନୋ ପ୍ରଭାବ ଯୋଗୁ ୨୦୨୩ରେ ତାପମାତ୍ରା ବୃଦ୍ଧି ହେବାର ସମ୍ଭାବନା ଅଛି। ପବନ, ସମୁଦ୍ର ସ୍ରୋତ, ସାମୁଦ୍ରିକ ଏବଂ ବାୟୁମଣ୍ଡଳୀୟ ତାପମାତ୍ରା ଏବଂ ଜୈବ ପରିବେଶ ମଧ୍ୟରେ ସନ୍ତୁଳନ ବ୍ୟାହତ ହେବା ଏଲ ନିନୋ ଯୋଗୁ ହୋଇଥାଏ। ଯାହା ସମୁଦ୍ର ଜଳର ତାପମାତ୍ରାକୁ ବଢ଼ାଇଥାଏ। ଏଲ ନିନୋ ପ୍ରଶାନ୍ତ ମହାସାଗରର ସମୁଦ୍ର ପୃଷ୍ଠର ତାପମାତ୍ରାରେ ପର୍ଯ୍ୟାୟକ୍ରମେ ପରିବର୍ତ୍ତନ ଘଟାଏ, ଯାହା ବିଶ୍ୱର ପାଗ ଉପରେ ମଧ୍ୟ ପ୍ରଭାବ ପକାଇଥାଏ।
