ଇଡେନ ଗାର୍ଡେନ,୧୭।୩: ଆଇପିଏଲ ୨୦୨୫ ପାଇଁ କାଉଣ୍ଟଡାଉନ ଆରମ୍ଭ ହୋଇଯାଇଛି। ପ୍ରଥମ ମ୍ୟାଚ ମାର୍ଚ୍ଚ ୨୨ରେ ଇଡେନ ଗାର୍ଡେନରେ କେକେଆର୍ ଓ ଆରସିବି ମଧ୍ୟରେ ଖେଳାଯିବ। ୫ ଥରର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ନିକଟରେ ଆହତ ଖେଳାଳି ଲିଜାଦ ୱିଲିୟମ୍ସଙ୍କ ସ୍ଥାନରେ କୋର୍ବିନ ବୋଶଙ୍କୁ ଦଳରେ ସାମିଲ କରିଛି। ଏଥିପାଇଁ ବୋଶଙ୍କୁ ପିଏସଏଲ ଛାଡ଼ିବାକୁ ପଡ଼ିଥିଲା, ଯାହା ପରେ ପାକିସ୍ତାନ କ୍ରିକେଟ ବୋର୍ଡ ତାଙ୍କ ବିରୋଧରେ ଆଇନଗତ ନୋଟିସ ଜାରି କରିଥିଲା। ଏହା ନିୟମର ଉଲ୍ଲଂଘନ ବୋଲି ବୋର୍ଡ ଦାବି କରିଛି। ଏବେ ଆଇପିଏଲରେ ଆହତ ଖେଳାଳିଙ୍କ ସ୍ଥାନ ନେଇ କ’ଣ ନିୟମ ରହିଛି ତାହା ବୁଝିବା ଜରୁରୀ। କେବେ ଏବଂ କେଉଁ ପରିସ୍ଥିତିରେ ଦଳ ସେମାନଙ୍କ ଖେଳାଳିଙ୍କ ସ୍ଥାନ ନେଇପାରିବ ଏବଂ ସେମାନଙ୍କ ଫି’କୁ ନେଇ କ’ଣ ସର୍ତ୍ତ ରହିଛି? ସୂଚନାଯୋଗ୍ୟ, ଏଥର ଏହି ନିୟମରେ ପରିବର୍ତ୍ତନ କରାଯାଇଛି। ଆଇପିଏଲ ୨୦୨୫ରେ ଆହତ ଖେଳାଳିଙ୍କୁ ବଦଳାଇବା ପାଇଁ ନିୟମର ମୁଖ୍ୟ କଥା ଏଠାରେ ଦର୍ଶାଯାଇଛି। ଏହି ନିୟମର ଫାଇଦା ଉଠାଇ ଆହତ ଖେଳାଳିଙ୍କ ସ୍ଥାନରେ ଅନ୍ୟ ଜଣେ ଖେଳାଳିଙ୍କୁ ଦଳରେ ସାମିଲ କରିପାରିବେ।
ଆଇପିଏଲ ଟିମ ଏବେ ଦ୍ୱାଦଶ ଲିଗ ମ୍ୟାଚ ପର୍ଯ୍ୟନ୍ତ ଆହତ ଖେଳାଳିଙ୍କ ସ୍ଥାନ ନେଇପାରିବ। ପୂର୍ବରୁ ଏହା ମାତ୍ର ୭ ମ୍ୟାଚ ପର୍ଯ୍ୟନ୍ତ ଥିଲା। ଏଥର ଏହାକୁ ବୃଦ୍ଧି କରାଯାଇଛି।
ବଦଳ ଖେଳାଳି କିଏ ହୋଇପାରିବେ
ବଦଳ ଖେଳାଳି କେବଳ ସେହି ଖେଳାଳି ହୋଇପାରିବେ ଯିଏ ସିଜନ ପାଇଁ ପଞ୍ଜୀକୃତ ଉପଲବ୍ଧ ଖେଳାଳି ପୁଲରେ ଅନ୍ତର୍ଭୁକ୍ତ ହୋଇପାରିବେ। ସେମାନଙ୍କ ଲିଗ ଫି’ ଦଳରେ ସ୍ଥାନ ପାଇଥିବା ଖେଳାଳିଙ୍କ ଠାରୁ ଅଧିକ ହୋଇପାରିବ ନାହିଁ।
ଚଳିତ ସିଜିନ୍ ପାଇଁ ଦଳର ବେତନ ସୀମାରେ ବଦଳ ଖେଳାଳିଙ୍କ ଲିଗ ଫି’ ଗଣନା କରାଯାଏ ନାହିଁ। ଯଦି ବଦଳା ଯାଇଥିବା ଖେଳାଳିଙ୍କ ଚୁକ୍ତି ପରବର୍ତ୍ତୀ ସିଜିନ୍କୁ ବୃଦ୍ଧି କରାଯାଏ, ତେବେ ସେମାନଙ୍କ ଫି’ ବେତନ ସୀମାରେ ଗଣାଯିବ।
ଟୁର୍ନାମେଣ୍ଟ ସମୟରେ ବଦଳ ଖେଳାଳିଙ୍କ ପାଇଁ ସର୍ତ୍ତ
ଦଳର ଦ୍ୱାଦଶ ଲିଗ ମ୍ୟାଚ ସମୟରେ କିମ୍ବା ପୂର୍ବରୁ ଖେଳାଳିଙ୍କ ଆଘାତ କିମ୍ବା ଅସୁସ୍ଥତା ହେବା ଜରୁରୀ।
ବିସିସିଆଇ ଦ୍ୱାରା ନିଯୁକ୍ତ ଜଣେ ଡାକ୍ତର ନିଶ୍ଚିତ କରିବେ ଯେ ଖେଳାଳି ସିଜିନ୍ ଶେଷ ପର୍ଯ୍ୟନ୍ତ ଆଘାତରୁ ସୁସ୍ଥ ହେବେ ନାହିଁ।
ଆହତ ଏବଂ ବାଦ ପଡ଼ିଥିବା ଖେଳାଳି ସିଜନରେ ଆଉ କୌଣସି ମ୍ୟାଚ ଖେଳିପାରିବେ ନାହିଁ।
ଖେଳାଳିଙ୍କ ବଦଳି ପରେ ମଧ୍ୟ ଦଳରେ ମୋଟ ଖେଳାଳିଙ୍କ ସଂଖ୍ୟା ୨୫ରୁ ଅଧିକ ନ ହୁଏ ସେଥିପ୍ରତି ଦଳକୁ ଧ୍ୟାନ ଦେବାକୁ ପଡ଼ିବ।
