ବିଶ୍ୱର ସବୁଠାରୁ ଶସ୍ତା ମୋବାଇଲ ଡାଟା ଭାରତରେ ମିଳୁଛି। ଅର୍ଥାତ ମୋବାଇଲ ଇଣ୍ଟରନେଟ ବ୍ୟବହାର ଲାଗି ଲୋକଙ୍କୁ ସ୍ବଳ୍ପ ଅର୍ଥ ଖର୍ଚ୍ଚ କରିବାକୁ ପଡୁଛି। ଭାରତରେ ୧ ଜିବି ଡାଟାର ହାରାହାରି ମୂଲ୍ୟ ୦.୦୯ ଡଲାର(୬.୭୫ ଟଙ୍କା) ରହିଛି ବୋଲି ନିକଟରେ ପ୍ରକାଶିତ ଏକ ରିପୋର୍ଟରେ ପ୍ରକାଶ ପାଇଛି। ଜାଣି ଆଶ୍ଚର୍ଯ୍ୟ ହେବେ ଦୁନିଆରେ ଏମିତି କିଛି ଦେଶ ଅଛି ଯେଉଁ ଠାରେ ଡାଟା ଲାଗି ଲୋକଙ୍କୁ ବୃହତ୍ତ ପରିମାଣର ଅର୍ଥ ଖର୍ଚ୍ଚ କରିବାକୁ ପଡିଥାଏ। ରିପୋର୍ଟ ମୁତାବକ ମଲାଓ୍ବି ନାମକ ଦେଶରେ ଡାଟା ଦର ସବୁ ଠାରୁ ମହଙ୍ଗା। ଏହି ଦେଶଟି ପୂର୍ବ ଆଫ୍ରିକାର ଏକ ଦେଶ। ଏଠାରେ ୧ ଜିବି ଡାଟା ଲାଗି ଲୋକଙ୍କୁ ୨୭.୪୧ ଡଲାର (୨,୦୫୩ ଟଙ୍କା) ଦେବାକୁ ପଡୁଛି। ସେହି ଭଳି ସବୁଠାରୁ ମହଙ୍ଗା ଡାଟା ରହିଥିବା ଅନ୍ୟ ଦେଶ ଗୁଡିକ ମଧ୍ୟରେ ବେନିନ(୨୦୩୯ ଟଙ୍କା),ଚାଡ(୧୭୪୮ ଟଙ୍କା) , ୟେମେନ(୧୧୯୭ ଟଙ୍କା) ଏବଂ ବୋସ୍ତଓ୍ବାନାରେ(୧୦୯୩ ଟଙ୍କା) ରହିଛି। ୧୫୫ ଦେଶକୁ ଏହି ସର୍ଭେରେ ସାମିଲ କରାଯାଇଛି। ୧ ଜିବି ପିଛା ସବୁଠାରୁ ଶସ୍ତା ଡାଟା ମିଳୁ ଥିବା ଅନ୍ୟ ଦେଶ ଗୁଡିକ ମଧ୍ୟରେ ଇସ୍ରାଏଲ(୮.୨୪ ଟଙ୍କା), କିର୍ଗିସ୍ତାନ (୧୫.୭୪ ଟଙ୍କା), ଇଟାଲୀ( ୩୨.୨୨ ଟଙ୍କା) ଏବଂ ୟୁକ୍ରେନ (୩୪.୪୭ ଟଙ୍କା) ରହିଛି। ରିପୋର୍ଟ ମୁତାବକ ୪ଟି ପ୍ରମୁଖ ପ୍ରସଙ୍ଗ ଡାଟା ମୂଲ୍ୟ ଉପରେ ନିର୍ଭର କରିଥାଏ। ଏହା ମଧ୍ୟରେ ନେଟଓ୍ବର୍କର ଢାଞ୍ଚା, ମୋବାଇଲ ଡାଟା ଉପରେ ଭରଷା, ଡାଟା ଚାହିଦା ଏବଂ ଉପଭୋକ୍ତାଙ୍କ ଆୟ ସାମିଲ ରହିଛି। ୨୦୨୫ ସୁଦ୍ଧା ଭାରତରେ ପ୍ରତି ବ୍ୟକ୍ତିଙ୍କ ମାସିକ ଡାଟା ଚାହିଦା ୨୫ ଜିବିକୁ ବଢିବ ବୋଲି ଆକଳନ କରାଯାଇଛି। ଗତ ୫ ବର୍ଷ ମଧ୍ୟରେ ଭାରତରେ ଡାଟା ଦର ଲଗାତର କମିଥିବା ଜଣାପଡିଛି। ୨୦୧୫ ପର୍ଯ୍ୟନ୍ତ ଡାଟା ଦର ବହୁ ଉଚ୍ଚରେ ରହିଥିଲା। ୨୦୧୬ରେ ଜିଓ ବଜାରରେ ପ୍ରବେଶ କରିବା ଯୋଗୁ ଡାଟା ଦରରେ ବିଶେଷ ହ୍ରାସ ଦେଖାଗଲା। ଜିଓ ସହ ପ୍ରତିଦ୍ୱନ୍ଦ୍ୱିତା କରିବାକୁ ଯାଇ ଭାରତର ଅନ୍ୟ ଟେଲିକମ କମ୍ପାନୀଗୁଡିକ ଡାଟା ଦର କମାଇ ଦେଲେ।
