ନୂଆଦିଲ୍ଲୀ,୮।୧୧: ହଂକଂ ସିକ୍ସେସ ଟୁର୍ନାମେଣ୍ଟରେ ଭାରତୀୟ ଦଳ ଏକ ବଡ଼ ଝଟ୍କାର ସମ୍ମୁଖୀନ ହୋଇଛି। ପୁଲ ସି ମ୍ୟାଚ୍ରେ କୁଏତର ଅଧିନାୟକ ଚମତ୍କାର ପ୍ରଦର୍ଶନ କରି ଦଳକୁ ବିଜୟୀ କରାଇଥିଲେ। ସେ ପ୍ରଥମ ୧୪ ବଲ୍ରେ ୧୦ ଚୌକା ଏବଂ ଛକା ମାରିଥିଲେ ଏବଂ ପରେ ତିନୋଟି ଉଇକେଟ ନେଇଥିଲେ। ଫଳରେ ଭାରତୀୟ ଦଳ ସମ୍ପୂର୍ଣ୍ଣ ଧରାଶାୟୀ ହୋଇଯାଇଥିଲା। ଏହି ବିଜୟ ସହିତ କୁଏତ ପଏଣ୍ଟ ଟେବୁଲ୍ର ଶୀର୍ଷରେ ପହଞ୍ଚିଛି। ପାକିସ୍ତାନ ଦ୍ୱିତୀୟ ସ୍ଥାନରେ ଅଛି। ଟିମ ଇଣ୍ଡିଆ ସବୁଠାରୁ ତଳେ ଅଛି।
୧୦୭ ରନ୍ର ଟାର୍ଗେଟ ପିଛା କରି ଭାରତୀୟ ଦଳ ୫.୪ ଓଭରରେ ମାତ୍ର ୭୯ ରନ୍ରେ ଅଲଆଉଟ ହୋଇ ୨୭ ରନ୍ରେ ପରାସ୍ତ ହୋଇଥିଲା। ଦଳ ପକ୍ଷରୁ ଅଭିମନ୍ୟୁ ମିଥୁନ ସର୍ବାଧିକ ସ୍କୋରର୍ ଥିଲେ। ସେ ୯ ବଲ୍ରେ ଗୋଟିଏ ଚୌକା ଏବଂ ୩ ଛକା ସହାୟତାରେ ୨୬ ରନ କରିଥିଲେ। ଶାହବାଜ ନଦୀମ ୮ ବଲ୍ରେ ଗୋଟିଏ ଚୌକା ଏବଂ ୨ ଛକା ସହାୟତାରେ ୧୯ ରନ କରିଥିଲେ।
ଓପନର ପ୍ରିୟାଙ୍କ ପାଞ୍ଚାଲ ୧୦ ବଲରେ ୨ ଚୌକା ଏବଂ ଗୋଟିଏ ଛକା ସହାୟତାରେ ୧୭ ରନ କରିଥିଲେ। ଅଧିନାୟକ ଦିନେଶ କାର୍ତ୍ତିକ ମାତ୍ର ୮ ରନ କରି ଆଉଟ ହୋଇଥିଲେ। କୁଏତ ଅଧିନାୟକ ୟାସିନ ପଟେଲ ୨ ଓଭରରେ ୨୩ ରନ ଦେଇ ୩ ଖେଳାଳିଙ୍କୁ ଆଉଟ କରିଥିଲେ। ବିଲାଲ ତାହିର ଏବଂ ଆଦନାନ ଇଦ୍ରିନ ପ୍ରତ୍ୟେକ ଗୋଟିଏ ଉଇକେଟ ନେଇଥିଲେ। ପୂର୍ବରୁ ୟାସିନ ପଟେଲ ମଧ୍ୟ ବ୍ୟାଟ ସହିତ ନିଜର ଶକ୍ତି ପ୍ରଦର୍ଶନ କରିଥିଲେ।
ଟିମ ଇଣ୍ଡିଆ ବିପକ୍ଷରେ ପ୍ରଥମେ ବ୍ୟାଟିଂ କରି କୁଏତ ୬ ଓଭରରେ ୧୦୬ ରନ କରିଥିଲେ। ଅଧିନାୟକ ୟାସିନ ପଟେଲ ଏକ ଝଡ଼ପୂର୍ଣ୍ଣ ଇନିଂସ ଖେଳିଥିଲେ। ସେ ୧୪ ବଲରେ ୨ ଚୌକା ଏବଂ ୮ ଛକା ସହାୟତାରେ ଅପରାଜିତ ୫୮ ରନ କରିଥିଲେ। ସେ ପ୍ରିୟାଙ୍କ ପଞ୍ଚାଲଙ୍କ ଗୋଟିଏ ଓଭରରେ ୩୨ ରନ କରିଥିଲେ। ଏହା କୁଏତକୁ ଏକ ବଡ଼ ସ୍କୋର କରିବାକୁ ସାହାଯ୍ୟ କରିଥିଲା।
ୟାସିନଙ୍କ ବ୍ୟତୀତ ବିଲାଲ ତାହିର ୯ ବଲରେ ୨ ଚୌକା ଏବଂ ୨ ଛକା ସହାୟତାରେ ୨୫ ରନ କରିଥିଲେ। ଭାରତ ପକ୍ଷରୁ ଅଭିମନ୍ୟୁ ମିଥୁନ ତାଙ୍କ ୨ ଓଭରରେ ୨୧ ରନ ଦେଇ ୨ଟି ଉଇକେଟ ନେଇଥିଲେ। ଷ୍ଟୁଆର୍ଟ ବିନ୍ନି, ଶାହବାଜ ନଦୀମ ଏବଂ ଦିନେଶ କାର୍ତ୍ତିକ ପ୍ରତ୍ୟେକ ଗୋଟିଏ ଉଇକେଟ ନେଇଥିଲେ। ପୂର୍ବରୁ ନଭେମ୍ବର ୭ ତାରିଖରେ ଖେଳାଯାଇଥିବା ମ୍ୟାଚ ରେ ଭାରତ ପାକିସ୍ତାନକୁ ୨ ରନରେ ପରାସ୍ତ କରିଥିଲା।
Dharitri – Odisha’s No.1 Odia Daily
