ଚଣ୍ଡିଗଡ଼, ୧୦।୮: ମୁଲାନପୁରଠାରେ ନିର୍ମାଣ ଚାଲିଥିବା ନୂଆ କ୍ରିକେଟ୍ ଷ୍ଟାଡିୟମର ନାମ ପଟିଆଲାର ଅନ୍ତିମ ରାଜା ସ୍ବର୍ଗତ ମହାରାଜା ଯାଦବିନ୍ଦ୍ର ସିଂଙ୍କ ନାମରେ ନାମିତ କରାଯିବ। ପଞ୍ଜାବ କ୍ରିକେଟ୍ ଆସୋସିଏଶନ (ପିସିଏ) ବୈଠକରେ ଏହି ନିଷ୍ପତ୍ତି ନିଆଯାଇଛି। ମହାରାଜ ଯାଦବିନ୍ଦ୍ର ସିଂ ୧୯୩୪ରେ ଭାରତ ପକ୍ଷରୁ ଟେଷ୍ଟ ମ୍ୟାଚ୍ ଖେଳିଥିଲେ। ବର୍ତ୍ତମାନ ପଞ୍ଜାବର ମୁଖ୍ୟମନ୍ତ୍ରୀ ରହିଥିବା କ୍ୟାପ୍ଟେନ ଅମରିନ୍ଦର ସିଂଙ୍କ ପିତା ହେଉଛନ୍ତି ଯାଦବିନ୍ଦ୍ର। ମୁଲାନପୁରରେ ମୋଟ୍ ୪୧.୯୫ ଏକର ଜମିରେ ଏହି ଷ୍ଟାଡିୟମ ନିର୍ମାଣ ଚାଲିଛି। ପିସିଏର ପୂର୍ବତନ ସଭାପତି ଆଇଏସ୍ ବିନ୍ଦ୍ରା ଏହି ଷ୍ଟାଡିୟମର ରୂପରେଖ ପ୍ରସ୍ତୁତ କରିଥିଲେ। ମୋହାଲି ଜିଲାରେ ଅବସ୍ଥିତ ଏହି କ୍ରିକେଟ୍ ଷ୍ଟାଡିୟମର ଦର୍ଶକ କ୍ଷମତା ୪୦ ହଜାର ରଖାଯାଇଛି। ଷ୍ଟାଡିୟମ ନିର୍ମାଣ ଲାଗି ୨୩୦ କୋଟି ଟଙ୍କାର ବଜେଟ୍ ରଖାଯାଇଛି। ଏହି ବୈଠକରେ ପିସିଏର ଚୁକ୍ତିଭିତ୍ତିକ ଖେଳାଳିଙ୍କ ସଂଖ୍ୟା ୩୦ରୁ ୪୦କୁ ବୃଦ୍ଧି କରାଯିବାକୁ ନିଷ୍ପତ୍ତି ହୋଇଛି। ଯେଉଁଥିରେ ୧୦ଜଣ ମହିଳା କ୍ରିକେଟର୍ ରହିବେ।
