ଦେବଗଡ଼,୨୩ା୭(ଶଶାଙ୍କ ଶେଖର ଝାଙ୍କର):ନାବାଳକ ଜୀବିତ ଥିବା ଭାବି ମଶାଣିରୁ ଉଠାଇ ଡାକ୍ତରଖାନାକୁ ଆଣିଲେ ଜ୍ଞାତି ପରିଜନ। ହେଲେ ଡାକ୍ତରଖାନାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏଭଳି ଏକ ଅଭାବନୀୟ ଘଟଣା ଘଟିଛି ଦେବଗଡ଼ ଜିଲା ରିଆମାଳ ଥାନା ଅନ୍ତର୍ଗତ ବୁଡିଦୋ ଗ୍ରାମରେ।
ସୂଚନା ଅନୁଯାୟୀ, ବୁଡିଦୋ ଗ୍ରାମର ମାନଗୋବିନ୍ଦ ବେହେରାଙ୍କ ପୁଅ ହୀରାଚାନ୍ଦ ବେହେରା(୧୫) ମଙ୍ଗଳବାର ପୂର୍ବାହ୍ନରେ ସ୍ଥାନୀୟ ହାଇସ୍କୁଲକୁ ଯିବା ପାଇଁ ଘରୁ ବାହାରୁଥିବାବେଳେ କୌଣସି କାରଣରୁ ହଠାତ୍ ତଳେ ପଡି ସଂଜ୍ଞାହୀନ ହୋଇଯାଇଥିଲେ। ଏହାଦେଖି ତାଙ୍କ ମାଆ ନିକଟସ୍ଥ ଧରମପୁର ଗ୍ରାମର ଏକ ଜଳଖିଆ ଦୋକାନରେ କାମ କରୁଥିବା ମାନଗୋବିନ୍ଦଙ୍କୁ ଫୋନ୍ ଯୋଗେ ଜଣାଇଥିଲେ। ମାନଗୋବିନ୍ଦ ଜଳଖିଆ ଦୋକାନୀଙ୍କ ଗାଡି ଯୋଗେ ଘରେ ପହଞ୍ଚି ହୀରାଚାନ୍ଦଙ୍କୁ ଚିକିତ୍ସା ନିମନ୍ତେ ଛତାବର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଫଳରେ ମାନଗୋବିନ୍ଦ ନିରାଶ ହୋଇ ପୁଅର ମୃତଦେହ ଘରକୁ ଫେରାଇ ଆଣିଥିଲେ। ହୀରାଚାନ୍ଦଙ୍କ ସହପାଠୀମାନେ ତାଙ୍କ ଘରେ ପହଞ୍ଚି ଅନ୍ତିମ ଦର୍ଶନ କରିବା ପରେ ଜ୍ଞାତି ପରିଜନ ଓ ପଡୋଶୀ ମୃତଦେହ ସତ୍କାର ପାଇଁ ଗ୍ରାମ ମଶାଣିକୁ ନେଇଥିଲେ। ତେବେ ସେମାନଙ୍କ ମଧ୍ୟରୁ କେହିଜଣେ ହୀରାଚାନ୍ଦଙ୍କ ଶରୀରର ବିଭିନ୍ନ ଅଙ୍ଗକୁ ଛୁଇଁବା ସହ ତାଙ୍କର ନାଡି ଚାଲୁଥିବା ଏବଂ ହୃଦ୍ ସ୍ପନ୍ଦନ ହେଉଥିବା କହିବାରୁ ସମସ୍ତେ ଚକିତ ହୋଇପଡିଥିଲେ। ହୀରାଚାନ୍ଦ ଜୀବିତ ଥିବା ଭାବି ଆମ୍ବୁଲାନ୍ସରେ ତାଙ୍କୁ ଦେବଗଡ଼ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ସେଠାରେ ଡା. ଶିବାନୀ ମୋଦି ତାଙ୍କୁ ମୃତ ଘୋଷଣା କରିଥିଲେ। ଏହି ଖବର ପ୍ରଚାରିତ ହେବାପରେ ଜନସାଧାରଣଙ୍କ ମଧ୍ୟରେ ଉତ୍ସୁକତା ପ୍ରକାଶ ପାଇବା ସହ ଘଟଣା ସମ୍ପର୍କରେ ଜାଣିବା ପାଇଁ ଜିଲା ମୁଖ୍ୟ ଚିକିତ୍ସାଳୟରେ ବହୁ ଲୋକ ରୁଣ୍ଡ ହୋଇଥିଲେ। ଖବରପାଇ ପୋଲିସ ସେଠାରେ ପହଞ୍ଚି ଏକ ଅପମୃତ୍ୟୁ ମାମଲା ରୁଜୁ କରିବା ସହ ହୀରାଚାନ୍ଦଙ୍କ ମୃତଦେହ ଜବତ କରି ଜିଲା ମୁଖ୍ୟ ଚିକିତ୍ସାଳୟ (ପୁରାତନ)ର ଶବାଗାରରେ ସଂରକ୍ଷିତ ରଖିଛି। ବୁଧବାର ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯିବ ବୋଲି ପୋଲିସ ସୂଚନା ଦେଇଛି। ଏନେଇ ଡା. ଶିବାନୀ ମୋଦି କହିଛନ୍ତି, ହୀରାଚାନ୍ଦଙ୍କୁ ମୃତ ଅବସ୍ଥାରେ ଜିଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିବା। ଦୀର୍ଘ ସମୟ ପୂର୍ବରୁ ତାଙ୍କର ମୃତ୍ୟୁ ଘଟିଥିଲା। ବ୍ୟବଚ୍ଛେଦ ପରେ ମୃତ୍ୟୁର କାରଣ ଜଣାପଡିବ ବୋଲି ସେ କହିଛନ୍ତି।
