ଥୁଆମୂଳ ରାମପୁର,୧୪ା୨(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ଅଡ୍ରି ପଞ୍ଚାୟତସ୍ଥିତ ଦୋଲଗୁଡ଼ା (ଟଟା ପଡ଼ା) ଗ୍ରାମରେ ଯେଉଁ ଦୃଶ୍ୟ ଦେଖିବାକୁ ମିଳିଛି, ତାହା ବିକାଶର ନଗ୍ନଚିତ୍ରକୁ ପଦାରେ ପକାଇଛି। ଜଣେ ଜୀବିତ ବୃଦ୍ଧାଙ୍କୁ କାଗଜପତ୍ରରେ ମୃତ ସଜାଇ ଦୀର୍ଘ ୪ ବର୍ଷ ହେଲା ତାଙ୍କ ମୁହଁରୁ ଦାନା ଛଡ଼ାଇ ନିଆଯାଇଥିବା ବେଳେ ପ୍ରଶାସନ ଚୁପ୍ ବସିଛି।
ଅଭିଯୋଗ ଅନୁଯାୟୀ, ଗ୍ରାମର ସାବିତ୍ରୀ ନାୟକଙ୍କୁ ପାଖାପାଖି ୮୦ ବର୍ଷ ହୋଇଥିଲେ ସୁଦ୍ଧା ସରକାରୀ ସହାୟତା କହିଲେ ଶୂନ। ଭତ୍ତା କଥା ଛାଡ଼ନ୍ତୁ। ତାଙ୍କୁ ଆଜି ପର୍ଯ୍ୟନ୍ତ ପ୍ରଧାନମନ୍ତ୍ରୀ ଆବାସ ଯୋଜନାରେ ଖଣ୍ଡେ ଘର ମଧ୍ୟ ମିଳିପାରିଲା ନାହିଁ। ଏହି ବୟସରେ ସେ ନିଜକୁ ଜୀବିତ ବୋଲି ପ୍ରମାଣ କରିବାକୁ ସଂଘର୍ଷ କରୁଥିବା ବେଳେ ତାଙ୍କ ସ୍ବାମୀ ପ୍ରସାଦ ନାୟକଙ୍କୁ ମଧ୍ୟ ଗତ ୪ ମାସ ହେଲା ଭତ୍ତା ମିଳୁନାହିଁ। ଏଭଳି ସ୍ଥିତିରେ ପ୍ରଶ୍ନ ଉଠୁଛି, ଗରିବ ହିତାଧିକାରୀଙ୍କ ପାଇଁ ଉଦ୍ଦିଷ୍ଟ ଟଙ୍କା କୁଆଡ଼େ ଯାଉଛି? ଲୋକେ ଭୋଟ ଦେଇ ଜନପ୍ରତିନିଧି ବାଛିଛନ୍ତି ସେମାନଙ୍କ ସୁଖଦୁଃଖ ବୁଝିବା ପାଇଁ। କିନ୍ତୁ ଜଣେ ଅସହାୟ ବୃଦ୍ଧାଙ୍କୁ ତାଙ୍କର ହକ୍ ଭତ୍ତା ଓ ଘର ଖଣ୍ଡେ କରାଇ ଦେବାରେ ଏହି ନେତାମାନେ ସମ୍ପୂର୍ଣ୍ଣ ବିଫଳ ହୋଇଛନ୍ତି। ଏଠାରେ ବ୍ଲକ ସାମାଜିକ ସୁରକ୍ଷା ଅଧିକାରୀ ଏବଂ ପଞ୍ଚାୟତ ନିର୍ବାହୀ ଅଧିକାରୀ କରୁଛନ୍ତି କ’ଣ ବୋଲି ସାଧାରଣରେ ପ୍ରଶ୍ନ ଉଠୁଛି? ଜୀବିତ ହିତାଧିକାରୀଙ୍କୁ ମୃତ ଘୋଷଣା କରିବା ପଛରେ କୌଣସି ବଡ଼ ଘୋଟାଲା ରହିଥିବା ଅନୁମାନ କରାଯାଉଛି।
ଏ ସମ୍ପର୍କରେ ଅଡ୍ରି ପଞ୍ଚାୟତର ପିଇଓ କୀର୍ତ୍ତି ଚନ୍ଦ୍ର ମାଝୀଙ୍କୁ ପଚାରିବାରୁ ସେ କହିଛନ୍ତି ଯେ, ମୁଁ ପୂର୍ବରୁ ଏହି ପଞ୍ଚାୟତ ଦାୟିତ୍ୱରେ ନ ଥିଲି, କାହିଁକି ଏଭଳି ହୋଇଛି ମୁଁ ଦେଖୁଛି। ବ୍ଲକରୁ ମଧ୍ୟ ଏନେଇ ସୂଚନା ମିଳିଛି ଏବଂ ମୁଁ ବୃଦ୍ଧାଙ୍କ ସମସ୍ତ ତଥ୍ୟ ବିଏସ୍ଏସ୍ଓ କାର୍ଯ୍ୟାଳୟରେ ଦେଇ ସାରିଛି।
ସେହିପରି ବିଡିଓ ଧ୍ରୁବ ଚରଣ ମୁଦୁଲି ମଧ୍ୟ ଘଟଣାର ତଦନ୍ତ କରି ବୁଝୁଛନ୍ତି ବୋଲି ପ୍ରତିକ୍ରିୟା ଦେଇଛନ୍ତି। ବୃଦ୍ଧା ସାବିତ୍ରୀ ପୂର୍ବରୁ ୫୦୦ ଟଙ୍କା ଭତ୍ତା ପାଉଥିଲେ, କିନ୍ତୁ ୪ ବର୍ଷ ହେଲା ସେଥିରୁ ବଞ୍ଚିତ ଅଛନ୍ତି। ଏବେ ୪ ବର୍ଷର ସମସ୍ତ ବକେୟା ଟଙ୍କା ସହ ବର୍ଦ୍ଧିତ ଭତ୍ତା ପ୍ରଦାନ କରିବାକୁ ସାଧାରଣରେ ଦାବି ହେଉଛି। ଜିଲା ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେଇ ସାବିତ୍ରୀଙ୍କୁ ନ୍ୟାୟ ନ ଦେଲେ ଆଗାମୀ ଦିନରେ ଅଞ୍ଚଳବାସୀ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ଚେତାବନୀ ଦେଇଛନ୍ତି।