ନୂଆଦିଲ୍ଲୀ,୨୩।୬: ଆମେରିକୀୟ ମହାକାଶ ଗବେଷଣା ସଂସ୍ଥା ନାସା ଏକ କାଳ୍ପନିକ ଆକଳନ କରି ଜାଣିପାରିଛି ଯେ ଭବିଷ୍ୟତରେ ଗୋଟିଏ ଧୂମକେତୁ ଆସି ପୃଥିବୀରେ ମାଡ଼ ହେବାର ୭୨% ପ୍ରତିଶତ ସମ୍ଭାବନା ରହିଛି। କେବଳ ଏତିକି ନୁହେଁ ଏହି ଧୂମକେତୁ ମାଡ଼ ହେଲେ ଏହାକୁ ସାମ୍ନା କରିବାକୁ ମଧ୍ୟ ଆମେ ଆବଶ୍ୟକ ପ୍ରସ୍ତୁତ ନଥିବା ବୋଲି କୁହାଯାଇଛି।
ସ୍ପେସ୍ ଏଜେନ୍ସିର ଏକ ଅଫିସିଆଲ ରିପୋର୍ଟରେ କହିଛି, ଗତ ଏପ୍ରିଲ ମାସରେ ଜନ୍ ହପକିନ୍ସ ଆପ୍ଲାଏଡ୍ ଫିଜିକ୍ସ ଲାବୋରେଟୋରୀ (ଏପିଏଲ୍) ରେ ପଞ୍ଚମ ଦ୍ୱି ବର୍ଷୀୟ ପ୍ଲାନେଟାରୀ ଡିଫେନ୍ସ ଅନ୍ତଃରାଜ୍ୟ ଟାବଲେଟପ୍ ଏକ୍ସରସାଇଜ ଅନୁଷ୍ଠିତ ହୋଇଥିଲା। ଜୁନ୍ ୨୦ ରେ, ନାସା ଏକ୍ସରସାଇଜର ସାରାଂଶ ଉନ୍ମୋଚନ କରିଥିଲା।
ନାସା ବ୍ୟତୀତ ଏହି ଟ୍ୟାବଲେଟ୍ ଏକ୍ସରସାଇଜରେ ଆମେରିକାର ବିଭିନ୍ନ ସରକାରୀ ଏଜେନ୍ସି ଏବଂ ଆନ୍ତର୍ଜାତୀୟ ସହଯୋଗୀଙ୍କ ପାଖାପାଖି ୧୦୦ ପ୍ରତିନିଧୀ ସାମିଲ ହୋଇଥିଲେ। ଭବିଷ୍ୟତରେ କୌଣସି ବଡ଼ ଧୂମକେତୁ ବିପଦ ନଥିବାବେଳେ, ପୃଥିବୀର ଏକ ସମ୍ଭାବ୍ୟ ବିପଜ୍ଜନକ ଗ୍ରହର ବିପଦକୁ ପ୍ରଭାବଶାଳୀ ଭାବରେ ମୁକାବିଲା କରିବାର କ୍ଷମତାକୁ ଆକଳନ କରିବା ପାଇଁ ଏହା କରାଯାଇଥିଲା।
ନାସା ଏହା ମଧ୍ୟ କହିଛି ଯେ, ଏହି କାଳ୍ପନିକ ଏକ୍ସରସାଇଜରୁ ଜଣା ପଡିଲା କି ସମ୍ଭାବ୍ୟ ବିପଦ, ଏହାର ମୁକାବିଲା କରିବାର ବିକଳ୍ପ ଏବଂ ମିଳିତ ମୁକାବିଲା କରିବାର ସୁଯୋଗ କିପରି ରହିଛି।
ଟାବଲେଟପ୍ ଏକ୍ସରସାଇଜ ସାରାଂଶରେ ଉଲ୍ଲେଖ ରହିଛି, “ଏକ୍ସରସାଇଜ ସମୟରେ, ଅଂଶଗ୍ରହଣକାରୀମାନେ ଏକ କାଳ୍ପନିକ ଦୃଶ୍ୟ ପାଇଁ ସମ୍ଭାବ୍ୟ ଜାତୀୟ ତଥା ବିଶ୍ୱସ୍ତରୀୟ ପ୍ରତିକ୍ରିୟାଗୁଡ଼ିକୁ ବିବେଚନା କରିଥିଲେ ଯେଉଁଥିରେ ପୂର୍ବରୁ ଚିହ୍ନଟ ହୋଇନଥିବା ଧୂମକେତୁ ଚିହ୍ନଟ ହୋଇଥିଲା। ପ୍ରାରମ୍ଭିକ ଆକଳନ ଅନୁଯାୟୀ ପୃଥିବୀ ସହିତ ଧକା ହେବାର ୭୨% ସମ୍ଭାବନା ଥିଲା, ଯାହା ପରେ ଆସନ୍ତା ୧୪ ବର୍ଷରେ ପୃଥିବୀକୁ ଧକା ଦେଇପାରେ। ”
ସଠିକ୍ ଭାବରେ କହିବାକୁ ଗଲେ, “୧୨ ଜୁଲାଇ ୨୦୩୮ ରେ(୧୪.୨୫ ବର୍ଷ ପରେ) ପୃଥିବୀ ସହିତ ଧୂମକେତୁ ଧକା ହେବାର ୭୨% ସମ୍ଭାବନା ରହିଛି।” ତେବେ, ଧୁମକେତୁର ଆକାର, ଗଠନ ଏବଂ ଦୀର୍ଘକାଳୀନ ଗତିପଥ ନିର୍ଣ୍ଣୟ କରିବା ପାଇଁ ଏହି ପ୍ରାଥମିକ ପର୍ଯ୍ୟବେକ୍ଷଣ ପର୍ଯ୍ୟାପ୍ତ ନୁହେଁ ବୋଲି ନାସା କହିଛି।
