ନୂଆଦିଲ୍ଲୀ,୨୬।୯ : କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ମଙ୍ଗଳବାର ଦାବି କରିଛି ଦେଶରେ ଯକ୍ଷ୍ମା ନିରୋଧୀ ଔଷଧର ଅଭାବ ନାହିଁ। ସମସ୍ତ ଔଷଧ ପର୍ଯ୍ୟାପ୍ତ ପରିମାଣରେ ଉପଲବ୍ଧ ଏବଂ ପ୍ରାୟ ୬ମାସ କିମ୍ବା ଅଧିକ ସମୟ ପାଇଁ ଷ୍ଟକ ରହିଛି। କେତେକ ଗଣମାଧ୍ୟମ ରିପୋର୍ଟରେ କୁହାଯାଇଥିଲା ଦେଶରେ ଯକ୍ଷ୍ମା ନିରୋଧୀ ଔଷଧର ଅଭାବ ରହିଛି ଏବଂ ଜାତୀୟ ଯକ୍ଷ୍ମା ନିରାକରଣ କାର୍ଯ୍ୟକ୍ରମ ଅଧୀନରେ ଦିଆଯାଉଥିବା ଏହି ଔଷଧର ଫଳପ୍ରଦତା ଉପରେ ମଧ୍ୟ ପ୍ରଶ୍ନ ଉଠିଥିଲା ।
ବର୍ତ୍ତମାନ ସ୍ବାସ୍ଥ୍ୟ ମନ୍ତ୍ରଣାଳୟ ଏହି ରିପୋର୍ଟକୁ ଖଣ୍ଡନ କରି ଦେଶରେ ଯକ୍ଷ୍ମା ନିରୋଧୀ ଔଷଧର ଅଭାବ ନାହିଁ ବୋଲି ଦାବି କରିଛି। ଔଷଧ ସମ୍ବେଦନଶୀଳ ଚିକିତ୍ସାରେ, ଯକ୍ଷ୍ମା ରୋଗୀଙ୍କୁ ୨ ମାସ ପାଇଁ ଚାରି ପ୍ରକାର ଔଷଧର ସିରିଜ ଦିଆଯାଏ। ସେଥିମଧ୍ୟରେ ଇସୋନିଆଜିଡ, ରିଫାମ୍ପାଇସିନ, ଏଥାମବୁଟୋଲ ଏବଂ ପିରାଜାଇନାମାଇଡ ରହିଛି। ଏହା ପରେ, ପରବର୍ତ୍ତୀ ଦୁଇ ମାସ ପାଇଁ ତିନୋଟି ଔଷଧ, ଇସୋନିଆଜିଡ, ରିଫାମ୍ପାଇସିନ ଏବଂ ଏଥାମବୁଟୋଲ ଦିଆଯାଏ । ସ୍ବାସ୍ଥ୍ୟ ମନ୍ତ୍ରଣାଳୟ କହିଛି ଏହି ସମସ୍ତ ଔଷଧ ପର୍ଯ୍ୟାପ୍ତ ପରିମାଣରେ ଉପଲବ୍ଧ।
ମଲ୍ଟି ଡ୍ରଗ ପ୍ରତିରୋଧକ ଯକ୍ଷ୍ମା ଚିକିତ୍ସାରେ ସାଧାରଣତ ୭ ସାତୋଟି ଔଷଧ ଅନ୍ତର୍ଭୁକ୍ତ ହୋଇଛି। ଚାରିମାସ ପାଇଁ ବେଡାକୁଇଲିନ, ଲେଭୋଫ୍ଲୋକ୍ସାସିନ, କ୍ଲୋଫାଜିମାଇନ, ଆଇସୋନିଆଜିଡ, ଇଥାମବୁଟଲ, ପିରାଜାଇନାମାଇଡ ଏବଂ ଇଥିଓନାମାଇଡ ଦିଆଯାଇଥାଏ। ଏହା ପରେ, ପରବର୍ତ୍ତୀ ପାଞ୍ଚ ମାସ ପାଇଁ, ଚାରୋଟି ଔଷଧରେ ଲେଭୋଫ୍ଲୋକ୍ସାସିନ, କ୍ଲୋଫେଜାମାଇନ, ପିରାଜାଇନାମାଇଡ ଏବଂ ଏଥାମବୁଟୋଲ ଦିଆଯାଇଥାଏ।
