ନୂଆଦିଲ୍ଲୀ,୨୭।୧୧: ମଙ୍ଗଳବାର ସଂସଦରେ ସମ୍ବିଧାନ ଦିବସ ସମାରୋହ ଆୟୋଜନ କରାଯାଇଥିଲା। ତେବେ ସେଣ୍ଟ୍ରାଲ ହଲ୍ରେ ଏହି କାର୍ଯ୍ୟକ୍ରମରେ କିଛି ଅଜବ ଘଟଣା ଦେଖିବାକୁ ମିଳିଥିଲା। ଯେତେବେଳେ ଦୁଇ ପୁରୁଣା ବନ୍ଧୁ ଏକାଠି ନଜର ଆସିଥିଲେ। ଏହି ସମୟରେ ଯିଏ କିଏ ବି ଏହି ଘଟଣା ଦେଖିଥିଲେ ସେ ତାଜୁବ ହୋଇଯାଇଥିଲେ। ଦୁଇ ବନ୍ଧୁ ଦୀର୍ଘ ଦିନ ପରେ ଏକାଠି କଥାବାର୍ତ୍ତ ହେଉଥିବାର ଦେଖିବାକୁ ମିଳିଥିଲା। ଏହି ଦୁଇବନ୍ଧୁ ହେଲେ ବିରୋଧୀ ଦଳ ନେତା ରାହୁଲ ଗାନ୍ଧୀ ଓ କେନ୍ଦ୍ରମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ।
ଦୁଇବନ୍ଧୁ ଏକାଠି ଦେଖାହେବା ପରେ ହାତ ମିଳାଇଥିଲେ। ଏହି ଦୃଶ୍ୟ ଦେଖିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ରାହୁଲ ଓ ସିନ୍ଧିଆଙ୍କ ଏହି ଫଟୋ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି। ପ୍ରଥମେ ସିନ୍ଦିଆ ରାହୁଲଙ୍କୁ ଅଭିବାଦନ ଜଣାଇଥିଲେ। ଏହାପରେ ରାହୁଲ ତାଙ୍କୁ ଖୁସିରେ ହାତ ମିଳାଇଥିଲେ। ତେବେ ଦୁଇ ନେତାଙ୍କ ମଧ୍ୟରେ କୌଣସି ବାର୍ତ୍ତାଳାପ ହୋଇନଥିଲା। ଏହି ସମୟରେ କଂଗ୍ରେସ ସଭାପତି ଖାର୍ଗେ ମଧ୍ୟ ଉପସ୍ଥିତ ଥିଲେ।
ତେବେ ଏହି ଭେଟକୁ ନେଇ ଭାଜପା ଓ କଂଗ୍ରେସ ଏମପିଙ୍କ ମଧ୍ୟରେ ବହୁ ଚର୍ଚ୍ଚା ହୋଇଥିଲା। ୪ବର୍ଷ ପରେ ଦୁଇବନ୍ଧୁଙ୍କ ଭେଟ ହଠାତ୍ ଜାତୀୟ ରାଜନୀତିର ଏକ ବଡ଼ ପ୍ରସଙ୍ଗ ପାଲଟିଛି। ସେଣ୍ଟ୍ରାଲ ହଲରେ ଦୁହେଁ ଏକାଠି ହେବା ମାତ୍ରେ ଅନ୍ୟ କଂଗ୍ରେସ ନେତାମାନେ ଏହା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ।
ଦୀର୍ଘ ଦିନ ଧରି କଂଗ୍ରେସରେ ଥିବା ସିନ୍ଧିଆଙ୍କୁ ରାହୁଲ ଗାନ୍ଧୀଙ୍କ ଘନିଷ୍ଠ ବନ୍ଧୁ ଭାବରେ ବିବେଚନା କରାଯାଉଥିଲା। ମାର୍ଚ୍ଚ ୨୦୨୦ରେ କଂଗ୍ରେସରେ ସିନ୍ଧିଆ ବିଦ୍ରୋହ କରି ଦଳ ଛାଡିଥିଲେ। ଏହାପରେ ପ୍ରଥମ ଥର ପାଇଁ ଦୁଇ ନେତା ଗତକାଲି ସଂସଦରେ ମୁହାଁମୁହିଁ ହୋଇଛନ୍ତି। ୨୦୨୦ରେ ସିନ୍ଧିଆ ତାଙ୍କ ସମର୍ଥକ ବିଧାୟକଙ୍କ ସହ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ। ଏହା ପରେ କମଲ ନାଥଙ୍କ ସରକାର ମଧ୍ୟପ୍ରଦେଶରେ ଗଠନ ହୋଇଥିଲା। ସେବେଠାରୁ ଉଭୟ ନେତା ପରସ୍ପରକୁ ଟାର୍ଗେଟ କରିଥିଲେ।
