ଭୁବନେଶ୍ୱର,୨୨।୧୨(ବ୍ୟୁରୋ): ଓଡ଼ିଶାରେ କଲରାପତରିଆ ବାଘ ସଂଖ୍ୟା ଆଶାତୀତ ଭାବେ ବୃଦ୍ଧିପାଇଛି। ମାତ୍ର ୪ ବର୍ଷରେ ଏମାନଙ୍କ ସଂଖ୍ୟା ୧୦୦%ରୁ ଅଧିକ ବଢ଼ିଛି। ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ (ଏନ୍ଟିସିଏ) ପକ୍ଷରୁ ପ୍ରକାଶିତ ‘ଷ୍ଟାଟସ୍ ଅଫ୍ ଲିଓପାର୍ଡସ୍ ଇନ୍ ଇଣ୍ଡିଆ ୨୦୧୮’ ରିପୋର୍ଟରୁ ଏହି ତଥ୍ୟ ସାମ୍ନାକୁ ଆସିଛି। ସୋମବାର କେନ୍ଦ୍ର ପରିବେଶ ମନ୍ତ୍ରୀ ପ୍ରକାଶ ଜାଭଡେକର ନୂଆଦିଲ୍ଲୀଠାରେ ଏହି ରିପୋର୍ଟକୁ ଉନ୍ମୋଚନ କରି ଦେଶରେ କଲରାପତରିଆ ବାଘ ସଂଖ୍ୟାରେ ୬୦% ବୃଦ୍ଧି ଘଟିଥିବା ସୂଚନା ଦେଇଛନ୍ତି। ୨୦୧୪ରେ ଭାରତରେ ମୋଟ ୭,୯୧୦ କଲରାପତରିଆ ବାଘ ରହିଥିବାବେଳେ ୨୦୧୮ରେ ତାହା ବୃଦ୍ଧି ପାଇ ୧୨,୮୫୨ରେ ପହଞ୍ଚତ୍ଛି। ମଧ୍ୟପ୍ରଦେଶ, କର୍ନାଟକ ଏବଂ ମହାରାଷ୍ଟ୍ରରେ ସର୍ବାଧିକ ଲିଓପାର୍ଡ ପ୍ରଜାତିର ବାଘ ରହିଥିବା ମନ୍ତ୍ରୀ ସୂଚନା ଦେଇଛନ୍ତି। ତେବେ ଏ କ୍ଷେତ୍ରରେ ଓଡ଼ିଶା ୭ମ ସ୍ଥାନରେ ରହିଛି। ଦେଶରେ ମୋଟ ୪ଟି ଜୋନ୍ରେ ହୋଇଥିବା ଏହି ବ୍ୟାଘ୍ର ଗଣନାରେ ଓଡ଼ିଶା ‘ମଧ୍ୟ ଭାରତ ଏବଂ ପୂର୍ବ ଘାଟ’ ଜୋନ୍ରେ ରହିଥିଲା। ଏହି ଜୋନ୍ରେ ମୋଟ ୮,୦୭୧ କଲରାପତରିଆ ବାଘ ଥିବାବେଳେ ଏହାମଧ୍ୟରୁ ଓଡ଼ିଶାରେ ୭୬୦ଟି ରହିଥିବା ରିପୋର୍ଟରେ ଉଲ୍ଲେଖ ରହିଛି।
୨୦୧୪ରେ ଏନ୍ଟିସିଏ ଓ ରାଜ୍ୟ ସରକାରଙ୍କ ଦ୍ୱାରା ହୋଇଥିବା ବ୍ୟାଘ୍ର ଗଣନା ସର୍ଭେରେ ଓଡ଼ିଶାରେ ୩୧୮ କଲରାପତରିଆ ରହିଥିଲା। ୨୦୧୮ରେ ଏହି ସଂଖ୍ୟା ୭୬୦କୁ ବୃଦ୍ଧି ପାଇଛି ଅର୍ଥାତ୍ ଓଡ଼ିଶାରେ ବାଘସଂଖ୍ୟା ଶତ ପ୍ରତିଶତରୁ ଅଧିକ ବଢିଛି, ଯାହାକି ଜାତୀୟ ହାର(୬୦%)ଠାରୁ ମଧ୍ୟ ଅଧିକ। ତତ୍କାଳୀନ ମୁଖ୍ୟ ବନ୍ୟପ୍ରାଣୀ ତତ୍ତ୍ୱାବଧାରକ ସିଦ୍ଧାନ୍ତ ଦାସ, ଡ. ସନ୍ଦୀପ ତ୍ରିପାଠୀ, ଡ. ଅଜୟ କୁମାର ମହାପାତ୍ରଙ୍କ ସହ ଓଡ଼ିଶା ଦାୟିତ୍ୱରେ ଥିବା ନୋଡାଲ ଅଫିସର ଡ. ଜ୍ଞାନଦତ୍ତ ପତି, ଭକ୍ତ ପଦାରବିନ୍ଦ ରଥ, ଡ. ନିମାଁଇ ଚରଣ ପଲେଇଙ୍କ ନେତୃତ୍ୱରେ ଏହି ଗଣନା କରାଯାଇଥିଲା।
ଅନ୍ୟପକ୍ଷରେ ଜାତୀୟ ରିପାର୍ଟ ଅନୁଯାୟୀ, ମଧ୍ୟପ୍ରଦେଶରେ ସର୍ବାଧିକ ୩,୪୨୧ କଲରାପତରିଆ ବାଘ ରହିଥିବାବେଳେ କର୍ନାଟକରେ ୧୭୮୩ ଓ ମହାରାଷ୍ଟ୍ରରେ ୩ୟ ସର୍ବାଧିକ ରହିଛନ୍ତି। ଏହାତଳକୁ ତାମିଲନାଡ଼ୁରେ ୮୬୮, ଛତିଶଗଡ଼ ୮୫୨, ଉତ୍ତରାଖଣ୍ଡ ୮୩୯, ଓଡ଼ିଶା ୭୬୦, କେରଳ ୬୫୦, ଆନ୍ଧ୍ରପ୍ରଦେଶ ୪୯୨, ରାଜସ୍ଥାନ ୪୭୬, ତେଲେଙ୍ଗାନା ୩୩୪ ଓ ଉତ୍ତରପ୍ରଦେଶରେ ୩୧୬ କଲରାପତରିଆ ବାଘ ରହିଛନ୍ତି। ପାଟର୍ନ ରେକ୍ଗନିଶନ ସଫ୍ଟଓ୍ବେର୍ ବ୍ୟବହାର ମାଧ୍ୟମରେ ଏହି ସର୍ଭେ କରାଯାଇଥିଲା।
