ରାମନାଗୁଡ଼ା/ପଦ୍ମପୁର/ବିଷମକଟକ,୩ା୩(ଡି.ଏନ୍.ଏ.):ରାୟଗଡ଼ା ଜିଲା ଗୁଡ଼ାରୀ ଥାନା ଅନ୍ତର୍ଗତ ରାମନାଗୁଡା ବ୍ଲକ ଗୁମୁଡ଼ା ମୁଖ୍ୟ ବଜାରରେ ଗୁରୁବାର ଏକ ଅଭାବନୀୟ ଘଟଣା ଘଟିଛି। ଜଣେ ଯୁବକ ଛୁରିରେ ଜଣେ କଲେଜ ଛାତ୍ରୀଙ୍କ ଗଳା କାଟି ଦେଇଛନ୍ତି। ଛାତ୍ରୀ ଜଣକ ଯୁକ୍ତ ୨ ପରୀକ୍ଷା ଦେଇ ଘରକୁ ଫେରିବା ବେଳେ ଆକ୍ରମଣର ଶିକାର ହୋଇଛନ୍ତି। ଛାତ୍ରୀଙ୍କ ଅବସ୍ଥା ଗୁରୁତର ଥିବାବେଳେ ଅଭିଯୁକ୍ତ ବିଷମକଟକ ଅଞ୍ଚଳର କେ. ତିରୁମାଲା(୨୮)ଙ୍କୁ ସ୍ଥାନୀୟ ଲୋକେ କାବୁ କରି ଗୁମୁଡ଼ା ଫାଣ୍ଡି ଜିମା ଦେଇଥିଲେ। ପ୍ରେମଜନିତ କାରଣରୁ ସେ ଏପରି କରିଥିବା ପୋଲିସ ଆଗରେ ସ୍ବୀକାର କରିଛନ୍ତି।
ପ୍ରକାଶ ଯେ, ଗୁମୁଡା ଦ୍ରୌପଦୀ ଜୁନିୟର କଲେଜରେ ଛାତ୍ରୀ ଜଣକ ଯୁକ୍ତ ୨ଦ୍ୱିତୀୟ ବର୍ଷର ପରୀକ୍ଷା ଦେଇ ଘରକୁ ଫେରିବା ଲାଗି ଗୁମୁଡ଼ା ମୁଖ୍ୟ ବଜାରରେ ବସ୍କୁ ଅପେକ୍ଷା କରିଥିଲେ। ଏହି ସମୟରେ ତିରୁମାଲା ହଠାତ୍ ସାମ୍ନାକୁ ଚାଲିଆସି ଛୁରିରେ ଛାତ୍ରୀଙ୍କ ବେକ କାଟି ଦେଇଥିଲେ। ପ୍ରବଳ ରକ୍ତସ୍ରାବ ହେଉଥିବା ଦେଖି ସ୍ଥାନୀୟ ଲୋକେ ଛାତ୍ରୀଙ୍କୁ ଉଦ୍ଧାର କରି ପଦ୍ମପୁର ମେଡିକାଲକୁ ନେଇଥିଲେ। ଅବସ୍ଥା ଗୁରୁତର ଥିବାରୁ ସେଠାରୁ ତାଙ୍କୁ ବ୍ରହ୍ମପୁର ଏମ୍କେସିଜି ମେଡିକାଲକୁ ସ୍ଥାନାନ୍ତର କରାଯାଇଛି। ଅଭିଯୁକ୍ତ ତିରୁମାଲାଙ୍କୁ ଗୁଡାରି ଥାନାକୁ ନିଆଯାଇ ଅଧିକ ତଦନ୍ତ ଚାଲିଥିବା ଥାନା ଅଧିକାରୀ ଦୀନବନ୍ଧୁ ଶବର କହିଛନ୍ତି। ଏ ନେଇ ନଂ.୧୬/୨୩ ରେ ମାମଲା ରୁଜୁ ହୋଇଛି।
