କଳିଙ୍ଗନଗର,୧୫ା୨(ଡି.ଏନ.ଏ.):ଧାତବ ଶିଳ୍ପର ରାଜଧାନୀ ଯାଜପୁର ଜିଲାର କଳିଙ୍ଗନଗର ଶିଳ୍ପାଞ୍ଚଳ ସଂଲଗ୍ନ ପଞ୍ଚାୟତ ମଧ୍ୟରୁ ଯଖପୁରା ଅନ୍ୟତମ। ଏହି ପଞ୍ଚାୟତର ମହୁଲପଦା ଗଁାକୁ ଦେଖିଲେ ତାହା ବିକାଶ ନକ୍ସାରୁ ବାଦ୍ ପଡ଼ିଥିବା ଅନୁଭବ ହୁଏ। ଗାଁ ବିକାଶରେ ପ୍ରକୃତ ବିକାଶ ନ୍ୟାୟରେ ପଞ୍ଚାୟତକୁ କ୍ଷମତା ହସ୍ତାନ୍ତର କରାଯାଇଛି। ମାତ୍ର ବ୍ୟାପକ ଅନୁଦାନ ସତ୍ତ୍ୱେ ବଦଳି ନାହିଁ ଏହି ଗାଁର ଚିତ୍ର। ନିର୍ବାଚନ ଆସିଲେ ବିଭିନ୍ନ ରାଜନୈତକ ଦଳର ନେତା ଓ ପ୍ରାର୍ଥୀମାନେ ଏହି ଗଁାକୁ ମନେପକାଇଥାନ୍ତି। ମାତ୍ର ଭୋଟ୍ ସରିଗଲା ପରେ ସମସ୍ତେ ଭୁଲିଯାଆନ୍ତି। ଉକ୍ତ ଗାଁର ମୁଖ୍ୟ ସମସ୍ୟା ହେଉଛି ଏହାର ପ୍ରବେଶପଥ ସଂଲଗ୍ନ ରାସ୍ତା। ଅସରାଏ ବର୍ଷା ହେଲେ ଗାଁ ରାସ୍ତାରେ ଚାଲିବା କଷ୍ଟକର। ଶତ ପ୍ରତିଶତ ତଫସିଲଭୁକ୍ତ ଜାତି ଲୋକେ ବାସ କରୁଥିବା ଏହି ଗାଁର ୧୬ଟି ଘରେ ପାଖାପାଖି ୩୦ ପରିବାର ରହୁଛନ୍ତି। ଗ୍ରାମବାସୀଙ୍କ ମଧ୍ୟରୁ ଅର୍ଦ୍ଧାଧିକ ଦିନମଜୁରିଆ। କେହି କେହି ପାଖ କାରଖାନାରେ ଠିକା ଶ୍ରମିକ ଭାବେ କାମ କରନ୍ତି। ସବୁ ପରିବାର ଭୂମିହୀନ ହୋଇଥିବାବେଳେ ସରକାରୀ ଜମିରେ ଘର କରି ରହୁଛନ୍ତି। ଗ୍ରାମର କାହାକୁ ବସୁନ୍ଧରା ଯୋଜନାରେ ସାମିଲ କରାଯାଇନାହିଁ। ଦୀର୍ଘଦିନ ଧରି ଉପେକ୍ଷିତ ରହିଛନ୍ତି ଏହି ଗାଁର ଲୋକେ।
ବାସନ୍ତି ମଲିକଙ୍କ କହିବା ମୁତାବକ, ସବୁଥର ନିର୍ବାଚନ ପୂର୍ବରୁ ଆମ ଗାଁରେ ଭିଡ଼ ହୁଏ। ଭୋଟ ଭିକ୍ଷା ବାହାନାରେ ପ୍ରଚୁର ପ୍ରତିଶୁ୍ରତି ଅଜାଡ଼ି ଦିଆଯାଏ। ମାତ୍ର ଭୋଟ ସରିଲେ କାଶିଆ କିଏ ନା କପିଳା କିଏ। ଗାଁ ରାସ୍ତା କଂକ୍ରିଟ କରିବାକୁ ବିଡିଓଙ୍କଠାରୁ ନେତାଙ୍କ ପର୍ଯ୍ୟନ୍ତ ବାରମ୍ବାର ଦାବି ଜଣାଇ ନେହୁରା ହେଉଥିଲେ ମଧ୍ୟ ସୁଫଳ ମିଳିନାହିଁ। ନିର୍ବାଚନ ପରେ କେମିତି ଅଛୁ ବୁଝିବାକୁ ଆମ ଗାଁରେ ଦିନେ କାହାର ପାଦ ପଡ଼ିନାହିଁ। ଚଳିତଥର ଏହି ପଞ୍ଚାୟତରୁ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେଉଛି। ବିଜେଡି ସମର୍ଥିତ ସରପଞ୍ଚ ପ୍ରାର୍ଥୀ ଭାବେ ଅରୁଣ ଜ୍ୟୋତି ସାମଲ, ଭାଜପା ସମର୍ଥିତ ପ୍ରାର୍ଥୀ କୁଳମଣି ଧଳ ଏବଂ ସ୍ବାଧୀନ ଭାବେ ଦୀପକ କୁମାର ନାୟକ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏହି ପଞ୍ଚାୟତ ଅଧୀନ ୧୫ ୱାର୍ଡର ମୋଟ୍ ୩୮୩୮ ଭୋଟର ମତଦାନ କରିବେ। ତେବେ ଏଥର ଲୋକେ କାହାକୁ ବିଜୟୀ କରାଇବେ ତାହା ଭୋଟ୍ ଗଣତି ପରେ ଜଣାପଡ଼ିବ। ମାତ୍ର ସମସ୍ୟା ଯେଉଁମାନେ ସମାଧାନ କରିବେ ଲୋକେ ସେମାନଙ୍କୁ ଭୋଟ୍ ଦେବେ ବୋଲି କହିଛନ୍ତି। ଏବେ ଦେଖିବାକୁ ଅପେକ୍ଷା ଲୋକେ କାହାକୁ ଚୟନ କରୁଛନ୍ତି।
