ରାୟଗଡା ଅଫିସ,୧୩।୭-ପୋଲିସ ଆଖିରେ ଧୂଳି ଦେଇ ଥାନା ସମ୍ମୁଖରୁ ଖସି ଯିବାକୁ ଜଣେ ଅଭିଯୁକ୍ତ ଚେଷ୍ଟା କରୁଥିବାବେଳେ ତାଙ୍କ ଉପରେ ଟ୍ରକ ଚଢିଯାଇଛି। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଛି। ସୋମବାର ରାୟଗଡା ଜିଲାରେ ଏପରି ଅଭାବନୀୟ ଘଟଣା ଦେଖିବାକୁ ମିଳିଛି।
ପ୍ରକାଶ ଯେ, ପ୍ରେମ ଓ ପ୍ରତାରଣା ଅଭିଯୋଗରେ ଟିକିରି ଥାନା ଅଞ୍ଚଳର ସନ୍ତୋଷ ପଣ୍ଡୁଙ୍କୁ ଗିରଫ କରିଥିଲା। ସୋମବାର ତାଙ୍କୁ ରାୟଗଡା କୋର୍ଟଚାଲାଣ ପାଇଁ ଅଣାଯାଇଥିଲା। କୋର୍ଟକୁ ନେବା ପୂର୍ବରୁ ତାଙ୍କୁ ରାୟଗଡା ଥାନାରେ ରଖାଯାଇଥିଲା। ତେବେ ଥାନାରୁ ଗାଡିକୁ ନେବାବେଳେ ସନ୍ତୋଷ ଖସି ପଳାଇ ଥିଲେ। ରାସ୍ତାରେ ଦୌଡୁଥିବାବେଳେ ସମ୍ମୁଖରୁ ଆସୁଥିବା ଏକ ଟ୍ରକ ତାଙ୍କ ଉପରେ ଚଢି ଯାଇଥିଲା। ପୋଲିସ ମୃତଦେହ ଜବତ କରି ତଦନ୍ତ ଚଳାଇଛି।
