ଭଦ୍ରକ,୨୨ା୧(ସନାତନ ରାଉତ): ଭଦ୍ରକ ଜିଲା ଧାମରା ବନ୍ଦର ନିକଟସ୍ଥ ଉଡ଼ାବାଲି ଦ୍ବୀପରେ ୭୭ତମ ସାଧାରଣତନ୍ତ୍ର ଦିବସ ପୂର୍ବରୁ ଉଡ଼ିଛି ତ୍ରିରଙ୍ଗା। ଉପକୂଳ ସୁରକ୍ଷା ଓ ଶହୀଦଙ୍କ ଶ୍ରଦ୍ଧାଞ୍ଜଳି ଉଦ୍ଦେଶ୍ୟରେ ଏହି ତ୍ରିରଙ୍ଗା ଉତ୍ତୋଳନ କରାଯାଇଛି। ଯାହାର ପ୍ରକୃତ ନାମ ହେଲା କନିକା ବାଲି ଦ୍ୱୀପ। କନିକା ରାଜାଙ୍କ ରାଜୁତି ସମୟରେ ଏକ ସୁନ୍ଦର ଗାଥା ବହନ କରେ ଏହି ଦ୍ୱୀପ। ସମୟ କ୍ରମେ ମାଛ ମାରିବା ବେଳେ ବାଲି ଉଡ଼ିବା ଯୋଗୁ ନାମକରଣ ହୋଇଛି ଉଡ଼ା ବାଲି। ଏହି ଦ୍ୱୀପ ଏସିଆର ସର୍ବ ବୃହତ ବନ୍ଦର ଅର୍ଥାତ୍ ଭଦ୍ରକ ଜିଲାର ଧାମରା ବନ୍ଦରରୁ ସାମୁଦ୍ରିକ ପଥରେ ମାତ୍ର ୧୨ କିଲୋମିଟର ଦୂରରେ ଅବସ୍ଥିତ। କିନ୍ତୁ ଧାମରା ବନ୍ଦର ନିର୍ମାଣ ପୂର୍ବରୁ ପଶ୍ଚିମବଙ୍ଗ ନିଜର ବୋଲି ଦାବି କରିଥିଲା। କାରଣ ବନ୍ଦର ପାଇଁ ଏହି ବାଲି ଦ୍ୱୀପ ଏକ ଗୁରୁତ୍ୱପୂର୍ଣ୍ଣ ସ୍ଥାନ ବହନ କରେ। ସମୁଦ୍ରର ଢେଉ ମାଡ଼ ହେବା ପରେ ସମୁଦ୍ର ଜଳ ସ୍ଥିର ହେବା ସହ ଧାମରା ବନ୍ଦର ପର୍ଯ୍ୟନ୍ତ ଏକ ପ୍ରାକୃତିକ ପୋତାଶ୍ରୟ ସୃଷ୍ଠି କରିଛି। ଏହି ଦ୍ୱୀପ ପଶ୍ଚିମ ବଙ୍ଗଠାରୁ ୧୭୦ କିଲୋମିଟର ଦୂର ହୋଇଥିବାରୁ ଏହି ଉଡ଼ା ବାଲିକୁ ନିଜର ଦାବି କରିଥିଲା ଓ ଓଡ଼ିଶାରେ ଯେମିତି ବନ୍ଦର ନ ହେବ ସେ ନେଇ ଭରପୂର ଚେଷ୍ଟା କରିଥିବା ସୂଚନା ମିଳେ। ବଡ଼ବଡ଼ ଜାହାଜ ଯୋଗେ ଆସୁଥିବା ସାମଗ୍ରୀକୁ ଉଡ଼ା ବାଲିରୁ ଅନ୍ୟ ଛୋଟ ଜାହାଜ ଯୋଗେ ନେବା ପାଇଁ ଯୋଜନା କରିଥିଲା ପଶ୍ଚିମବଙ୍ଗ। କିନ୍ତୁ ସମୟ କ୍ରମେ ଏହି ବନ୍ଦର ଓ ଉଡା ବାଲି ଭଦ୍ରକ ଜିଲା ଚାନ୍ଦବାଲି ଅଧୀନରେ ରହିଛି। ଉପକୂଳ ସୁରକ୍ଷା ଦୃଷ୍ଟିରୁ ଏହି ଦ୍ୱୀପ ମଧ୍ୟ ବେଶ ଗୁରୁତ୍ୱପୂର୍ଣ୍ଣ। ତେଣୁ ଆଜି ଏହି ଦ୍ୱୀପରେ ଜାତୀୟ ପତାକା ଉତ୍ତୋଳନ କରିଛନ୍ତି ପୋଲିସ ମହାନିର୍ଦ୍ଦେଶକ(ଡିଜିପି) ଓ୍ବାଇ ବି ଖୁରାନିଆ। ଅଖଣ୍ଡ ଓଡ଼ିଶା ଗଠନ ଓ ଉପକୂଳ ସୁରକ୍ଷା ପାଇଁ ଏହି ଦ୍ୱୀପରେ ଜାତୀୟ ପତାକା ଉତ୍ତୋଳନ ନିଶ୍ଚିତ ଉତ୍ସାହଜନକ। ୭୭ ତମ ସାଧାରଣତନ୍ତ୍ର ଦିବସ ଅବସରରେ ପର୍ଯ୍ୟାୟ କ୍ରମେ୧୩ଟି ଦ୍ବୀପ ପୁଞ୍ଜରେ ତ୍ରିରଙ୍ଗା ଉଡ଼ିବା ନେଇ ଭାରତ ସରକାର ନିଷ୍ପତ୍ତି ନେଇଛନ୍ତି, ପ୍ରତି ମାସରେ ମେରାଇନ ପୋଲିସ ଉପକୂଳ ସୁରକ୍ଷା ପାଇଁ ରାଷ୍ଟ୍ର ବିରୋଧୀଙ୍କ ଉଦ୍ଦେଶ୍ୟରେ ଦ୍ବୀପପୁଞ୍ଜରେ ପାଟ୍ରୋଲିଂ ହେବ। ଉପକୂଳ ସୁରକ୍ଷା ପାଇଁ ଗତ ଆର୍ଥିକ ବର୍ଷ ବଜେଟ୍ରେ ଉଡ଼ା ବାଲି ଦ୍ୱୀପ ପାଇଁ ୨୨ କୋଟି ଚଳିତ ବର୍ଷରେ ସାମୁଦ୍ରିକ ପୋଲିସ କ୍ଷମତା ବଢ଼ାଇବା ପାଇଁ ଅତିରିକ୍ତ ୧୫୦ କୋଟି ରାଜ୍ୟ ସରକାର ଅନୁମୋଦନ କରିଛନ୍ତି। ଓଡ୍ରାଫ, ଅଗ୍ନିଶମ, ପୋଲିସର କଣ୍ଟ୍ରୋଲ ସେଣ୍ଟର ସ୍ଥାପନ ପାଇଁ ଏହି ଅର୍ଥ ଖର୍ଚ୍ଚ କରାଯିବ। ସେହିପରି ଅନୁପ୍ରବେଶକାରୀଙ୍କ ରୋକ୍ ପାଇଁ ମେରାଇନ ପୋଲିସ, ଫାୟାର ବୋଟ୍ ସବୁବେଳେ ପାଇଁତରା ମାରିବ। କେମିତି ଉପକୂଳ ସୁରକ୍ଷା ଦୃଷ୍ଟିରୁ ମଜବୁତ ରହିବ, ଉପକୂଳ ସୁରକ୍ଷା ସହ ସ୍ଥାନୀୟ ବାସିନ୍ଦାଙ୍କ ଆର୍ଥିକ ବିକାଶ ପାଇଁ ସରକାର ଗୁରୁତ୍ୱ ଦେଇଛନ୍ତି ବୋଲି କହିଛନ୍ତି ପୋଲିସ ମହାନିର୍ଦ୍ଦେଶକ।
ଏହି କାର୍ଯ୍ୟକ୍ରମରେ DGPଙ୍କ ସହ ରେଳବାଇ ପୋଲିସ, ଉପକୂଳ ସୁରକ୍ଷା ଅତିରିକ୍ତ ମହା ନିର୍ଦ୍ଦେଶକ ଅରୁଣ ବୋଥ୍ରା, ପୂର୍ବାଞ୍ଚଳ DIG ପିନାକ ମିଶ୍ର,ଭଦ୍ରକ ଏସ୍ପି ମନୋଜ ରାଉତ, NCC କମାଣ୍ଡାଣ୍ଟ, ଧାମରା ବନ୍ଦର ମୁଖ୍ୟ ଉପସ୍ଥିତ ରହିବା ସହ ସ୍ଥାନୀୟ ମତ୍ସ୍ୟଜୀବୀମାନଙ୍କୁ କମ୍ବଳ ବଣ୍ଟନ କରିଥିଲେ। ଉପସ୍ଥିତ ଅତିଥି ଏବଂ ବୃକ୍ଷରୋପଣ ସହ ସାଂସ୍କୃତିକ କାର୍ଯ୍ୟକ୍ରମକୁ ଆସିଥିବା ପିଲାମାନଙ୍କୁ ଉତ୍ସାହିତ କରିଥିଲେ।