ନୂଆଦିଲ୍ଲୀ,୧୧।୭: ଦେଶରେ ନୂଆ ଆଇଟି ନିୟମର ସାମ୍ବିଧାନିକ ବୈଧତା କୁ ନେଇ ବିଭିନ୍ନ ହାଇକୋର୍ଟରେ ମାମଲା ରୁଜୁ ହୋଇଛି। ଏହା ଉପରେ ସଂପୃକ୍ତ କୋର୍ଟଗୁଡ଼ିକରେ ଶୁଣାଣିକୁ ସ୍ଥଗିତ ରଖିବା ପାଇଁ ନିର୍ଦ୍ଦେଶ ଦେବାକୁ ସୁପ୍ରିମକୋର୍ଟ ମନା କରିଦେଇଥିବା ଜଣାପଡିଛି। ତେବେ ବିଭିନ୍ନ ହାଇକୋର୍ଟରୁ ମାମଲାଗୁଡ଼ିକୁ ସୁପ୍ରିମ କୋର୍ଟକୁ ସ୍ଥାନାନ୍ତର କରିବା ଲାଗି କେନ୍ଦ୍ର ସରକାର କରିଥିବା ଆବେଦନର ଶୁଣାଣି ଆସନ୍ତା ୧୬ ତାରିଖରେ ହେବ ବୋଲି ଜଣାପଡିଛି। ଏହା ପୂର୍ବରୁ ଓଟିଟି ବିଷୟବସ୍ତୁକୁ ନେଇ ତ୍ରୀବ ପ୍ରତିକ୍ରିୟା ଏବଂ ନିୟନ୍ତ୍ରଣକୁ ନେଇ ପଡ଼ି ରହିଥିବା ମାମଲା ସହିତ ଏହି ମାମଲାର ଶୁଣାଣି ହେବ ବୋଲି ସୁପ୍ରିମ କୋର୍ଟ ପକ୍ଷରୁ କୁହାଯାଇଛି। ଉକ୍ତ ମାମଲା ଆସନ୍ତା ୧୬ ତାରିଖରେ ବିଚାରପତି ଏ ଏମ୍ ଖାନୱିଲକର ଏବଂ ବିଚାରପତି ସଂଜୀବ ଖାନ୍ନାଙ୍କ ଖଣ୍ଡପୀଠରେ ହେବ ବୋଲି ଜଣାପଡିଛି। ଓଟିଟି ପ୍ଲାଟଫର୍ମର ନିୟନ୍ତ୍ରଣ ପାଇଁ ବିଭିନ୍ନ ହାଇକୋର୍ଟରେ ହୋଇଥିବା ମାମଲାର ବିଚାର ଉପରେ ସୁପ୍ରିମକୋର୍ଟ ଗତ ମାର୍ଚ୍ଚରେ ସ୍ଥଗିତାଦେଶ ଦେଇଥିଲେ।
